Malawi: Abaturage bigabye mu iduka ry’Umunyarwanda ushinjwa kwica umuzamu we

Yanditswe na IGIHE
Kuya 10 Gicurasi 2018 saa 09:19
Yasuwe :
0 0

Abaturage bo mu gace ka Bolero mu Karere ka Rumphi mu Majyaruguru ya Malawi bigabye mu maduka y’abanyamahanga arimo n’iry’Umunyarwanda uhakorera ubucuruzi ushinjwa kwica umuzamu we, biba ibicuruzwa n’imitungo myinshi.

Polisi yo muri Rumphi yatangaje ko umuzamu witwa Bernard Gondwe w’imyaka 47 yaba yarishwe na Ali Hirwa w’imyaka 46 ufite inkomoko mu Rwanda.

Abaturage bangije umutungo wose wa Hirwa yari afite i Rumphi mu myigaragambyo yakozwe mu ijoro ryo ku wa Gatatu, tariki ya 9 Gicurasi 2018.

Umunyarwanda ukekwa bivugwa ko yishe umuzamu we nyuma yo kumufata yibye icupa rya litilo eshanu z’amavuta yo guteka, akamuhanisha kumusukaho amavuta ashyushye ndetse akamuniga kugeza ashizemo umwuka.

Mu gitondo cyo ku wa Kabiri, Hirwa ngo yashatse Umunya-Malawi amusaba kujugunya umurambo wa nyakwigendera awurambika hafi y’umuhanda muri Rumphi nkuko Malawi24.com yabyanditse.

Polisi yo mu gace ka Rumphi yatangaje ko umubiri watoraguwe, ugashyingurwa ku wa Gatatu, nyuma yaho abaturage bakazabiranwa n’uburakari bagashaka kwihorera.

Iri tangazo rigira riti “Batangiye basenya amaduka y’ukekwa (Hirwa) ariko byaje kuzamba abandi batangiye gusahura andi maduka arimo irya China Qui Qui, Luck n’irya Mandela.”

Polisi yahise igera ahabereye imyigaragambyo igerageza kuyihosha, abapolisi icyenda bayikomereyemo, abantu babiri mu bakekwa kuyitiza umurindi batabwa muri yombi.

Hirwa ukekwa kugira uruhare mu kwica umuzamu warindaga iduka rye yashyikirijwe inzego z’iperereza mu gihe zikomeje kugarura imwe mu mitungo yasahuwe mu maduka.

Muri Malawi hari Abanyarwanda bagera ku 9000 bahahungiye mu myaka yo hambere barimo n’abahakorera ibikorwa by’ubucuruzi.

Abaturage bo muri Malawi bigabye mu maduka y’abanyamahanga bahakorera ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .