Amahirwe ku banyarwandakazi bashaka kwitabira amarushanwa akomeye mpuzamahanga y’ubwiza

Yanditswe na Uwiduhaye Theos
Kuya 25 Werurwe 2021 saa 02:18
Yasuwe :
0 0

Ikigo cya Embrace Africa cyamaze gutera imboni ubwiza bw’abanyarwandakazi, cyatangaje ko kigiye guha amahirwe abakobwa batatu yo kwitabira amarushanwa y’ubwiza akomeye.

Umunyarwandakazi Ndekwe Paulette wabaye igisonga cya kane cya Miss Global World mu 2020 uri mu bahagarariye sosiyete ya Embrace Africa mu Rwanda yabwiye IGIHE ko ubundi bateganyaga ko hazatoranywa umukobwa umwe wari guhagararira u Rwanda muri Miss Tourism Global ariko nyuma bagahitamo gutoranya n’abandi.

Ni muri urwo rwego Miss Tourism Global Rwanda yahinduriwe izina kugira ngo ibashe guha amahirwe abakobwa benshi b’u Rwanda. Ubu iryo rushanwa rikaba ryitwa Miss Global Beauty Rwanda.

Ati “Irushanwa rya Miss Tourism Global Rwanda ryari rifite ubushobozi bwo gufata umukobwa umwe gusa mu guhagararira igihugu cy’u Rwanda mu marushanwa yaryo azabera mu Bushinwa. Naho irushanwa rya Miss Global Beauty Rwanda kuri ubu rizohereza abakobwa batatu mu marushanwa y’ubwiza azabera hirya no hino ku Isi. Umubare w’amarushanwa kandi ukaba ushobora kwiyongera.”

Yavuze ko nyuma yo kugirana ibiganiro na bagenzi be, basanze bakwiriye guha amahirwe abakobwa benshi bagahagararira u Rwanda mu marushanwa akomeye.

Ati “Twasanze ko dukwiye guha amahirwe abakobwa b’abanyarwandakazi benshi yo kujya guhagararira igihugu cy’u Rwanda mu marushanwa mpuzamahanga y’ubwiza. Ni yo mpamvu irushanwa twari dutangiranye ryari rigamije gufata umukobwa umwe wahagararira igihugu, twarihinduye izina kuko twiteguye kohereza abakobwa barenze umwe mu marushanwa y’ubwiza ku migabane yose y’isi kandi tukabikora mu gihe kimwe.”

Buri mwaka hazajya hatoranywa abakobwa b’abanyarwandakazi bujuje ibisabwa bakajya guhagararira igihugu cyacu mu marushanwa y’ubwiza hirya no hino ku isi.

Ndekwe ati “Mu cyiciro kibanza tuzohereza abakobwa batatu kuko ni yo marushanwa turimo gukorana nayo kugeza ubu, ariko uwo mubare ukaba ushobora kwiyongera mu myaka iri imbere.”

Kuri ubu abazahagararira u Rwanda bazajya mu marushanwa y’ubwiza arimo Miss Tourism Global rizabera mu Bushimwa, Miss Africa Golden rizabera muri Turikiya ndetse na Miss Culture International rizabera muri Afurika y’Epfo.

Kimwe mu bisabwa ku mukobwa ushaka kwitabira aturutse mu Rwanda harimo kuba afite imyaka iri hagati ya 18 na 25, kandi akaba afite ubwenegihugu bw’u Rwanda, akaba anafite uburebure bwa 1.64.

Umukobwa asabwa kandi kohereza amafoto atatu ye ahabugenewe ku rubuga rwa Embrace Africa, ayo mafoto akayandikaho amazina ye yose kandi akaba ari meza. Ikindi akaba atarengeje ibilo 80.

Miss Tourism Global izaba muri Nzeri uyu mwaka, Miss Africa Golden ibe hagati ya Ukwakira na Ugushyingo mu gihe Miss Culture International yo igihe izabera kitaramenyakana neza ariko nayo ni mu mpera z’uyu mwaka.

Abashaka kwiyandikisha bifashisha urubuga rwa Instagram rwa Embrace Africa, urwa Miss Global Beauty Rwanda cyangwa ugakanda hano

Umunyarwandakazi Ndekwe Paulette wabaye igisonga cya kane cya Miss Global World 2020 ari mu bahagarariye sosiyete ya Embrace Africa mu Rwanda
Abakobwa b'abanyarwandakazi bahawe amahirwe yo kwitabira amarushanwa akomeye mpuzamahanga y’ubwiza
Ingengabihe y'iri rushanwa uyu mwaka ni uku imeze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .