Imodoka ya Rayon Sports yagaruwe i Kigali ikururwa nyuma y’iminsi itatu yaraheze i Nyanza (Amafoto)

Yanditswe na Ntare Julius
Kuya 2 Mata 2019 saa 08:46
Yasuwe :
0 0

Imodoka y’Ikipe ya Rayon Sports yari imaze iminsi itatu yaraheze mu Butantsinda bwa Kigoma mu Karere ka Nyanza, yagaruwe i Kigali ikururwa n’imodoka zizwi nka ’Breakdown’, kugira ngo ikoreshwe isubire mu muhanda.

Ku wa Gatanu tariki ya 29 Werurwe nibwo iyi modoka yo mu bwoko bwa Foton AUV yapfiriye mu muhanda Kigali – Huye igeze ahitwa mu Butantsinda, igiye kumurikirwa abafana bayo bakomoka i Nyanza ku gicumbi cyayo.

Ku wa Gatandatu mu gitondo nibwo inkuru yakwiriye hose ko iyi modoka abayobozi ba Rayon Sports batangaje ko ifite agaciro ka miliyoni 100 Frw yaheze ku muhanda.

Hitabajwe abakanishi batandukanye biba iby’ubusa, kugeza ubwo kuri uyu wa Kabiri hafashwe umwanzuro wo kuyigarura i Kigali.

Amakuru agera kuri IGIHE avuga ko mu gitondo cy’uyu munsi Polisi yahamagaye ubuyobozi bwa Rayon Sports ibusaba gushaka uko iyi modoka ikurwa ku muhanda, bitaba ibyo ikayihikurira bukazishyura ibyatanzwe kuri icyo gikorwa n’amande.

Abayobozi ba Rayon Sports bahise bumvikana na Sosiyete ya Akagera Motors yayibagurishije, bohereza imodoka iyigarura i Kigali mu gihe hagishakwa uko ikorwa.

Yagejejwe i Kigali mu mugoroba wo kuri uyu wa Kabiri.

Imodoka ya Rayon ifite agaciro ka Miliyoni 100 yagaruwe i Kigali ikururwa na ''Breakdown''
Ubwo yari igeze ahitwa Kamuhanda hakurya y'umugezi wa Nyabarongo
Hakuweho igice gishyirwaho nimero z'imodoka (plaques) kugira ngo babone aho bafungira ibyuma bya Breakdown yayifashaga kugenda
Abayizi yabacagaho bakayikurikiza amaso
Isatira umugezi wa Nyabarongo
Kugira ngo ibashe kugenda hari ibipande bimwe byagombaga gukurwaho
Abapolisi bayitegereza mu gihe yari isatiriye umugezi wa Nyabarongo
Igeze ku kiraro cya Nyabarongo
Yakururwaga na Breakdown
Muri iyi modoka hagendagamo abakanishi batabara iramutse igize ikibazo
Polisi y'igihugu yari iyiri hafi
Inyuma ahagenewe gushyirwa nomero y'imodoka (plaques) hari hapfutse
Uretse ikibazo tekiniki ibindi byose biracyameze neza hamwe n'ikirangantego cyayo
Yakururwaga na Breakdown
Yagenderaga iruhande rw'umuhanda cyane
Igeze ku Giti cy'Inyoni
Isatira Nyabugogo ngo ikate yerekeza ku Cyicaro cy'Akagera Business Group
Ubwo yakataga kuri feux rouge za Nyabugogo yerekeza muri Akagera Business Group
Bamwe mu bamotari yasanze Nyabugogo biyemeje kuyiherekeza bakayigeza ku Akagera Business Group
Aho yacaga hose n'ubwo hari mu masaha y'umugoroba abayibonaga bose bayitangariraga
Ubwo yakataga yinjira mu irembo ry'Akagera Business Group yari ishagawe n'abantu benshi
Yinjira mu marembo ya Akagera Business Group

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza