Umuyobozi w’Urwego rushinzwe imfungwa n’Abagororwa muri Zambia yashenguwe n’amahano ya Jenoside yakorewe Abatutsi

Yanditswe na Akayezu Jean de Dieu
Kuya 27 Mata 2021 saa 07:44
Yasuwe :
0 0

Komiseri Mukuru w’Urwego Rushinzwe Imfungwa n’Abagororwa muri Zambia, Dr Chisela Chileshe uri mu ruzinduko rw’akazi mu Rwanda n’itsinda ryamuherekeje basuye Urwibutso rwa Jenoside rwa Kigali ruri ku Gisozi basobanurirwa amateka ya Jenoside yakorewe Abatutsi.

Ku mugoroba wo kuri uyu wa Mbere tariki 26 Mata 2021, nibwo Dr Chisela Chileshe n’itsinda bazanye basuye Urwibutso rwa Jenoside rwa Kigali baherekejwe n’umukozi wa RCS CSP Mugisha James

Nyuma yo gutambagizwa muri uru rwibutso bagasobanurirwa ibice birugize n’amateka yabyo by’umwihariko uko Abatutsi bagiye bicwa muri Jenoside, bunamiye inzirakarengane zihashyinguye ndetse bashyira indabo ku mva.

Komiseri Mukuru wa ZCS, Dr Chisela Chileshe, yavuze ko bitumvikana uburyo Abatutsi barenga miliyoni bishwe mu gihe cy’iminsi 100, bakicwa n’Abanyarwanda bagenzi babo.

Kuri we ngo, ibyabaye mu Rwanda ni amahano Isi yose ndetse n’Abanyarwanda aho bari hose bakwiye kujya bahora baharanira ko bitazongera kubaho ukundi.

Yagize ati “Ubutumwa natanga ni uko urwango ntacyo rumaze, amacakubiri ntacyo amaze, ivangura iryo ariryo ryose naryo ntacyo rimaze.”

Dr Chisela yaburiye abagihakana bakanapfobya Jenoside yakorewe Abatutsi by’umwihariko abayigizemo uruhare bakaba barahungiye mu mahanga, ko bakwiye kugaruka mu Rwanda bakibonera ukuri kw’ibyo basize bakoze.

Ati “Ntabwo bakwiye guhakana cyangwa gupfobya Jenoside yakorewe Abatutsi, ibyabaye mu Rwanda ni amahano, ababigizemo uruhare bakica abavandimwe babo n’inshuti zabo bakaba barahunze bakwiye kugaruka hano bakirebera ibyo basize bakoze.”

Yakomeje agira ati “Uyu munsi u Rwanda ni igihugu cyuje amahoro n’umutekano kandi kigendera ku matageko, baramutse baje bashobora gusaba imbabazi [...] kandi ndabizi ko bazihabwa cyangwa bakanahabwa ubutabera. Ibyo guhakana Jenoside yakorewe Abatutsi byo njyewe ntabwo nemeranya n’ababikora nyuma y’amateka maze kubona hano.”

Yakomeje avuga ko by’umwihariko abafunzwe bazira uruhare muri Jenoside yakorewe Abatutsi bakeneye kugororwa by’umwihariko kugira ngo ubwo bazaba barangije igifungo bazabashe gusubira mu muryango barabaye abantu bazima ari nayo mpamvu hakenewe ubufatanye hagati ya RCS na ZCS mu gusangizanya ubumenyi bwo gukora ibikenewe.

Dr Chisela yashimye ubuyobozi bw’u Rwanda buyobowe na Perezida Kagame uko bwongeye kunga Abanyarwanda no kongera kubaka igihugu cyari cyarashenywe muri Jenoside yakorewe Abatutsi.

Komiseri Mukuru wa ZCS, Dr Chisela Chileshe, n’itsinda bazanye bari mu ruzinduko rw’iminsi irindwi mu Rwanda aho bari mu bikorwa byo gusangizanya ubumenyi n’ubushobozi hagati y’uru rwego rwo muri Zambia na RCS yo mu Rwanda.

Komiseri Mukuru w’Urwego Rushinzwe Imfungwa n’Abagororwa muri Zambia, Dr Chisela Chileshe, ubwo yunamiraga inzirakarengane zazize Jenoside yakorewe Abatutsi
Dr Chisela Chileshe yeretswe amateka yagejeje u Rwanda kuri Jenoside yakorewe Abatutsi
Dr Chisela Chileshe n'abari bamuherekeje babanje kwerekwa filime mbarankuru y'uburyo Jenoside yateguwe
Dr Chisela Chileshe yashenguwe n’ubugome bwagejeje kuri Jenoside yakorewe Abatutsi

Video: Mushimiyimana Azeem

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .