00:00:00 IGIHE NETWORK KN KINYARWANDA EN ENGLISH FR FRANCAIS

Ikirunga cya Nyiragongo cyongeye kuruka

Yanditswe na Mukwaya Olivier
Kuya 22 Gicurasi 2021 saa 07:50
Yasuwe :
0 0

Ikirunga cya Nyiragongo giherereye i Goma muri Repubulika Iharanira Demokarasi ya Congo, cyongeye kuruka nyuma y’aho ku mugoroba wo kuri uyu wa Gatandatu cyagaragaye cyaka umuriro.

Mu masaha y’umugoroba wo kuri uyu wa Gatandatu mu kirere cy’ahari iki kirunga mu Mujyi wa Goma hahindutse umutuku, hatangira gututumba umwotsi mwinshi cyane.

Umunyamakuru wa IGIHE uri i Rubavu, yavuze byatangiye ahagana saa moya, mu kibaya cy’ikirunga hagaragara umuriro mu gace gatuyemo abantu kitwa Kibati.

Umuyobozi w’Akarere ka Rubavu, Habyarimana Gilbert, yatangaje ko bataramenya neza ikirunga cyarutse, ati "Turacyakurikirana, ariko igisanzwe kiruka ni Nyiragongo."

Mu Mujyi wa Rubavu wegereye Goma, abaturage hafi ya bose basohotse mu nzu bahagarara hanze kubera ubwoba.

Ni mu gihe kandi mu Mujyi wa Goma umuriro w’amashanyarazi wakupwe, abantu ni urujya n’uruza bajya mu bice bitandukanye mu buryo busa no guhunga, baragenda n’amaguru banyuranyuranamo cyo kimwe na moto n’imodoka bagana mu nkengero ku ruhande rw’u Rwanda.

Umuvugizi wa Guverinoma ya RDC, Patrick Muyaya, yatangaje ko bari kugenzura imiterere y’iki kibazo, asaba abaturage gutuza.

Ati “ Guverinoma iri kugenzura uko byifashe i Goma by’umwihariko ibijyanye n’ikirunga cya Nyiragongo. Abayobozi baho bari kubikurikirana bafatanyije n’itsinda rishinzwe ubugenzuzi bw’Ibirunga i Goma, itangazo risobanura uko byifashe riraza gutangwa.”

Itangishaka Abdul Kalim utuye mu Kagari ka Rukoko, uri mu baturage bahunze yavuze ko bahungiye ku musozi "Kuko ibikoma by’Ikirunga ntibyazamuka umusozi."

Abaturage bari kuvuga ko "Batamenya ahantu ibikoma by’Ikirunga biri buturuke" ariyo mpamvu batangiye gutekereza uko bahunga.

Umunyamakuru wa IGIHE uri ku musozi wa Rubavu yavuze ko ari kubona amatoroshi menshi y’abantu bari ku musozi hejuru.

Umubare w’impunzi ziturutse ku ruhande rwa Congo ziri kwiyongera, abarenga 1000 bamaze kwinjira mu Rwanda.

Ikirunga cya Nyiragongo kiri ku butumburuke bwa metero 3 470, giherereye muri kilometero 20 mu Majyaruguru y’Umujyi wa Goma. Ni kimwe mu birunga bikiruka ku Isi ndetse gifatwa nka kimwe mu bifite ubukana bukomeye.

Cyaherukaga kuruka muri Mutarama 2002, icyo gihe cyahitanye abantu 250, cyangiza ibikorwa remezo byinshi birimo inzu n’imihanda, mu gihe ibikoma byacyo byanagiye mu Kiyaga cya Kivu.

Ubwo Nyiragongo iheruka kuruka, ibikoma byayo byangije 30% by’Umujyi wa Goma, byagendaga ku muvuduko wa kilometero 65 ku isaha.

Bivugwa ko nibura buri mezi atatu, iki kirunga kigaragaza ibimenyetso by’uko gishobora kuruka, rimwe na rimwe kikazamura umwotsi ubundi kigatutumba ariko ntikiruke. Byari byitezwe ko kizongera kuruka hagati ya 2024 na 2027.

Hari haratanzwe umuburo ko gishobora kuruka mu myaka ya vuba

Inyigo yari yakozwe n’Ikigo cy’Ubushakashatsi ku Birunga, Goma Volcano Observatory, muri Nzeri 2020 yari yerekanye ko Nyiragongo ishobora kongera kuruka hagati y’imyaka ine n’irindwi iri imbere.

Hari hagaragajwe ko iryo ruka niriramuka ribayeho rizagira ingaruka ku bantu barenga miliyoni ebyiri batuye mu nkengero z’icyo kirunga cyane cyane mu Mujyi wa Goma n’uwa Rubavu mu Rwanda.

Icyo kigo cyavuze ko ubwiyongere bw’abaturage muri Goma bwatumye bamwe batura bitegeye inzira zanyuramo ibyo ikirunga cyaruka , ibintu birushaho gushyira ubuzima bwabo mu kaga.

Ubwo giheruka kuruka mu 2002, cyangije byinshi ku ruhande rwa RDC ndetse n’u Rwanda. Icyo gihe u Rwanda rwakiriye impunzi z’Abanye-Congo zigera ku bihumbi 400.

Nyuma y’iyo nyigo kandi muri Werurwe 2021, Reuters yasuye abashakashatsi barebera hafi ibya Nyiragongo bayibwira ko iri kugaragaza ibimenyetso by’uko ishobora kongera kuruka mu myaka mike iri imbere.

Ibimenyetso by’imitingito n’ubushyuhe ni byo cyagaragazaga icyo gihe. Inyigo yashyizwe ahagaragara muri Kanama 2020, yagaragaje ko icyo kirunga ari cyo gihangayikishije cyane ku Isi ndetse ko hagati ya 2024 na 2027 gishobora kongera kuruka.

Nta muntu wari witeze ko mu 2021 ari bwo cyaruka.

Ku rundi ruhande, hanagaragajwe impungenge ko iruka ryacyo rishobora guhitana ubuzima bwa benshi, bitewe n’uko abo bashakashatsi badafite amikoro ahagije yo guhozaho ijisho bakamenyekanisha impinduka zabaye umunsi ku munsi, kuko inkunga baterwaga na Banki y’Isi yahagaritswe bitewe no kunyerezwa na bamwe mu bo yanyuraga mu maboko.

Umwe muri abo babirebera hafi, Honore Ciraba, yagize ati “Nitudafata ibipimo bihoraho ngo tumenyekanishe iruka hakiri kare, abahaturiye ntibazabona igihe cyo kwimuka. Ubwo rero bazahasiga ubuzima.”

Abaturage bari guhunga kubera ubwoba bw'ikirunga
Abaturage bari kwiruka bahunga nyuma y'uko ikirunga gituritse
Abaturage bari kugana mu Musozi uzwi nka Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .