Umuti wavugutiwe ADEPR ni wo ugiye kunyobwa n’Abayisilamu

Nyuma y’aho mu Buyobozi Bukuru bw’Idini rya ADEPR habaye ibibazo by’amakimbirane n’amacakubiri bikaza gukemuka ari uko inzego za Leta zibigizemo uruhare, uwo muti ni wo ugiye guhabwa abayobozi bo mu Idini ry’Abayisilamu mu Rwanda kubera uruhuri rw’ibibazo bigaragaramo muri iki gihe.

Ibi byatangajwe na Perezida wa Repubulika y’u Rwanda Paul Kagame mu kiganiro yagiranye n’abanyamakuru kuri uyu wa Gatatu tariki ya 27 Gashyantare 2013, aho yavuze ko uburyo bwakoreshejwe mu gukemura ibibazo byo mu Itorero ry’Abapantekoti mu Rwanda ari na bwo buzakoreshwa mu gukemura ibibazo byo mu Bayisilamu.

Perezida Kagame avuga kuri iki kibazo n’ingamba za Leta mu kugikemura, yagize ati ”Ingamba zizaba nk’izo muri ADEPR. Ni ukubafasha. Ubundi abantu kuba batavuga rumwe, kuba batumvikana bagira bate, hari ubwo biba ari nta kibazo ndetse muri ya sense (uburyo) rimwe mujya mubishyiramo. Si mwe mushaka za ’Oppositions’ (abatavuga rumwe) zishwanyaguza ibintu, ubwo hari ubwo biba biri ’democratic’ (binyuze muri demukarasi). Ariko ubwo iyo bigiye kurenga intera runaka bikajya guhungabanya umutekano w’abantu, icyo gihe izindi nzego zibishinzwe zibijyamo zikareba ko uwo mupaka utarenzwe n’iyo hagati baba bagerageza gukemura ibibazo bibareba numva ari ko byakemuka."

Mu kumwunganira, Musoni James, Minisitiri w’Ubutegetsi bw’Igihugu unafite amadini mu nshingano ze yavuze ko ubu hashyizweho komite ishinzwe gukurikirana icyo kibazo ku buryo ndetse bitarenze itariki ya karindwi Werurwe 2013 raporo y’uko ikibazo gihagaze izaba yagiye ahagararara.

Ibi bisubizo ku bibazo byo mu Bayisilamu biravugwa mu gihe ku wa 25 Gashyantare itsinda ry’abashehe (Sheikh) icumi bandikiye Ikigo cy’Igihugu Gishinzwe imiyoborere batabaza.

Mu ibaruwa bageneye Minisiteri y’Ubutegetsi bw’Igihugu n’Ishinzwe umutekano, bagize bati “Tumaze kubona ibibazo by’amacakubiri n’imiyoborere mibi bimaze igihe bivugwa mu muryango wacu w’Abayisilamu mu Rwanda (AMUR), tuboneyeho kubandikira iyi baruwa mu rwego rwo kubatabaza tubasaba kudukemurarira ibibazo biri mu muryango wacu nk’uko biri mu nshingano z’urwego mubereye abayobozi.”

Amakimbirane yo mu Bayisilamu yakuze gahoro gahoro kugeza ubwo batakibasha guhisha umwotsi, akaba aje nyuma y’aho mu Idini ry’Abapentikoti mu Rwanda (ADEPR) bahuye n’ibibazo nk’ibi ariko bikaba byarakemutse umwaka ushije habanje kwitabazwa inzego za Leta.