Icyerekezo cya Mpayimana muri politiki nyuma yo gutsindwa amatora ya Perezida

Yanditswe na Ferdinand Maniraguha
Kuya 7 Kanama 2017 saa 11:21
Yasuwe :
0 0

Nubwo Philippe Mpayimana, umukandida wigengaga, yatsinzwe mu matora ya Perezida wa Repubulika yabaye tariki ya 3 n’iya 4 Kanama 2017, akagira amajwi atagera kuri 1%, ntibyatumye atekereza kuvirira inzira ya politiki mu Rwanda.

Mu majwi y’agateganyo yatangajwe na Komisiyo y’amatora kuwa Gatandatu tariki 5 Kamena, agaragaza ko umukandida w’Umuryango FPR Inkotanyi Paul Kagame ariwe waje imbere n’amajwi 98.63 %, agakurikirwa na Mpayimana Philippe umukandida wigenga ufite 0.73 % naho Frank Habineza w’Ishyaka Democratic Green Party agira 0.47 %.

Mpayimana w’imyaka 47 akimara kumenya ko yatsinzwe mu ijoro ryo kuwa Gatanu yahise agaragara kuri televiziyo y’ u Rwanda ashimira Paul Kagame wamutsinze anamwifuriza imirimo myiza.

Nyuma yo kuva mu matora, IGIHE yegereye Mpayimana imubaza ibyo agiye gukora nyuma yo kudahirwa mu matora aherutse, ashimangira ko agiye gukomeza politiki.

Yagize ati “Harakurikiraho gukomeza guharanira ibyo nabonye abanyarwanda bashimye, nzakomeza gukorana nabo ntacyo nsize inyuma kuko naje niteguye gukorera igihugu kandi nabitekereje.”

Ubwo Mpayimana yagarukaga mu Rwanda umwaka ushize nyuma y’imyaka 13 aba mu Bufaransa, yaje afite igitekerezo cyo gushinga ishyaka nyamara ntiyahise abikora kuko yasanze ryazajya kubona ibyangombwa byose igihe cyo gutanga kandidatire cyararenze.

Abajijwe niba agifite icyo gitekerezo Mpayimana yagize ati “Ni amateka y’igitekerezo cyo kwiyamamaza, niyo hagira ikindi kiba ntabwo nahera nk’aho nari ndi icyo gihe, urumva ko biratandukanye. Ni ibintu nzatekerezaho gahoro gahoro kuko ngomba kubanza ngatega amatwi Abanyarwanda, ngatekereza agaciro baha gukorera mu ishyaka cyangwa se gukora wigenga, nkazafata icyemezo nyuma. Icy’ingenzi ni ugukomeza gukora politiki no guharanira ibyateza imbere Abanyarwanda, byo ngomba kubikomeza.”

Nubwo yiyemeje gukorera politiki mu Rwanda, Mpayimana usanzwe akora ubushabitsi mu Bufaransa yavuze ko atazahacika.

Ati “Ntabwo nakora nk’uko bisanzwe ko abantu bava mu Bufaransa bakaza mu Rwanda bagahita bibagirwa amahanga nk’uko n’abava mu Rwanda bakajya mu mahanga batagomba kwibagirwa u Rwanda, ngomba gukomeza gutsura imigenderanire y’abari hanze no mu gihugu.”

Mpayimana Philippe yavukiye mu Karere ka Nyaruguru , mu yahoze ari Perefegitura ya Gikongoro mu mwaka wa 1970, cyakora yabyirukiye mu Bugesera mu Ntara y’Uburasirazuba.

Mpayimana yize amashuri yisumbuye mu rwunge rw’amashuri rwa Save (Groupe Scolaire Save), naho amashuri ya Kaminuza ayiga muri Kaminuza Nkuru y’u Rwanda, i Nyakinama. Andi mashuri yize muri Cameroun, ni ay’indimi n’isesengura ryazo.

Nyuma yaho Mpayimana yize iby’itangazamakuru, aza no kuba umwe mu banyamakuru batangiranye na Televiziyo y’u Rwanda (TVR) mu 1992.

Yabaye impunzi muri Congo-Kinshasa, Congo Brazaville, Cameroun n’u Bufaransa, bimuha impumeko y’igitabo yanditse akacyita "Réfugiés rwandais, entre marteau et enclume : récit du calvaire au Zaïre". Yagarutse mu Rwanda muri Mutarama 2017, aje gukusanya ibyangombwa bisabwa umukandida, no kwiyamamariza kuyobora u Rwanda.

Philippe Mpayimana wahataniraga kuba Perezida wa Repubulika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza