Hotel zirenga ijana zigiye gutezwa cyamunara

Yanditswe na Philbert Girinema
Kuya 6 Nzeri 2015 saa 01:58
Yasuwe :
0 0

Ihuriro ry’amahoteli mu Rwanda rivuga ko amahoteli aciriritse arenga ijana ashobora gutezwa cyamunara nyuma yo kunanirwa kwishyura inguzanyo zatumye yubakwa.
Amwe muri ayo mahoteli arimo Eldorado, Alpha Palace, Carl Hotel, Grace Apartments, Gulf Hotel, Eden Hill Hotel, Karisimbi Hotel na Sinai Suites.

Ihuriro rya ba Nyir’amahoteli aciriritse mu Rwanda,Rwanda Hotel Group rivuga ko Leta yakoresheje ingufu nyinshi mu gushishikariza abashoramari kubaka amahoteli menshi yo kwakira abantu mu gihugu, ariko ngo ntibarabona inyungu.

Sylvester Mupenda uyobora iryo huriro yavuze kuva mu 2007 kugeza mu 2013 bari bamaze kugera ku byumba 6,500 bivuye kuri 300.

Yakomeje agira ati “Benshi muri twe batse inguzanyo za banki. Nyuma yo kubaka amahoteli, ntabwo turi kubona abo zakira. Amahoteli yacu ubu ari gutezwa cyamunara n’ amabanki ku giciro gito cyane.”

Mupenda nawe ubwe ufite hotel Eldorado i Nyarutarama nayo igomba gutezwa cyamunara ngo yishyure miliyoni 260 ariho n’ inyungu, avuga ko kutishyura hari aho byashingiye ku nyungu bakwa n’ amabanki iri hejuru, hagati ya 18 na 25 ku ijana, n’igihe gito bahabwa cyo kwishyura kiri hagati y’imyaka irindwi n’icumi.

Yakomeje agira ati “Ikibazo kandi gishingiye ku ikoreshwa riri hasi cyane ry’amahoteli yacu, riri hagati ya 1 na 5 ku ijana, bityo bikagorana kwishyura inguzanyo.”

Alex Bayingana nyiri Alpha Palace Hotel nayo iri ku isoko we yabwiye Rwanda Today ati ati “Nta bakiriya tukibona. Guverinoma iraza ikatubwira ngo twitegure igiye kuzana abashyitsi mu nama. Iranaza igashyira ibiro byayo hano. Turatereza ariko bikarangira nta mukiriya tubonye.”

Batabaje inzego zinyuranye za leta

Umuyobozi w’ iri huriro ry’amahoteli, Sylvester Mupenda, avuga ko batakiye inzego zinyuranye za Leta zirimo Ikigo cy’Igihugu cy’ Iterambere, RDB, ariko ngo ntacyo bitanga.

Yakomeje agira ati “Twanandikiye Perezida, tunamugaragariza icyo dutekereza ko cyakorwa kugira ngo ibi bibazo bitazongera kubaho mu gihe kizaza.”
Bimwe mu byo bamusabye harimo ko banki zajya zibaha nibura umwaka wo kugerageza mbere y’uko batangira kwakwa inyungu, kugira ngo bagire igihe cyo gushyira hamwe ubushobozi mu bijyanye n’ubukungu.

RDB ivuga ko hagati ya 2013 na 2014 umubare wa ba mukerarugendo wiyongereyeho 3 ku ijana,bava kuri miliyoni 1.14 bagera kuri 1.2, inyungu y’ubukerarugendo iva kuri miliyoni 293.4 z’ amadolari ya Amerika igera kuri miliyoni 303 muri 2014.

RDB kandi ivuga ko inama n’ ibindi bikorwa binyuranye byinjirije u Rwanda miliyoni 50 z’ amadolari ya amerika mu mwaka ushize, akazagera kuri miliyoni 150 z’ amadolari uyu mwaka.
Umuyobozi ushizwe ubukerarugendo muri RDB, Faustin Karasira, yavuze ko azakurikirana icyo kibazo, ariko ngo n’ubwo hashobora kuba harimo imbogamizi, amwe mu mahoteli ari guhura n’ ibibazo kuko atujuje ibyangombwa bisabwa.

Mu bibazo byugarije aya mahoteli, harimo inzu zo kuraramo zizwi nk’ama lodges na guest houses, byubatswe impande z’ayo kandi bikishyuza make kurusha hotel, ugasanga nibyo abantu bagana cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza