Urukundo rw’umuhanzi Sano Olivier n’umukunzi we rwajemo kidobya nyuma y’amezi atatu bavuye mu Murenge

Yanditswe na Muvunyi Arsène
Kuya 3 Kanama 2019 saa 01:28
Yasuwe :
0 0

Ku mbuga nkoranyambaga inkuru yabaye kimomo ko umuhanzi w’indirimbo zo kuramya no guhimbaza Imana, Sano Olivier yatandukanye n’umukunzi we bari barashyingiranywe byemewe n’amategeko mu mezi atatu ashize.

Byatunguye benshi bari bategereje ubukwe bw’uyu musore na Uwera Carine mu Ukuboza uyu mwaka, bukaba bupfubye habura amezi ane.

Hari amajwi y’uyu mukobwa ari gukwirakwiza n’abantu ku mbuga nkoranyamba avuga uburyo yizeye uyu musore, akamuha umutima wese nyamara atazi ko amukurikiyeho imitungo.

Yumvikana avuga ati “Uri umuhemu, uri umutindi, nta n’aho utaniye n’abantu bicanye. Nawe uri umwicanyi kuko wishe umutima wanjye, nta na kimwe uzigera ugeraho mu buzima bwawe ngo ugire amahoro n’ubugome ukoze bungana gutyo.”

Mu ijwi ririmo ikiniga cyinshi, uyu mukobwa yumvikana yishyuza Sano Olivier imitungo ye yose yamuhaye azi ko ayihaye umugabo we.

Ati “Ibi bintu ntabwo birangirira aha. Unsubize ibyanjye naguhaye iyo mitwe mwagiye gukina, ukankoresha Umurenge w’ibinyoma, ukaba uriho urabyivugira. Mfite ibyangombwa bigagaraza ibyo naguhaye, ugende ubimpe kuko sinakuguze ntiwagurishwaga.”

Muri iyi mitungo harimo imodoka agendamo n’ikibanza bari baraguze ariko bikarangira akigurishije miliyoni umunani nk’uko bigaragara mu nyandiko y’amasezerano yagiranye n’uwitwa Ntakirutimana Djuma.

Umwe mu nshuti z’aba bombi yabwiye IGIHE ko umubano w’aba bombi watangiye kuzamo igitotsi nko mu kwezi gushize, ubwo Sano Olivier yafataga icyemezo cyo guhagarika kuvugana na we kuri telefoni, ndetse nimero ye akayikumira (bloquer).

Imvano y’isenyuka ry’uru rugo ngo ni ukutumvikana ku ikoreshwa ry’umutungo, aho Sano yagiye asaba umukunzi we amafaranga y’umurengera bakagera n’aho babipfa.

Mu kiganiro kigufi yagiranye na IGIHE, Sano Olivier yirinze kugira byinshi atangaza, mu magambo make avuga ko ‘ibyo yavuze byose ni ibinyoma.”

Uwera Carine uba muri Leta Zunze Ubumwe za Amerika yari amaze imyaka itatu akundana n’uyu muhanzi. Muri Mutarama nibwo yamwambitse impeta nk’ikimenyetso cy’uko bazabana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza