Tanzania: Umuganga watangaje ko hadutse indwara idasanzwe yasabiwe kwirukanwa

Yanditswe na Akayezu Jean de Dieu
Kuya 8 Gashyantare 2021 saa 11:02
Yasuwe :
0 0

Minisitiri w’Ubuzima muri Tanzania, Dr Dorothy Gwajima yategetse ko inzego zibishinzwe zihagarika mu kazi umuyobozi w’ishami rishinzwe ubuzima mu karere ka Chunya, Dr Felista Kisandu uherutse gutangaza ko muri iki gihugu hadutse indwara idasanzwe yica abantu baruka amaraso.

Ku wa 6 Gashyantare 2021 nibwo Dr Kisandu, na bamwe mu banyepolitiki bo muri aka Karere ka Chunya batangaje ko hagaragaye indwara idasanzwe imaze guhitana abantu 10, aho bari gufatwa mu buryo budasanzwe bakaruka amaraso bakagera ubwo bitaba Imana.

Amakuru avuga ko Dr Kisandu yavuze ko ari icyorezo gishya cyavutse ndetse ko hari itsinda ry’inzobere mu buvuzi ryatangiye gukora iperereza kuri iyi ndwara.

Minisitiri w’Ubuzima, Dr Gwajima ku Cyumweru tariki 7 Gashyantare, yavuze ko ibyakozwe na Dr Kisandu agatangaza ko hagaragaye icyorezo binyuranyije n’amategeko kuko ubusanzwe itegeko riha Minisitiri w’Ubuzima wenyine ububasha bwo kubitangaza.

Itangazo yashyize hanze rigira riti “Kubera guteza ubwoba butari ngombwa mu baturage, ntegetse ko umukoresha wa Dr Felista Kisandu, amuhagarika kugira ngo hakorwe iperereza.”

Ikinyamakuru The Citizen cyatangaje ko abari gukora iperereza ari Inama y’Ubuvuzi muri icyo gihugu kandi bagomba gushyikiriza raporo Minisitiri w’Ubuzima bitarenze iminsi 10.

Minisitiri Dr Gwajima yahakanye ko muri Chunya hari icyorezo kandi asaba inzego zibishinzwe n’ibigo by’itangazamakuru kuba abanyamwuga mu gukusanya amakuru no kuyatangaza.

Minisitiriw’Ubuzima muri Tanzania, Dr Dorothy Gwajima yasabiye umuganga uherutse gutangaza indwara idasanzwe muri Chunya kwirukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .