00:00:00 IGIHE NETWORK KN KINYARWANDA EN ENGLISH FR FRANCAIS

Bruce Melodie yabaye umuhanzi w’Impeshyi, My Vow ya Meddy ihigika izindi muri Kiss Summer Awards (Amafoto)

Yanditswe na Uwiduhaye Theos
Kuya 24 Ukwakira 2021 saa 08:47
Yasuwe :
0 0

Nicyo gitaramo cya mbere kibaye nyuma y’igihe kinini abantu bari bamaze badahura imbonankubone ngo habe ibitaramo mu rwego rwo kwirinda Covid-19. Kuri iyi nshuro byabaye ubwo hatangwaga ibihembo bya Kiss Summer Awards bitangwa na Kiss Fm.

Byatanzwe kuri uyu wa Gatandatu tariki 23 Ukwakira 2021 muri Kigali Arena. Itangwa ry’ibi bihembo ryayobowe na Nkusi Arthur wagiye wunganirwa n’abandi banyamakuru bakorana kuri Kiss FM.

Muri ibi bihembo utunganya indirimbo w’impeshyi [Best Summer Producer] yabaye Element. Yahigitse abarimo Madebeats, Ayooo Rush, Ishimwe Clement na Bob Pro.

Yakira iki gihembo yavuze ko ashimira abantu bamubaye hafi, agaragaza ko umwaka ushize yari yabwiye abakunzi be ko uyu mwaka ariwe uzagitwara none bikaba byabaye.

Ati “Ubushize abantu barababaye cyane ndababwira ngo ubutaha hazashya. Ndashima Imana yandinze. Ndashima Imana ko nayisabye kuzatwara iki gihembo kuva umwaka ushize. Ndashimira umuryango wanjye, abahanzi ndetse n’aba-producer bagenzi banjye ndetse n’itsinda ryanjye dukorana muri Country Records. Ndashimira abanyarwanda.”

Nyuma yo guha igihembo Element, Bruce Melodie yasusurukije abari bakurikiye ibi birori aho yaririmbye indirimbo ze zirimo ‘Katapilla’ na ‘Sawa Sawa’ yakoranye na Khaligraph Jones igezweho muri iki gihe.

Hahise hakurikiraho gutangaza abahanzi bari mu cyiciro cy’umuhanzi mushya w’impeshyi (Best New Summer Artist) aho hari hahatanye abahanzi barimo Papa Cyangwe, Dorcas na Vestine, Symphony Band, Niyo Bosco na Confy.

Muri iki cyiciro uwatwaye igihembo ni Munyaneza Confiance umaze kumenyakana nka Confy.

Yakira iki gihembo, yashimiye abantu bose bamubaye hafi mu rugendo rwe rwa muzika.

Ati “Ndashima Imana icya kabiri ndashimira abafana banjye. Ndashimira mama wanjye waje hano. Ndashimira buri wese waje hano.”

Nyuma yo guhabwa iki gihembo, Confy hamwe na Gabiro Guitar baririmbye ‘Igikwe’ iri mu ndirimbo zikunzwe muri iki gihe.

Hahise hakurikiraho gutanga ibindi bihembo birimo icy’umuhanzi wakoze cyane mu mpeshyi (Best Summer Artist) aho mu bahatanye hari harimo Social Mula, Juno Kizigenza, Butera Knowless, Meddy na Bruce Melodie. Igihembo muri iki cyiciro cyahawe Bruce Melodie.

Mu ijambo rye yavuze ko iki gikombe yahawe iyo biba bishobora yari kugiha Juno Kizigenza yafashaga mu muziki.

Ati “Ndashaka gushimira abantu bose bankunda nta kindi mbaha uretse umuziki Imana yampaye ntawe uyisabye ndetse n’itsinda dukorana. Ndashimira Element, Madebeats n’abandi twakoranye. Iki gikombe ntwaye ndumva nagiha Juno Kizigenza.”

Hahise hajya ku rubyiniro Phil Peter na Social Mula baririmbana indirimbo bise ‘Amata’ bafatanyije na Symphony Band yabacurangiye.

Nyuma hatanzwe igihembo cy’uwateje umuziki nyarwanda imbere(Lifetime Achievemeent Award) akitanga uko ashoboye yaba mu bahanzi, abategura ibitaramo n’abandi batandukanye.

Igihembo nk’iki umwaka ushize cyari cyahawe Dj Miller witabye Imana. Icy’uyu mwaka cyahawe Jay Polly na we uheruka gutabaruka. Cyakiriwe na Bulldogg na Fireman babanye n’uyu muhanzi muri Tuff Gang.

Bulldog yavuze umuziki wakoze na mugenzi yizeye ko hari umusanzu watanze kandi uzakomeza gushimisha abakunzi be.

Yahise ahamagara mugenzi we Firemana na we wari witabiriye itangwa ry’ibi bihembo baririmbana indirimbo ya Jay Polly yitwa ‘Ndacyariho Ndahumeka’ na ‘Mood’ ye na B-Threy.

Ibirori byasojwe no gutanga igihembo cy’indirimbo y’impeshyi (Best Summer song), aho hari hahatanye izirimo ‘Igikwe’ ya Gabiro the Guitar na Confy, My Vow ya Meddy, Katapilla ya Bruce Melodie, Amata ya Phil Peter ft Social Mula na Away ya Ariel Wayz yafatanyijemo na Juno Kizigenza. ‘My Vow’ ya Meddy niyo yabaye iya mbere.

Mu butumwa bwatambukijwe bw’uyu muhanzi ubusanzwe uba muri Amerika, yagaragaje ko ashimira abanyarwanda bose.

Ati “Ndashimira abanyarwanda n’abandi bahanzi bitanga kugira ngo umuziki nyarwanda ukomeze kuzamuka.”

Ibi birori byashyizweho akadomo na Ariel Wayz na Juno Kizigenza baririmbye ‘Away’ baherutse guhuriramo.

Ibyamamare bitandukanye byari byabukereye mu itangwa ry'ibi bihembo
Iki nicyo gitaramo cya mbere gihuriyemo abantu benshi kuva byafungurwa
Antoinette Niyongira na Nkusi Arthur ku rubyiniro
Antoinette Niyongira avuga kuri ibi bihembo byatanzwe na radiyo akorera
Ariel Wayz ubwo yahuriraga ku rubyiniro na Juno baririmba indirimbo bahuriyemo
Bruce Melodie yabaye umuhanzi mwiza w'impeshyi
Bulldogg yongeye kwibutsa abantu Jay Polly
Dj Brianne yari yabukereye
Dj Sonia uri mu bakobwa bagezweho mu kuvanga imiziki uri hagati yari yabukereye
Element yatowe nka producer mwiza
Fireman yahawe umwanya ubwo we na Bulldogg bajyaga kwakira igihembo cyahawe Jay Polly
Gabiro Guitar yaririmbye Igikwe, imwe mu ndirimbo ziri guca ibintu
Ibi bihembo ni ubwa mbere byatanzwe hari imbaga
Abanyabirori bari babukereye cyane muri ibi birori ngarukamwaka
Japhet na Etienne 5K bazwi muri bigomba guhinduka bari babukereye
Juno Kizigenza yahawe umwanya we na Ariel Wayz baririmba Away bahuriyemo
Social Mula yaririmbiye abaje muri ibi bihembo
Melodie yataramiye abari muri ibi birori
Munyaneza Confiance umaze kumenyakana nka Confy yegukanye igihembo cy'umuhanzi mushya mwiza
Muri Kigali Arena ntabwo hari abantu benshi ugereranyije n'uko intebe zimwe zari zambaye ubusa
Nkusi Arthur wamenyekanye nka Rutura niwe wayoboye ibi birori
Umunyamakurukazi Cyuzuzo Jeanne d'Arc na Nkusi Arthur uzwi nka Rutura banakorana bari ku rubyiniro

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .