00:00:00 IGIHE NETWORK KN KINYARWANDA EN ENGLISH FR FRANCAIS

Tom Byabagamba yongeye guhamywa icyaha cyo kwiba

Yanditswe na Nkundineza Jean Paul
Kuya 20 Gicurasi 2021 saa 05:01
Yasuwe :
0 0

Urukiko Rwisumbuye rwa Nyarugenge ku gicamunsi cyo kuri uyu wa Kane rwahamije Tom Byabagamba icyaha cyo kwiba rumuhanisha igifungo cy’umwaka umwe.

Inteko y’umucamanza umwe n’umwanditsi w’urukiko niyo yasomye imyanzuro y’urubanza rwa Tom Byabagamba. Ubushinjacyaha bwari mu biro byabwo naho Byabagamba yari ari aho asanzwe afungiye muri Gereza ya Gisirikare i Kanombe.

Wari umwanzuro ku bujurire. Umucamanza yavuze ko ubujurire bwe bufite ishingiro kuri bimwe. Yasobanuye ko urubanza rwaciwe n’Urukiko rw’Ibanze rwa Kicukiro mu Ugushyingo 2020 ruhinduka gusa ku gihano yari yahawe cyo gufungwa imyaka itatu.

Umucamanza yavuze ko icyaha cy’ubujura Tom Byabagamba yagikoreye mu rukiko nubwo ahakana ko yibye telefone ubwo yari yagiye kuburana kuko nta wamureze ko yamwibye, ariko ko hari umuhanga wanditse ko nubwo watora ikintu kidafite nyiracyo ukagitwara ntihagire ukurega ko uba ukoze icyaha cyo kwiba.

Bityo ko ari yo mpamvu Urukiko Rwisumbuye rwa Nyarugenge rwamuhamije icyaha cy’ubujura rugabanya gusa igihano yari yahawe n’Urukiko rw’Ibanze rwa Kicukiro cy’imyaka itatu.

Muri Mata 2020 nibwo byatangajwe ko Tom Byabagamba yagombaga gusubizwa mu butabera akaburanishwa ku byaha bishya yakoreye muri gereza.

Mu Ukwakira 2020 ni bwo Tom Byabagamba yatangiye kuburana mu mizi. Urubanza rwabaye rumaze gusubikwa inshuro enye mu bihe bitandukanye biturutse kuri Byabagamba ubwe n’abamwunganira mu mategeko.

Mu mpera z’Ugushyingo 2020 yakatiwe igifungo cy’imyaka itatu ku cyaha cy’ubujura bwa telefone n’indahuzo yayo ariko aburana ahakana avuga ko atari umuntu wo kwiba telefone.

Nyuma yo gukatirwa yahise ajururira mu Rwisumbuye rwa Nyarugenge.Ubwo yatangiraga kuburana ubujurire bwe ku wa 28 Mata 2021 yasabye urukiko gusaba ubushinjacyaha kwerekana uwo yibye iyo telefone aho gushinjwa ibintu bitabayeho.

Tom Byabagamba yahoze ari Colonel mu ngabo z’u Rwanda aho yari akuriye umutwe urinda Umukuru w’Igihugu imyaka isaga 20 nkuko yabyivugiye ari kuburana ubujurire mu Rukiko Rukuru.

Mu 2016 Urukiko Rukuru rwa Gisirikare rwamukatiye imyaka 21 ashinjwa ibyaha birimo kwangisha abaturage ubutegetsi buriho, gushaka kugirira nabi Umukuru w’Igihugu no gusuzugura Ibendera ry’igihugu ubwo yari mu butumwa bw’akazi muri Sudan y’Epfo.

Yajuriye muri 2019 akatirwa igihano cy’igifungo cy’ imyaka 15 yamburwa impeza zose za gisirikare.Amaze imyaka irindwi afunzwe kuko yatawe muri yombi bwa mbere muri 2014.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .