Ni iki cyadutandukanya n’urukundo rw’Imana?

Yanditswe na Padiri Gilbert Uwizeyimana
Kuya 21 Kamena 2020 saa 08:26
Yasuwe :
0 0

Iyo witegereje neza, ibibera mu isi ya none, ubona ibintu byinshi bitera kwibaza cyane! Turi mu isi yihuta cyane muri byinshi, turi mu isi irimo byinshi by’amayobera, turi mu isi irimo byinshi byarenze ubwenge bwa muntu.

Muri urwo ruvangavange rw’ibishimisha, n’ibiteye ubwoba, ibibabaje ni iby’amayobera. Abantu bagenda bishakira ibisubizo byabafasha kurenga ibyo byose, bakabishaka ku bubi na bwiza nubwo byabasaba kurenga cyangwa kwica nkana amategeko y’Imana cyangwa ayashyizweho kubera ineza y’abantu. Nk’uko tubisanga mu gitabo cy’Abamakabe, ibyo babigereranije no guhatira abantu kurya inyama z’ingurube kandi zarabuzwaga n’amategeko(2Makabe7,1).

Twibuke ko kuva mu ntangiriro ubwo umuntu yiteshaga umubano mwiza yari afitanye n’Imana, icyaha cyahise gikwira isi, ni uko isi iba igushije ishyano guhera ubwo, amakuba, ibiza n’ibindi bizazane bigera ku kitwa icyaremwe cyose. Uko muntu azarushaho kugenda atera Imana umugongo, abatuye isi ntituzabura kugenda duhura n’ingaruka z’uko kwivumbura no kwikorera ibyo twishakiye, uko ibihe bizahora bisimburana.

Pawulo Mutagatifu ati ibi ‘twabyongeraho iki’?

Twabishaka tutabishaka, ingaruka z’imigirire n’imyitwarire mibi ya muntu zigera kandi zizakomeza kugera ku cyaremwe cyose. Abahatira abandi cyangwa bihatira ubwabo kurya kubyo bise inyama z’ingurube bazahoraho; ibintu bizayobya abantu n’ibizabagusha mu cyaha ntibizabura muri iyi si. Niyo mpamvu Pawulo ahamagarira buri wese kubibona, kubyumva kandi akabyakira ariko ntihagire na kimwe kimukura mu mubano mwiza we n’Imana.

Aradushishikariza gukomeza guhanga amaso Imana ishobora byose. Nimurebe namwe ukuntu ubutunzi burimo gutuma abantu bibagirwa Imana bakibagirwa n’abavandimwe.

Nimurebe ukuntu abantu bamaranira ikuzo n’icyubahiro nyamara tuzi neza ko ikuzo, icyubahiro ari iby’Imana !Mutagatifu Thérèse w’Umwana Yezu ati"Imbere y’Imana usumba abandi ni upfukamye". Yezu Kristu nawe yabiduhayemo urugero, ubwo yacaga bugufi akoza ibirenge by’abigishwa be kuwa kane Mutagatifu. Arongera ati: “ushaka kuba mukuru yigire umugaragu w’abandi”.

Ibyago by’amoko yose ,uburwayi budakira, inzara n’ibindi bitagira ingano hirya no hino ku isi, biteye ubwoba, birahangayikishije ku buryo hari abafashe ibyemezo byo kwigira ku Mana ivuga y’ibitangaza ibabeshya umukiro w’akanya gato, nuko bitandukanya burundu na nyagasani Imana isumba byose, umuremyi w’ijuru n’isi.

Bamwe byabateye kwishyira hejuru, abandi batera Imana n’ibyayo umugongo, nuko bihimbira Imana zindi barazisenga ndetse bagahatira n’abandi kuziyoboka no kuzisenga. Pawulo Mutagatifu we amaze kubibona, amurikiwe na Roho Mutagatifu, yateruye ashize amanga aburira abantu bo mugihe cye ndetse nabo mu gihe kizaza. Ati “niba Imana turi kumwe ninde waduhangara”?

Kuri we kubana n’Imana mu buzima bwacu, tukayizirikaho, nicyo cyadutsindira ibi byose.

Pawulo arahamya ashize amanga, ko nubwo ibyo byose biba, bikatugwirira rimwe na rimwe nta ruhare tubigizemo, Imana idukunda ihorana umugambi wo kudukiza no kuturengera, igihe cyose. Cyane cyane kubayemera n’abayikomeyeho, kandi yarabigaragaje, ubwo yatangaga Yezu kristu ngo acungure muntu.(Rom 8,32).

Ntacyo tuzayiburana, ntacyo itazadukorera nidukomeza kubana nayo, amizero yacu yose tukayashyira muri yo. Ibiteye ubwoba bizaza, ibyorezo bize, inzara, n’ibindi.

Ati“Nyamara muri ibi byose, turatsinda kakahava tubikesha uwadukunze kandi ukomeza kudukunda” (Rm8,39).

Bakristu bavandimwe, baca umugani mu kinyarwanda ngo "Uwigiza nkana arara butunda areba ikirago".

Yezu yaravuze ati “Imbuto y’ingano iyo itaguye mu gitaka ngo ihugute ikomeza kuba yonyine”.

Kuki twakwirengagiza ingero nziza z’abantu cyagwa abakurambere bacu mu kwemera babayeho mu bihe bitandukanye, bagahura na byinshi bibarenze, nyamara nti ‘bateshuke inzira nziza, yo gukomeza kubaha no kumvira Imana muri byose.’

Nk’uko tubisanga mu Ivanjili ya Yohani, Yezu Kristu aratubwira kandi atwereka ko ibitubaho byose, atari ukugira ngo bitubere impamvu yo gucumura, cyangwa guhunga Imana, ahubwo arifuza ko byatuma turushaho gukomera no kwera imbuto, mu bukristu bwacu, kandi zikagirira bose akamaro. Ati “imbuto y’ingano iyo itaguye mu gitaka ngo ihugute, ikomeza kuba yonyine” (Yoh 12, 24).

Ingero ni nyinshi, mu gitabo cy’Abamakabe batubwiye uko abavandimwe barindwi banze rwose kwica amategeko, no guhemukira Imana y’abasekuruza, maze bagahitamo gupfa bababaye ariko bafite icyizere cy’ubuzima buzahoraho.

Urundi rugero, ni urw’abavandimwe bahowe Imana i Bugande, bakemera kuzira kumvira Imana, aho kuyisuzugura no kuyisimbuza amakuzo y’isi.

Twibuke kandi tuzirikane ubutumwa bw’Umubyeyi Bikiramariya i Kibeho, yaravuze ati “Umwana wa Bikiramariya ntatana n’Umusaraba”.

Umwanzuro

None se bavandimwe, ni iki koko mubona cyadutandukanya n’Imana, n’urukundo idukunda?

Nituzirakane ko habaho ijoro hakabaho n’amanywa, tureke gushaka ko hahoraho amanywa gusa, ibihe biha ibindi; imvura iragwa, izuba rikava. Tuzirikane ko nta cyasimbura Imana, mu buzima bwa muntu.

Twihatire kubana nayo, tuvugurura amasezerano atandukanye twagiye tugirana nayo mu bwicishe bugufi, nk’uko bavuga mu Kinyarwanda ngo “uwicisha bugufi ahinga itongo ry’inkuba”.

Ibihinda, ibyorezo, ibiza, ibintu byinshi by’amayobera, bizaza kandi bigende uko byaje. Mu kinyarwanda baravuga kandi bati“agasozi kanyerera ugatega Kamena na Nyakanga”. Nti mukuke umutima uwo ni Nyagasani Yezu ubivuga, ati “nimwemere Imana nanjye munyemere”.

Dusenge: Nyagasani Yezu Kristu, Wahoraga ubwira intumwa zawe uti ‘mwigira ubwoba, ntihakagire ikibahagarika umutima kuko muri kumwe’. Uhe abatuye isi imbaraga, zo kukugarukira no kubana nawe mu buzima bwa buri munsi. Muri iyi si yuzuye byinshi bishaka kutujyana kure yawe, kuko tutari kumwe twarindagira tukayoba, kuko tutifuza ko hari na kimwe cyadutangukanya nawe, wowe ubaho ugategeka iteka ryose.
Amen.

Padiri Gilbert UWIZEYIMANA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .