Nyamasheke: Batewe impungenge n’Abanye-Congo barema Isoko rya Rugari batipimishije COVID-19

Yanditswe na Sitio Ndoli
Kuya 11 Gashyantare 2021 saa 06:58
Yasuwe :
0 0

Abarema Isoko rya Rugari riherereye mu Murenge wa Macuba mu Karere ka Nyamasheke bahangayikishijwe n’abacuruzi bo muri Repubulika Iharanira Demokarasi ya Congo barirema ariko batabanje kwipimisha COVID-19.

Iyo ugeze ku nkengero z’Ikiyaga cya Kivu hafi y’Isoko rya Rugari, uhasanga abantu benshi bicaye mu bwato ariko batinjiye mu isoko rirangurirwamo amatungo.

Amakuru IGIHE yamenye ni uko benshi muri abo Banye-Congo batinya kwinjira mu isoko banga gutanga ikiguzi cyo kwipimisha icyorezo cya COVID-19.

Abacuruzi b’amatungo mu Isoko rya Rugari batashatse ko amazina yabo atangazwa bagaragaje ko bahangayikishijwe n’icyo kibazo kuko gishobora kuba intandaro yo kwanduzanya icyorezo.

Umwe muri bo yagize ati “Bariya ni Abanye-Congo baba badashaka kwipimisha Coronavirus, baguma bicaye hariya mpaka isoko riremuye bakabashyira inka bakigendera. Urumva ko biteye impungenge kuba banga kwipimisha ariko si bose hari ababyemera.”

Undi mucuruzi yagize ati “Urareba baba banze kwipimisha ariko hari n’ushobora guca mu rihumye akaza hano agakwirakwiza icyorezo. Nubwo nta we uba uzi niba akirwaye ariko abayobozi bakora ubukangurambaga kuri bo bakabasha kujya bipimisha.”

Umuyobozi w’Akarere ka Nyamasheke, Mukamasabo Applonie, yavuze ko hari bamwe mu baturuka muri RDC batipimisha ariko ngo baba bacungiwe hafi ku buryo bativanga n’abandi.

Yakomeje ati “Uwinjiye wese aba agomba gupimwa, Abanye-Congo baduhahira bamaze kubimenyera ariko hari igihe biba ko hari abaza batiteguye badafite ayo mafaranga, abo ntidutuma binjira mu gihugu cyacu. Ndagira ngo mare impungenge abaturage kuko inzego zose dukorana tuba duhari kandi icyo tuba tureba ni ugukumira icyorezo muri ririya soko.”

Isoko rya Rugari riremwa n’abantu batandukanye biganjemo abaturuka muri RDC, ryinjiza arenga gato miliyoni 1 Frw y’umusoro buri uko riremye.

Abacururiza muri iri soko basaba ko hakorwa ubukangurambaga Abanye-Congo bakajya bipimisha COVID-19 kuko ari abacuruzi bakomeye batabura amafaranga 5000 Frw bitangwa buri byumweru bibiri byo kwisuzumisha.

Isoko rya Rugari riremwa n'abaturuka muri RDC benshi baje kurangura amatungo yiganjemo inka n'ingurube
Abanze gupimwa COVID-19 basigara mu bwato no hirya ku nkombe ku buryo ntawe ubegera
Abemeye kwishyura barapimwa bagatanga 5000 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .