Urukiko Rukuru rwa Gisirikare rwatangiye kuburanisha mu mizi Urubanza Col.Tom Byabagamba wahoze ayobora ishami ry;ingabo rishinzwe kurinda Umukuru w’Igihugu, Brig Gen (Rtd) Frank Rusagara na Sgt Kabayiza François basezerewe mu ngabo, kuri uyu wa 27 Mutarama 2015.

Abaregwa bose bitabye bari kumwe n’ababunganira, basomerwa ibyaha baregwa, byose barabihakana.

Col.Tom Byabagamba ashinjwa icyaha cyo gukwiza nkana ibihuha agomesha rubanda abangisha ubutegetsi, icyo gusebya Leta, gusuzugura ibendera ry’igihugu no guhisha nkana ibimenyetso byashoboraga gufasha kugenza icyaha gikomeye.

Brig Gen (Rtd) Frank Rusagara nawe ashinjwa icyaha cyo gukwirakwiza nkana ibihuha agomesha rubanda abangisha ubutegetsi, icyaha cyo gusebya Leta, akanashinjwa gutunga imbunda mu buryo bunyuranyije n’amategeko.

Sgt (demob) Kabayiza François we ashinjwa icyaha kimwe cyo guhisha nkana ibimenyetso byashoboraga gufasha kugenza icyaha gikomeye.

Mu gihe Ubushinjacyaha bwari bugiye guhabwa umwanya ngo butangire busobanure uburyo ibyaha byakozwe n’ibimenyetso bishingirwaho buri wese ashinjwa, uruhande rw’abaregwa ruhita rugaragaza inzitizi z’uburwayi bw’umwe muri bo, bwatumye nyuma yo kubujyaho impaka, urubanza rusubikwa.

Sgt Kabayiza François ni we wagaragaje ibimenyetso by’uburwayi, aho yagaragaraga nk’umuntu ufite intege nke, asusumira ndetse anakorora cyane, bikaba byanatumye yemererwa kuburana yicaye mu gihe bagenzi be bo bari bahagaze.

Sgt Kabayiza n’Umwunganira bavuze ko yajyanwe ku Bitaro byitiriwe Umwami Faisal acishwa mu cyuma, ariko yoherezwa no ku muganga wo ku bitaro by’i Ndera, akaba atarabona ibisubizo bya muganga.

Byumvikanyweho n’impande zombi z’ababuranyi Umucamanza yahise asubukika Urubanza, hemezwa ko ruzasubukurwa nyuma y’ibyumweru bitatu urwaye yamaze kwivuza, atangaza ko ruzaburanishwa kuwa 25 Gashyantare 2015 saa tatu.

Hagati aho, Me Gakunzi Musoni Valery wunganira Col.Byabagamba yasabye ko umukiriya we yaburana ari hanze, kuko impamvu zatangwaga n’Ubushinjacyaha mu rubanza ku ifunga n’ifungura by’agateganyo zitakiriho.

Yavuze ko kuba iperereza ryararangiye, impamvu yatangwga ko Col. Byabagamba aburanye ari hanze yakotsa igitutu abatangabuhamya, nta shingiro bigifite, kuko dosiye yamaze gushyikirizwa Urukiko, kandi aho atuye mu Karere ka Gasabo, Ubushinjacyaha bukaba buhazi.

Ibyo kuba yacika ubutabera, Me Gakunzi yavuze ko umukiriya we afite ubushake bwo kuburana, igihe cyose ubutabera bwamukenera bwamubona.

Brig Gen Rusagara yatawe muri yombi kuwa 18 Kanama 2014, Col Tom Byabagamba afatwa kuwa 23 Kanama 2014, n’aho Sgt Kabayiza afatwa kuwa 24 Kanama 2014.

[email protected]