Congo Nile Trail ahantu nyaburanga hagenewe ubukerarugendo bukorwa ku rugendo ruva mu karere ka Rubavu rukagera mu ka Rusizi. Uru rugendo rwambukiranya uturere dukora ku nkengero z’ikiyaga cya kivu dusaga dutanu. Congo Nile Trail ifite uburebure bwa kilometero 277, rukorwa mu gihe cy’iminsi 10.

Ubukerarugendo bukorwa ba mukerarugendo batembera ku nkengero z’ikiyaga cya Kivu bakava i Rubavu, Karongi, Rutsiro, Nyamasheke na Rusizi, aho basura ibice bitandukanye n’ibyiza nyaburanga byo mu Ntara y’Iburengerazuba.

Amakuru dukesha ishami ry’ubukerarugendo mu kigo cy’Igihugu cy’iterambere (RDB), atangaza ko iminsi ine ibanza igendwa ahantu haterera, hari mu karere ka Rubavu ujya mu Rwinyoni, aho umuntu abona ibyiza nyaburanga birimo amazi y’ i Kivu n’ubuhinzi bw’amaterasi y’indinganire ku butaka buhuje.

Kuva mu Rwinyoni ugana Kinuma, mukerarugendo asura ubworozi bwa kijyambere bw’amafi i Nkora, urugaranda rutunganya ikawa rwa Kinunu, bagakomeza urugendo i Masasa, ahari ubuhinzi bw’ikawa bunogeye ijisho.

Urugendo rwa Congo Nile Trail rukomereza i Rubengera n’i Karongi, ahantu nyaburanga umuntu yisanzura yidagadura ku nkengero z’ikiyaga cya Kivu, mu bitwa by’imisozi kugera i Rusizi.

Bamwe muri ba mukerarugendo bahitamo gukora uru rugendo n’amagare, aho na bamwe mu bakina umukino wo gusiganwa ku magare batandukanye basura aha hantu, bakora siporo ku magare yabo.

RDB itangaza ko ukwezi kwiza ko kuhatembera ari ukuva muri Gicurasi kugeza muri Nzeri, kuko ibihe biba bimeze neza n’ingendo ugasanga zitabangamiye ba mukerarugendo, kuko bamwe bahagenda n’amaguru abandi bagakoresha amagare.