Iradukunda Liliane yabaye Nyampinga w’u Rwanda 2018 (Amafoto na Video)

Yanditswe na Munyengabe Murungi Sabin
Kuya 24 Gashyantare 2018 saa 06:24
Yasuwe :
5 0

Ikamba rya Nyampinga w’ u Rwanda ryambitswe Iradukunda Liliane w’imyaka 18 y’amavuko ureshya na 1.70 cm, akaba ari mu bari bahagarariye Intara y’Uburengerazuba, Igisonga cya Kabiri cyabaye Irebe Natacha Ursule naho igisonga cya mbere ni Umunyana Shanitah.

Iradukunda Liliane upima ibilo 57 yatowe mu birori byabereye muri Kigali Convention Centre tariki ya 24 Gashyantare 2018.

Umukobwa ugirwa Nyampinga si uw’ikimero n’ubwiza gusa, hejuru y’ibi agomba kuba afite ubumenyi kurusha abandi ndetse akagira umuco nk’imwe mu nkingi z’ubuzima bw’Igihugu.

Abakobwa 20 bageze mu cyiciro cya nyuma cy’irushanwa batoranyijwe muri 35 batsinze amajonjora yabereye mu ntara zose z’igihugu. Aba bakobwa bari mu ngeri zinyuranye, harimo ab’inzobe, igikara ndetse n’imibiri yombi, ab’ikimero cyiza banaberwa n’amafoto; ibi byose bigaherekezwa n’ubuhanga.

Amajonjora ku rwego rw’igihugu yatangiriye i Musanze tariki 13 Mutarama 2018, akomeza tariki 14 Mutarama 2018 mu Karere ka Rubavu, ku ya 20 Mutarama 2018 yabereye i Huye, tariki 21 Mutarama 2018 bikomereza mu Karere ka Kayonza hanyuma bisorezwa mu Mujyi wa Kigali tariki 27 Mutarama 2018.

Iradukunda Elsa ubwo yambikaga ikamba umusimbura we Iradukunda Liliane

Muri aba bakobwa baserukiye ibice bitandukanye by’igihugu hatowemo uwahize abandi ari Iradukunda Liliane wasimbuye Iradukunda Elsa wari umaze umwaka afite ikamba rya Nyampinga w’u Rwanda.

Mu myiyereko yaranze ibi birori, abakobwa bose berekanye ko batojwe gutambuka no kwiyerekana neza; uwabahize yagaragaje umwihariko muri byose haba mu ntambuko, ubwenge no gusubiza ndetse ni we ufite ubwiza n’umuco bikwiye kuranga ukwiye kuba Nyampinga w’u Rwanda nk’uko byemejwe n’akanama nkemurampaka.

Mu gihe cy’ibyumweru bibiri abakobwa bamaze mu mwiherero, bigishijwe byinshi birimo kumenya kuvugira mu ruhame, intambuko iranga Nyampinga, indangagaciro z’umuco n’andi masomo atandukanye.

Buri wese wakurikiranye iri rushanwa yari afite umukobwa ashyigikiye kandi yifuza ko yagirwa Nyampinga w’u Rwanda agasimbura Iradukunda Elsa wo mu 2017.

Irushanwa ry’ubwiza mu Rwanda ryatangiye mu 1993 icyo gihe Nyampinga yabaye Miss Uwera Dalila, ryambitswe Bahati Grace mu 2009, mu 2012 rihabwa Kayibanda Mutesi Aurore, mu 2014 ryambikwa Akiwacu Colombe, Kundwa Doriane arihabwa muri 2015, Mutesi Jolly atorwa muri 2016 hanyuma Iradukunda Elsa arihabwa mu 2017.

Mu bakobwa batowe bose kuva Miss Rwanda yatangira gutorwa, mu gihugu hari babiri batatu gusa uhereye kuri Mutesi Jolly watowe muri 2016 ukagera kuri Iradukunda Liliane waryambitswe uyu munsi.

Uwera Dalila aba mu Bubiligi [guhera nyuma ya jenoside yakorewe Abatutsi] ni naho yashyingiwe, Bahati Grace atuye muri Amerika aho akora akazi ko kuvura amenyo, Mutesi Aurore na we aba muri USA ndetse na Akiwacu Colombe uba mu Bufaransa aho asigaye yerekana imideli.

