Urubyiruko rurenga 300 kuva hanze y’igihugu ni rwo rwitezwe mu iterero ryo mu muri Kanama. Itorero ry’igihugu rivuga ko rishimishwa n’umusaruro n’uburyo urubyiruko rw’abanyarwanda baba hanze bagenda bitabira imirimo y’itorero imibare ikaba igenda yiyongera.

Ubuyobozi bw’Itorero ry’igihugu rivuga ko uko urubyiruko rwo mu Rwanda rusabwa kwitabira itorero, n’urubyiruko rw’abanyarwanda baba hanze y’igihugu bari kugenda bitabira itorero, ukaba ari umusaruro ko barushaho kwiyumvamo ubunyarwanda no kugira indangagaciro zishingiye k’umuco nyarwanda.

Rugemintwaza Nepo Umuyobozi ushinzwe gahunda z’Itorero ry’Igihugu avuga ko gahunda y’itorero ku banyarwanda baba hanze imaze imyaka ine itangiye. Ariko ngo imaze gutanga umusaruro yaba ari ubwiyongere bw’urubyiruko ruryitabira, n’uburyo abana b’abanyarwanda baba hanze bagenda barushaho kwiyumvamo ubunyarwanda.

Rugemintwaza yatangarije IGIHE ati “Mu myaka ine ishize dukora iyo gahunda tubona ko umubare w’urubyiruko rwitabira itorero ugenda wiyongera. Kandi tunabona ko bagenda barushaho kwiyumvamo ubunyarwanda.”

Itorero ry’urubyiruko rw’abanyarwanda baba hanze ikoresha gahunda imwe n’itorero ryo mu Rwanda kuko bigishwa indangagaciro z’umunyarwanda, bagasobanurirwa icyerekezo cy’igihugu, umuco no kubakanguri ko urubyiruko rugomba kuba icyerekezo cy’igihugu binyuze mu gukorera hamwe.

Itorero ry’igihugu ku banyarwanda baba hanze rikorwa mu kwezi kwa Kanama buri mwaka kuko ari cyo gihe cy’ibiruhuko ku banyeshuri biga hanze. Incuro nyinshi baza mu Rwanda ariko rimwe na rimwe itorero rikorerwa no mu bihugu by’amahanga.

Hamaze gukorwa itorero mu bihugu bya Canada, u Bubiligi, ubuhindi, Ubushinwa kimwe n’ahandi niho hatahiwe.