00:00:00 IGIHE NETWORK KN KINYARWANDA EN ENGLISH FR FRANCAIS

IGP Dan Munyuza yitabiriye inama ya EAPCCO iri kubera i Kinshasa

Yanditswe na IGIHE
Kuya 14 Ukwakira 2021 saa 11:11
Yasuwe :
0 0

Umuyobozi Mukuru wa Polisi y’u Rwanda, IGP Dan Munyuza, kuri uyu wa Kane, tariki ya 14 Ukwakira 2021, yitabiriye Inama ihuza Abayobozi ba Polisi bo mu bihugu byo mu Muryango w’Iburasirazuba (EAPCCO).

Iyi nama iri mu rwego rw’inama rusange ngarukamwaka, iri kuba ku nshuro ya 23; yateraniye mu Mujyi wa Kinshasa muri Repubulika Iharanira Demokarasi ya Congo.

Ni inama ifite insanganyamatsiko igira iti "Kongera inzego zishinzwe umutekano uburyo bwo kurwanya ibyaha byambukiranya imipaka muri ibi bihe by’icyorezo cya COVID-19 no mu bihe bisanzwe."

Umuryango wa EAPCCO ugizwe n’ibihugu 14, washinzwe mu mwaka wa 1998 hagamijwe gushimangira ubufatanye bwa Polisi zo mu Karere, guhanahana amakuru ku byaha no guhuza amategeko hagamijwe kongerera ubushobozi inzego z’umutekano mu kurwanya ibyaha byambukiranya imipaka.

Muri iyi nama y’abayobozi bakuru ba Polisi mu Karere haganiriwe ku ngamba zo kongerera ubushobozi n’ubufatanye mu kurwanya ibyaha byambukiranya imipaka, harimo iterabwoba n’ubuhezanguni birimo kugaragara mu Karere, ndetse banagarutse ku ishyirwa mu bikorwa ry’imyanzuro iherutse kwemeranywaho.

Muri iyi nama hanarebewe hamwe imiterere y’ikigo cyo mu Karere cyo kurwanya iterabwoba nk’uko byemeranyijweho mu masezerano ya Mifugo.

Amasezerano ya Mifugo agaragaza uburyo bwo gukumira, kurwanya no guhashya ibyaha bigaragara mu Burasirazuba bwa Afurika.

Ibihugu bigize Umuryango wa EAPCCO ni u Rwanda, Burundi, Comoros, Repubulika Iharanira Demokarasi ya Congo, Djibouti, Eritrea, Ethiopia, Seychelles, Somalia, Sudani y’Epfo, Uganda, Sudani na Tanzania.

Umuyobozi Mukuru wa Polisi y’u Rwanda, IGP Dan Munyuza, yitabiriye Inama ihuza Abayobozi ba Polisi bo mu bihugu byo mu Muryango w’Iburasirazuba (EAPCCO)
Iyi nama iri kubera mu Mujyi wa Kinshasa muri Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .