Abagendana amafaranga y’umurengera bazajya bakurikiranwa

Polisi y’igihugu iratangaza ko yatangiye gukurikirana abantu bagendana amafaranga y’umurengera mu ngendo zabo, mu rwego rwo kurwanya icyaha cy’iyezandonke (money Laundering).

Ishami rishinzwe gukora iperereza ku mari (Financial investigative Unit) muri Polisi y’igihugu, rivuga ko n’ubwo rikora igenzura ry’abantu bitwaza amafaranga menshi mu ngendo zabo ; nta burenganzira rirahabwa bwo kugira icyo ribikoraho kuko nta ngano y’amafaranga irashyirwaho.

Amakuru dukesha Ikinyamakuru Izuba rirashe avuga ko Umuyobozi Mukuru w’Agateganyo w’Ishami rya FIU Supt. Kamali Theophilos yagize ati “Twatangiye gukurikirana abagendana amafaranga, ariko bigarukira ku kumenya ayo bitwaje gusa kuko hatariho amafaranga runaka yagenwe umuntu atagomba kurenza iyo agiye mu rugendo.”

Supt. Kamali yongeraho ko Inama Nkuru y’Iperereza ku byaha by’amafaranga itaragena ingano y’amafaranga umuntu adakwiye kurenza mu rugendo, kuko hakigishwa inama (consultations) izindi nzego, ariko bitabuza urwego akuriye kumenya amakuru ya ngombwa.

Supt. Kamali ,ati “Biradufasha kumenya uburemere bw’ikibazo gihari, kandi iyo dukeka ko umuntu atwaye amafaranga menshi arakemangwa, turamuhagarika ibindi bikazakomeza nyuma tumaze kumenya aho amafaranga ayakuye n’aho ayajyanye. Hari n’igihe tumusaba kuyanyuza muri banki, akazamusanga aho agiye.”

Mu mwaka wa 2008 ni bwo hashyizweho itegeko n° 47/2008 ryo ku wa cyenda Nzeri 2008, rikumira kandi rihana iyezandonke no gutera inkunga iterabwoba.

Iri tegeko rigamije gukumira, gutahura, kurwanya no guca ikoreshwa ry’ibigo by’imari cyangwa izindi nzego z’ubukungu hagambiriwe iyezandonke no kurwanya iterankunga ry’ibikorwa by’iterabwoba, byaba bifitanye cyangwa bidafitanye isano n’iyezandonke.

Nibura buri kwezi ku kibuga cy’indege i Kanombe hashobora kunyura amafaranga [abantu bitwaje mu mifuka] ari hagati y’ibihumbi magana cyenda na miliyoni y’amadolari ya Amerika.

Ishami rishinzwe iperereza ku mari muri Polisi y’igihugu (FIU) ritangaza ko kuva uyu mwaka utangiye, ukwezi kwa Mutarama 2012 hasohotse mu gihugu miliyoni imwe n’ibihumbi 300 by’amadolari, naho ukwezi kumaze gusohokamo amafaranga make ni Nzeli ahasohotse ibihumbi 799 by’amadolari ya Amerika.

Polisi ivuga ko abitwaza amafaranga mu mifuka yabo [batifashishije banki] ari abacuruzi b’Abanyarwanda bajya kurangura cyane cyane i Dubai no mu Bushinwa.

Ingingo ya karindwi y’itegeko rikumira rikanahana icyaha cy’iyezandonke no gutera inkunga umutwe w’iterabwoba, igira iti “Aba akoze icyaha cy’iyezandonke, umuntu wese usohotse cyangwa winjiye muri Repubulika y’u Rwanda atwaye amafaranga cyangwa impapuro zivunjwamo amafaranga aruta ikigero cyashyizweho n’ishami rishinzwe iperereza ku mari atarayamenyekanishije, uretse amafaranga afitiwe urupapuro rwo kubikuza rwatanzwe na banki yemewe mu Rwanda.”

Kuva iri tegeko ryajyaho mu mwaka wa 2008, iyi ngingo ntirubahirizwa nkuko Polisi ibitangaza, kuko hatarashyirwaho ingano y’amafaranga ntarengwa umuntu yitwaza atayamenyekanishije. Icyakora ishami rya Polisi rishinzwe kugenza no gukumira icyaha cy’iyezandonke ryaba ryarasabye inzego bireba ko umuntu urengeje amafaranga angana n’amadolari ibihumbi 10 ya Amerika ari we ugomba kubanza kuyamenyekanisha mbere y’uko ayitwaza.

Ntibiramenyekana igihe hazemezwa ingano y’amafaranga agomba kumenyekanishwa.

Gusa hari amakuru yemeza ko abantu batinya gukoresha inzira z’amabanki, kuko ngo zibaca amafaranga menshi ya komisiyo ahandi amabanki agatinda kubagezaho amafaranga yabo bagahitamo kuyatwara mu mifuka. Icyakora Polisi igira inama abantu kwirinda kwitwaza imirundo y’amafaranga, kuko bishobora kubatera umutekano mucye harimo no kuyibwa.