Urwibutso rwa Mutete ruherereye mu Murenge wa Mutete mu Ntara y’Amajyaruguru rushyinguyemo imibiri y’abagera ku 1064 bishwe muri Jenoside yakorewe Abatutsi muri Mata 1994.

Mu cyumweru cyo kwibuka, ubwo abarokokeye muri uyu Murenge bunamiraga abahiciwe muri Jenoside, hagaragajwe ikibazo cy’urwibutso rwangiritse ku buryo iyo imvura iguye igera ku mva, ibintu bishobora kwangiza imibiri ihashyinguye.

Umuyobozi w’Akarere ka Gicumbi, Mudaheranwa Juvénal, yagarutse ku bwicanyi ndengakamere bwabereye mu Murenge wa Mutete, aboneraho gukomeza ababuze ababo.

Ati “Abafite ababo bashyinguye muri uru rwibutso nabizeza ko mu bikorwa ubuyobozi bwashyizeho umutima gusana urwibutso rwa Mutete biri ku isonga.”

Mu Murenge wa Mutete habaye ubwicanyi bw’indengakamere bwakozwe n’izari ingabo zo ku bwa Habyarimana zifatanyije n’interahamwe.

Mudaheranwa yagize ati “Abari abasirikare bo ku ngoma ya Habyarimana banyuze muri aka gace ubwo bahungaga bamaze gutsindwa n’Inkotanyi. Bahise biyunga n’interahamwe zahabarizwaga maze bica Abatutsi barabatsemba bahereye impande zose.”

Urwibutso rwa Mutete rushyinguyemo imibiri y’Abatutsi 1064, biciwe mu Murenge wa Mutete no mu nkengero zawo.

Umuyobozi w’Akarere ka Gicumbi, Mudaheranwa Juvénal, yatangaje ko uru rwibutso rugiye gusanwa byihuse

Abaturage bo mu Murenge wa Mutete ubwo bibukaga abahiciwe bashyinguye mu Rwibutso rwa Mutete

Umuyobozi wa IBUKA mu Karere ka Gicumbi, Emeritha Nyirarukundo, yashimiye ubutwari bw'Inkotanyi zarokoye abanya-Mutete mu menyo y'Interahamwe

Urwibutso rwa Mutete rushyinguyemo imibiri y’Abatutsi 1064