IGIHE.com > Politiki > Amakuru
Icyo Andrew Mwenda avuga kuri Kagame n’amatora ya 2017

Icyo Andrew Mwenda avuga kuri Kagame n’amatora ya 2017


Yanditswe kuya 10-01-2012 - Saa 11:11'

Si rimwe, si kabiri ndetse si gatatu abanyamakuru batandukanye babaza Perezida Paul Kagame niba aziyamamariza manda ya gatatu mu mwaka w’2017.

Igisubizo atanga nacyo gihora ari kimwe avuga ko atabona impamvu yo guhindura Itegeko Nshinga ngo akunde yongere yiyamamaze ndetse akabishimangira agira ati : “Mutegereze muzarebe !”.

Mu nyandiko ye ifite umutwe ugira uti “When Kagame disproves critics”, Andrew Mwenda uyobora ikinyamakuru ‘The Independent’, yibajije ikibazo kijya kibazwa na benshi, agira ati : “Ese Kagame azakuraho manda zigenwe kugirango akomeze abe Umukuru w’Igihugu nyuma ya 2017 ?”.

Inyandiko ye y’umwimerere iri mu Cyongereza, ikaba yahinduwe mu Kinyarwanda n’Umunyamakuru Igihozo Fiacre wa IGIHE.com :

Mu kiganiro yagiranye n’abanyamakuru ubwo yari i Kampala, Umukuru w’igihugu cy’u Rwanda Paul Kagame yagiye abazwa ibibazo byinshi by’abamushinja kutavuga mu buryo busobanutse ibyerekeye gahunda yo kurekura ubuyobozi mu 2017, ubwo azaba asoje manda ebyiri agenerwa n’itegeko nshinga rya Repubulika y’u Rwanda.

Perezida Kagame yagiye abivugaho kenshi ko atazishimira kungukira mu guhindura itegeko nshinga, nyamara benshi ntibabyemera cyangwa ngo babyizere.

Kagame yashyize ubuyobozi bwe mu buryo butandukanye n’uko byagiye bigenda henshi mu bindi bihugu by’Afurika. Byinshi mu bikorwa yagiye akora byagiye bimutandukanya na benshi mu bategetsi bo mu gihe kimwe nawe ; ibi ahanini bishingiye ku kuntu yagiye abasha kugaragaza uburyo ibyo abamurwanya baba bamushinja nta shingiro bifite. Ku bw’ibyo nta cyahesha agaciro ibyiyumviro by’abamurwanya bavuga ko ari umwe mu basonzeye ubutegetsi, nk’aho yananiwe guhagarara ku byo yivugiye ku kijyanye na manda z’ubutegetsi zigenwe.

Uyu munyamakuru wo mu gihugu cya Uganda akomeza agira ati : “Iyo dufatiye ingero ku bategetsi bo hambere h’Afurika ndetse n’ibindi bihugu byose aho abaperezida bagiye bagera ku butegetsi biciye mu ntambara, nko muri Angola, Mozambique, Koreya y’Amajyaruguru, ndetse n’u Bushinwa kugera muri Vietnam, usanga bene abo bayobozi baragiye bapfira ku butegetsi, bityo benshi bakibwira ko na Kagame azakurikiza uyu muco.

Icya kabiri, iyo umuntu arebye uko imibereho n’ubutegetsi biteye mu Rwanda, aho ishyaka riri ku butegetsi rikomeye, igice kinini cyane cy’abaturage bo mu cyaro hasi bakennye kandi batize, abo mu mijyi bake bize, sosiyete sivile itaratera imbere kandi igihuzagurika, ndetse no kuba nta batavuga rumwe na leta bafite ingufu byatuma gukuraho manda zagenwe byoroha nko kwitemberera. Ibi ni bimwe mu bishobora gutuma benshi bakemanga ko Kagame atazarekura ubutegetsi mu 2017. Gusa igikwiye gushingirwaho hashakwa ubusobanuro niba Kagame azemera guhara ubutegetsi ni imiterere ye. Aha nashimangira ko mu mwaka wa 2017 Kagame ataziyamamariza kuba perezida.

Kagame ntiyigeze agaragaza inyota y’ubutegetsi nk’uko abafite ububasha nk’ubwe babikora. Nk’urugero mu gihe RPF yafataga ubutegetsi mu 1994, umuntu wese yari gutekereza ko ariwe wagombaga guhita aba perezida. Niwe wari umuyobozi w’ikirenga w’ingabo zafashe igihugu. RPF nayo yamushyiragaho igitutu ngo abe perezida ariko aranga. N’uwari Minisitiri w’intebe Faustin Twagiramungu wanayoboye ihuriro ry’andi mashyaka ya politiki mu masezerano ya Arusha yasaba Kagame kuba perezida nabwo aranangira.

Sinzi umujenerari warwaniye ubutegetsi hanyuma abantu bose babumushyira mu biganza akanga kubufata, niba anahari ntiwashyiramo Napoleon Bonaparte, Fidel Castro, Samora Machel, George Washington, Hoh Chi Minh, Yoweri Museveni cyangwa Mao Tse Tung. Mu bifatika Kagame ntiyanitaye kubyo kuba Visi perezida, umwanya washyizweho nawe akawemera atanawushaka ; byari ukugirango hashyirweho guverinoma. U Rwanda rwamaze hafi icyumweru nta guverinoma rufite ahanini ari ukubera ko Kagame yangaga kuba perezida. Niba yarashoboye kurangiza imyaka itandatu adashaka kuba perezida, yashoboraga no kuva ku butegetsi mu 2017.

Ikintu giteye inkeke Abanyarwanda benshi n’abaruzi si ukuba Kagame yazaguma ubutegetsi, ahubwo ikibazo ni iki : “ese naramuka avuyeho, ni ibiki mubyo yakoze bizabasha kugumaho, hatitawe ku makosa ye nk’umuntu cyangwa se umuyobozi wari uhagarariye u Rwanda nk’inkingi y’ubunyangamugayo n’ubupfura, waharaniye ko guverinoma itakorera gusa abifite, ahubwo igakorera mu buryo buhwanye n’aboroheje, ndetse akarwanya ruswa atajenjetse ? Ni ikintu kitazoroha ku gikomeza atagihari.

Mu gihe nta bushobozi n’ubushishozi bwite bwa Kagame bwaba bugihari, ntibyoroshye kumenya niba ibyakozwe mu Rwanda mu gihe cye bishobora gukomera. Kuko abayobozi bashobora gutuma ibintu bikorwa ndetse bagatuma biramba. Kandi guha inzego ubushobozi n’amahame azigenga bitwara igihe kitari gito, kuko n’iyo zashyizweho ziba zishobora kongera zikagwa zitabungabunzwe neza.

Kagame yafashije gushyiraho inzego za Leta n’izabikorera mu Rwanda, yazifashije kugira ubushobozi ari nabyo byatumye u Rwanda ruzamuka bihambaye. Nyamara n’ubwo ateganya kuva ku butegetsi mu w’2017, nta kimenyeto gihagije, haba muri RPF, cyangwa no mu yandi ma shyaka cyerekana ko ubu bushobozi yabashije kubaka mu Banyarwanda buzagumaho. Buri gihe aterwa impagarara n’ukuntu abayobozi baba aba leta cyangwa abikorera,badakora ibyo bagomba gukora ahubwo ugasanga bamutinya.

Kagame ntakwiye kumvwa nabi ku kuba ariwe ugaragara nk’ukora byiza mu Rwanda, ahubwo ikibazo ni uko yaba yarageze kuri bike ; iyo aza kuba atarubatse ikipe ikomeye ngo ayitoze imyitwarire myiza no kugira intego usanga mu buzima bwa buri munyarwanda.

Ariko rero ntawabona ko Kagame naba atagihari ibintu bizakomeza gutya, bitewe ahanini n’uko murwanda hari ababa bifuza imyitwarire idohotse, bamwe mu rwego rwo kugirango babone uko bibonera indonke abandi babone uko bikuza.

Iyo Kagame aba ari umuntu usonzeye ubutegetsi, yari guhitamo kubikora mu buryo bwinshi mu rwego rwo kubungabunga uko yagumana ubutegetsi bwe, nko gushakisha gushyigikirwa, kwemera ruswa, guha ibiguzi n’ubutoni abo akekaho amaboko n’ubufasha, kugira imibano idafite ishingiro ndetse no kwihakirizwa ku banyamahanga, nyamara mu byemezo bye byinshi ndetse n’ibikorwa yagiye agaragaza urugero rwo gushaka gushyira inyungu z’igihugu cye mbere y’ize bwite.

Henshi muri Afurika no ku isi, abayobozi bashingira ububasha bwabo ku kwigura ku bakomeye (ibyo wakwita nka ruswa). Ariko Kagame we yifuje gushingira imbaraga ze hafi ya zose ku mikorere myiza ya guverinoma ye ateza imbere imibereho myiza y’abaturage be, anabaha ububasha ku mutungo wa leta na serivise. Ibi byose si ibimenyetso by’umuyobozi wifuza kugundira ubutegetsi, kuko nta nyungu nyinshi afite mu butegetsi, kandi ntabwo yibona nk’aho ariwe mucunguzi, Kagame yarekura byoroshye ubutegetsi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO