Amakuru akomeje kuvugwa i Buruseli ni uko muri RNC igice cyo mu Bubiligi, Kazungu yeguye ku mwanya w’ubuyobozi yari afite, bituma n’abandi bagenzi be bari mu nzego z’ubuyobozi zitandukanye na bo bamukurikira.

Muri abo bandi beguye harimo abahuzabikorwa bo mu mijyi nka Liege, Anvers, Charleroi na Bruxelles n’abari muri Komite nkuru nka Habimana Bonaventure na Nkubana Emmanuel.

Ibijyanye n’ukwegura kwabo, Bwana Kazungu na bagenzi be bamaze kuvugwa hejuru babishyize mu nyandiko bageneye Aboyobozi babo bakuru, ndetse batangiye kubimenyesha abanyamuryango babo babasezeraho.

Iyo nkuru yatumye ibintu bihinduka ku rwego rwo hejuru, ku buryo byatumye RNC itumiza byihutirwa inama yo kwiga icyo kibazo, ishobora kuzaba mu mpera z’iki cyumweru, kugira ngo barebe uko bagarura mu maguru mashya.

Amakuru atugeraho aravuga ko muri icyo kibazo Rudasingwa Theogene, umwe mu bayobozi 4 b’ikirenga ba RNC, yategetse ko Micombero Jean Marie ari we ugizwe umuyobozi wo gusimbura Kazungu nk’umuhuzabikorwa w’u Bubiligi.

Abo ku ruhande rwatumye Kazungu na bagenzi be begura, barimo Micombero, Alexis n’uwitwa Murayi, bakaba bashyigikiwe cyane na Musonera uba mu Bwongereza na Ngarambe Joseph wo mu Bufaransa.

Icyo bapfa ntabwo kiramenyekana neza, ngo bari bamaze iminsi itari mike barebana nabi. Muri bo kandi ngo harimo urwikekwe rwo kugambanirana no kuba haba harimo abakorana n’Ambasade y’u Rwanda mu Bubiligi, dore ko bimaze kugaragara ko hari abatavuga rumwe na Leta y’u Rwanda baba mu Bubiligi bagirana imibonano ya rwihishwa n’iyo Ambasade nk’uko biherutse kwandikwa mu nkuru yasohotse mu minsi ishize mu kinyamakuru Izuba rirashe, ko bamwe mu bayoboke ba RNC baba baratanze imisanzu rwihishwa mu kigega AgDF no kuba hari bamwe muri bo baba barahuye rwihishwa n’ Abayobozi baturutse mu Rwanda.

Kazungu nk’uko amakuru akomeje kuvugwa, we ngo aremeza ko yeguye ku mwanya yari ariho; gusezera kwe agutewe n’impamvu nyinshi, cyane cyane amatiku no kutizerana biri mu ishyaka ryabo, akaba atagishoboye gukomeza gukorana na bagenzi be bamunaniza.

Mu bo atunga agatoki bakomeje kumunaniza, harimo Alexis bakunze kwita Kanyombya, ariko cyane cyane Micombero ufitiwe icyizere gikomeye n’Abayobozi babo b’ikirenga barimo Kayumba Nyamwasa na Patrick Karegeya.

Nk’uko byakomeje kwandikwa ku mbuga z’amakuru zihuriraho abanyarwanda, uwo mwuka w’amatiku n’urwikekwe umaze iminsi unukanuka mu ishyaka ryabo, cyane cyane hagati ya Kazungu na Alexis.

Uwo mwuka ukaba warakomeje kuba mubi cyane, kugeza aho Rudasingwa we ubwe aza kugerageza gushyira ibintu ku murongo afatanyije na Musonera wo mu Bwongereza na Ngarambe wo mu Bufaransa, aho gukemura ikibazo ahubwo ngo agaragaza gufata uruhande rwo kwemeza ko Kazungu agomba kwegura agasimbuzwa Micombero.

Icyo cyemezo cyarakaje abandi banyamuryango bashyigikiye Kazungu, dore ko ari we ukunze gusabana na bo ndetse abenshi ni we wabinjije mu ishyaka.

Si abo beguye gusa kuko umwaka ushize Rukimbira Norbert wahoze mu buyobozi bwa RNC mu Bubiligi yareguye; asezera yagaragaje ko yasanze RNC ari ishyaka ritagira umurongo na gahunda politiki zihamye nk’uko yabikekaga.

Kuwa kabiri twashatse kuvugana na Kazungu atubwira mu ncamake ko ibivugwa ari byo ko tuvugana ku buryo burambuye, ariko ubwo twamushakaga kuri telefoni ye igendanwa ntitwashoboye kuvugana na we.

Turabagezaho bumwe mu butumwa bugufi bwari hagati ya Komite ya RNC mu Bubiligi n’Ubuyobozi bukuru:

Ubutumwa bwa Rudasingwa bugira buti

"Bavandimwe,

Mu rwego rwo kunoza no kuvugurura imikorere mu nzego zose z’Ihuriro (RNC) nagira ngo mbamenyeshe ibi byemezo byafashwe na Komite Executif y’Ihuriro (RNC):

1. Bwana Jean Marie Micombero agizwe Umuhuzabikorwa mu Bubiligi bwose.
2. Dr. Paul Murayi agizwe Uwungilije Umuhuzabikorwa mu Bubiligi bwose, kandi akaba n’Umuhuzabikorwa by’agateganyo mu mujyi wa Buruseli.
3. Bwana Kazungu wari Umuhuzabikorwa mu mujyi wa Buruseli agizwe Umujyanama mu Nama Nkuru y’Ihuriro (RNC).

Mu izina rya Komite Executif, no mu ryanjye bwite, mboneyeho umwanya wo kwifuriza akazi keza Bwana Jean Marie Micombero, Dr. Paulin Murayi, na Bwana Kazungu, kandi mbashimira ubwitangye bagize kandi bakomeje kugira mu guteza imbere Ihuriro(RNC).

Akazi keza. Tuzatsinda!

Amahoro y’Imana.

Theogene Rudasingwa
Umuhuzabikorwa w’Ihuriro (RNC)"

Kazungu asubiza Rudasingwa

Bwana Theogene,
Mbashimiye kuri uyu mwanya mwari mungeneye mu buyobozi bw’ihuriro RNC ariko jyewe nifuje ko mwawugenera undi muntu ubishoboye kuko gukomeza gukorera mu kajagari tukita revolution ndetse n’amatiku adafite icyo azamarira abanyarwanda ntabyo nashobora.
Nzabatera indi nkunga nzaba nshoboye.

Kazungu

Ubundi butumwa bugira buti

“MBANJE KUBASUHUZA
KU MPAMVU ZANJYE BWITE NDABAMENYESHA KO KUVA UYU MUSI MPAGARITSE ACTIVITES ZOSE NAKORAGA MURI RNC.
MURAKOZE ET BONNE CONTINUATION.
NIFUZAGA GUKORA REMISE CE DIMANCHE LE 07/10/2012

HABIMANA BONAVENTURE

Dore uko ubundi buvuga

Muraho,
Nyuma yo kunva ko komite zashyizweho nyuma y inama yabereye bruxelles zikuweho mu bintu bidasobanutse.
Jye sinjya nemera akajagari no kudakorera mu muco niyo mpamvu kuva uyu munsi mpagaritse imirimo nari niyemeje

Elhassan Hassan.B