Minisiteri y’ubucuruzi n’inganda (MINICOM) mu mugoroba wo kuri uyu wa 10 Gicurasi 2013, yibutse abari abakozi bayo 27 bishwe mu gihe cya Jenoside yakorewe Abatutsi mu 1994.

Hagendewe ku nsanganyamatsiko y’uyu mwaka igira iti “Twibuke abacu bazize Jenoside yakorewe Abatutsi duharanira kwigira”, ubutumwa bwatanzwe muri uyu mugoroba bukubiye mu gusubiza abarokotse Jenoside icyizere cyo kwigira bitari ku mafaranga gusa, ahubwo no ku muco wo kubana neza n’abandi.

Minisitiri w’ubucuruzi n’inganda Francois Kanimba yatangarije abari bitabiriye igikorwa cyo kwibuka ko Abanyarwanda bakwiriye guha Jenoside uburemere ikwiriye kugira ngo aya marorerwa atazasubira.

Kanimba agira ati “Imbuto mbi yarabibwe inuhirwa mu gihugu cyacu n’ubuyioobozi bubi; ubu dufite amahirwe kuko turi mu mucyo ushingiye ku miyoborere yamagana icyo ari cyo cyose gishobora kugarura amacakubiri mu banyarwanda.”

Bamwe mu bahagarariye imiryango ya ziriya nzirakarengane batangaje ko kwibuka bigomba kujyana no guhangana n’ibibazo byose bituruka ku ngaruka za Jenoside n’icyashobora gusubiza u Rwanda habi.

Lilian, ku ruhande rw’umwe mu bakozi ba MINICOM bishwe, yahereye aho ashishikariza urubyiruko kudaheranwa n’agahinda batewe n’ubupfubyi, ahubwo bakagera ikirenge mu cy’ababyeyi babo bahoraga babatoza umurimo no gukunda ishuri.

Emmanuel Hategeka, Umunyamabanga uhoraho muri MINICOM yatangaje ko hagikusanywa amakuru ku bataramenyekana bari abakozi muri iyi Minisiteri bishwe muri Jenoside yakorewe Abatutsi, kugira ngo na bo bashyirwe ku rutonde rw’abibukwa mu buryo bukwiriye.

Nyuma y’umugoroba wo kwibuka kuri Minisiteri igikorwa kirakomeje. MINICOM irasura urwibitso rwa Jenoside ruri mu murenge wa Mugina ho mu karere ka Kamonyi, guhera saa tatu za mugitondo.