Mu byashingiweho batoranya Nyampinga, ngo harebwe uburanga (amanota 30%), ubuhanga bwe (amanota 40%) ndetse n’uko yiyerekanye (amanota 30%) byose bikagira igiteranyo cy’amanota ijana. Nyampinga kandi aba ahiga abandi mu bumenyi no kumenya gusubiza ibibazo abazwa, iyi ngingo niyo ihabwa agaciro cyane kurusha izindi.

Miss Sonia Rolland wari mu kanama nkemurampaka yagize ati “Byari bikomeye kuko gutanga amanota ku bwiza, ubuhanga n’umuco biragoye bisaba kwitonda.”

Abari bagize akanama nkemurampaka muri Miss 2018 ni Mutesi Jolly [Miss Rwanda 2016], Teddy Kaberuka, Isheja Sandrine, Rwabigwi Gilbert ndetse na Sonia Rolland [Nyampinga w’u Bufaransa 2000].

Ku itariki ya 24 Gashyantare 2018, ku isaha ya saa tanu n’iminota 35 nibwo Sonia Rolland wari uyoboye akanama nkemurampaka yatangaje ko umukobwa witwa Iradukunda Liliane ari we ubaye Nyampinga w’u Rwanda umwaka wa 2018.

Yahise ahabwa imodoka nziza yo mu bwoko bwa Suzuki Baleno, umushahara w’amafaranga ibihumbi magana inani (800,000frw) bivuze ko ku mwaka azajya aba yahawe miliyoni icyenda n’ibihumbi magana atandatu (9,600,000Rwf) hakiyongeraho n’ibindi bihembo bitandukanye yagenewe na RwandAir, Sebamed n’abandi.

Iri rushanwa ritegurwa bigizwemo uruhare na Banki Nyarwanda y’Ubucuruzi ya Cogebanque ari nayo izatanga ibihembo bikuru byose Nyampinga azagenerwa.

Abakobwa bose n’imyanya batsindiye:

-  Nyampinga uberwa n’amafoto (Miss Photogenic): Iradukunda Liliane
-  Nyampinga wabaniye neza abandi (Miss Congeniality): Uwase Ndahiro Liliane
-  Nyampinga wakunzwe na benshi (Miss Popularity): Umutoniwase Anastasie
-  Nyampinga w’Umuco (Miss Heritage): Dushimimana Lydia
-  Igisonga cya Kabiri: Irebe Natacha
-  Igisonga cya Mbere: Umunyana Shanitah
-  Nyampinga w’u Rwanda: Iradukunda Liliane

Iradukunda Liliane yagizwe Nyampinga w’u Rwanda 2018

- Amafoto y’uburyo abakobwa bahembwe muri Miss Rwanda 2018

Miss Rwanda 2018 Iradukunda Liliane yahawe n'ikamba rya Nyampinga uberwa n'amafoto
Uwase Ndahiro Liliane yabaye Nyampinga wabaniye neza abandi muri Miss Rwanda
Umutoniwase Anastasie waserukiye Intara y'Amajyepfo yahawe ikamba rya Miss Popularity
Umutoniwase Anastasie na Uwase Hirwa Honorine wabaye Miss Popularity mu 2017
Umutoniwase yahembwe na Ian Boutique
Dushimimana Lydia yabaye Nyampinga w'Umuco
Ikamba yarihawe na Shimwa Guelda wabaye Miss Heritage 2017
Abakobwa batanu batowemo Miss Rwanda 2018
Irebe Natacha yabaye igisonga cya Miss Rwanda 2018
Umunyana Shanitah yabaye igisonga cya Mbere cya Miss Rwanda 2018
Iradukunda Liliane akimenyeshwa ko ari we Nyampinga mushya w'u Rwanda byamurenze asuka amarira
Abaterankunga batandukanye bahaye Miss Rwanda Iradukunda Liliane ibihembo
Miss Rwanda mushya Iradukunda Liliane
Miss Rwanda Iradukunda Liliane n'ibisonga bye
Mujyambere Louis de Montfort, Umuyobozi muri Cogebanque ubwo yashyikirizaga ibihembo Miss Rwanda 2018
Umuyobozi Mukuru wa Cogebanque, Cherno Gaye ni we washyikirije Miss Rwanda urufunguzo rw'imodoka
Iradukunda Liliane ashyikirizwa imodoka nshya yahembwe
Iradukunda mu modoka ye nshya ya Suzuki Baleno
Abayobozi ba Cogebanque hamwe na Miss Rwanda 2018 mu kiganiro bagiranye n'abanyamakuru nyuma yo gutora Iradukunda
Mu kiganiro n'itangazamakuru
Ababyeyi ba Liliane Iradukunda hamwe n'ubuyobozi bwa Cogebanque ubwo bafataga ifoto y'urwibutso
Miss Rwanda 2018 Iradukunda Liliane n'ababyeyi be

UKO IGIKORWA CYOSE CYAGENZE UMUNOTA KU WUNDI:

- 23:00: Akanama nkemurampaka kagiye kwiherera gatoranye Nyampinga w’u Rwanda mu bakobwa batanu basigaye mu irushanwa.

- Abakobwa batanu bageze mu cyiciro cya nyuma ni:

1.Iradukunda Liliane
2. Ishimwe Noriella
3. Umunyana Shanitah
4. Dushimimana Lydia
5. Irebe Natacha Ursule

Iradukunda Liliane byamurenze araturika ararira
Umunyana Shanitah
Dushimimana Lydia
Ishimwe Noriella
Irebe Natacha Ursule

- Amwe mu mafoto y’abakobwa 10 bakomeje mu cyiciro cya nyuma ubwo babazwaga ibibazo

- 22:30: Akanama nkemurampaka kagizwe na Mutesi Jolly [Miss Rwanda 2016], Teddy Kaberuka, Isheja Sandrine, Rwabigwi Gilbert ndetse na Sonia Rolland kagiye kwiherera ubundi kaze gatangaze abakobwa batanu batoranywamo Miss Rwanda.

- 22:00: Abakobwa icumi bakomeje batangiye kubazwa kugira ngo akanama nkemurampaka gasuzume ubumenyi bwa buri wese hanyuma haze kumenyekana abakobwa batanu bari bugere ku cyiciro cy’abavamo Nyampinga.

- Abakobwa 10 bageze mu cyiciro cya nyuma:

1. Uwase Ndahiro Liliane
2. Iradukunda Liliane
3. Ishimwe Noriella
4. Umunyana Shanitah
5. Irebe Natacha Ursule
6. Dushimimana Lydia
7. Umuhoza Karen
8. Umutoniwase Paula
9. Uwase Fiona
10. Ingabire Divine

- Uwase Ndahiro Liliane yinjiye mu bakobwa 10 bagera mu cyiciro cya nyuma abikesha amajwi yo kuri telefone. Yatowe inshuro 53,444.

- 21: 46: Akanama nkemurampaka kagiye gutangaza abakobwa 10 bagiye gukomeza mu cyiciro cya nyuma hashingiye ku majwi babonye mu itora rya telefone, ibizamini bakoze, uko bitwaye mu mwiherero n’indi mikoro bahawe yose.

- 21:30: Abakobwa biyerekanye mu ntambuko nziza isanzwe iranga ba Nyampinga. Batambutse baherekejwe na Buravan mu ndirimbo ye nshya ’Oya’.

- 21:08: Abakobwa biyerekana mu ndirimbo n’imbyino gakondo. Uwitwa Uwineza Solange na Ishimwe Noriella bafatanyije kuririmba Laurette ya Kamaliza, Kanjogera ya Masamba hanyuma basoza mu mudiho wa ’None Twaza’ ya Kayirebwa.

- 20:43: Abakobwa batangiye kwiyerekana ku nshuro ya mbere. Biyerekanye mu makanzu asa bose mu ibara rijya gusa na kaki. Mu myiyereko kandi aba bakobwa bakiriye Miss Iradukunda Elsa umaze umwaka afite ikamba rya Miss Rwanda.

- Akanama nkemurampaka kagizwe na Mutesi Jolly [Miss Rwanda 2016], Teddy Kaberuka, Isheja Sandrine, Rwabigwi Gilbert ndetse na Sonia Rolland.

- 20:35: Imyidagaduro itandukanye; abasore n’inkumi bazi gutigisa umubyimba mu mbyino zo hanze bari kwiyerekana. Friday James ahise atangiza igikorwa.

- 20:30: Baracyategereje Miss Rwanda...

Mu myanya yagenewe abishyuye 500,000 frw hakubise huzuye ndetse no mu bindi bice haruzuye bamwe barahagaze
Niyonizera Judithe umugore wa Safi yaje arinzwe cyane n'uwo musore munini wicaye iburyo
Niyonizera Judithe umugore wa Safi
Aimable Twhairwa n'umugore we babucyereye

- 20:00: Ibirori nyir’izina ntibiratangira, kugeza ubu Dj ari gusunika imiziki y’uruvange mu zamamaye cyane mu mahanga. Ku rundi ruhande abafana buri tsinda riri kwigaragaza rizamura amajwi ryerekana uwo rishyigikiye.

Belise[impanga ya Uwonkunda Belinda] n'umubyeyi be baje gushyigikira umwana wabo

- Miss Uwamahoro Yvonne waserukiye u Rwanda muri Miss Supranational 2012 [ubu ni na we ugena umukobwa uzaserukira igihugu], yaje muri ibi birori aturutse mu Budage aho akora akazi k’ubuganga.

- 19:30: Ibirori ntibiratangira, Dj Ira aracyasusurutsa abaje kureba Miss Rwanda mu miziki ijana ku ijana yo muri Amerika. Nta ndirimbo n’imwe yo mu Rwanda aracuranga kuva yatangira.

- Imodoka nshya [Suzuki Baleno] Cogebanque yageneye Miss Rwanda 2018 yamaze kugezwa kuri Kigali Convention Centre.

- Dj Ira ni we uri kuvanga imiziki mbere y’uko ibirori by’imyiyereko bitangira kuri KCC

- Bategereje kumenya uza kwambikwa ikamba rya Nyampinga w’u Rwanda

- 18:35: Dj Ira ubu ni we urimo kuvanga imiziki y’indobanure mu zakunzwe mu myaka icumi ishize by’umwihariko ari kwibanda ku ndirimbo zo muri Amerika.

Umuteguro uhari unogeye ijisho
Abantu batangiye kugera mu byicaro mbere y'uko isaha nyir'izina igera bakabona Nyampinga w'u Rwanda

-  Saa 6:00: Abantu batangiye kwinjira muri Kigali Convention Centre ahagiye kubera irushanwa rya Nyampinga w’u Rwanda. Abenshi baje bitwaje ibyapa biriho amafoto buri wese n’umukobwa ashyigikiye.

Iri ni itsinda ry'abafana ba Umunyana Shanitah, ...babyambariye
Igikorwa cyitabiriwe n'ingeri zose guhera ku bakiva ku ibere
Iki gikorwa kigiye kubera muri Kigali Convention Centre
Amatike aragenzurwa hakoreshejwe ikoranabuhanga mu kwirinda abajura
Abantu batangiye kwinjira muri Convention Centre ahagiye kubera Miss Rwanda 2018

- Abakobwa 20 bahataniye ikamba rya Nyampinga w’u Rwanda 2018 :

1. Uwase Ndahiro Liliane
2. Umunyana Shanitah
3. Irebe Natacha Ursule
4. Munyana Shemsa
5. Umuhoza Karen
6. Umuhire Rebecca
7. Ishimwe Noriella
8. Iradukunda Liliane
9. Uwase Fiona
10. Irakoze Vanessa
11. Umutoniwase Anastasie
12. Dushimimana Lydia
13. Ingabire Belinda
14. Ingabire Divine
15. Uwankunda Belinda
16. Umutoniwase Paula
17. Uwineza Solange
18. Mushambokazi Jordan
19. Nzakorerimana Gloria
20. Umutoni Charlotte

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza