Akigera i Kigali Professor Hamo yavuze ko yishimiye kuba agiye gutaramira mu Rwanda, ko yagerageje kuhagera mbere ngo abanze atembere Umujyi wa Kigali wirahirwa na benshi.

Ati “Ni ubwa mbere nje gutaramira mu Rwanda, Umujyi wa Kigali twese tuwufiteho amakuru atera amatsiko utarahatemberera, ni yo mpamvu nje mbere. Ikiruta ibindi abazitabira igitaramo natumiwemo mbijeje kuzaryoherwa bikomeye.”

Professor Hamo ni umwe mu banyarwenya bazamuriye izina rye mu bitaramo Churchill, akaba umuhanzi n’umunyamakuru.

Uyu munyarwenya w’imyaka 46 yavukiye mu muryango w’abasirikare ni umubyeyi w’abana batandatu.

Igitaramo Professor Hamo azaba yitabiriye cyitiriwe Muhinde, umunyarwenya wakuriye muri Gen-Z Comedy washyiriweho icy’umwihariko bamushimira kuba yarabashije kurangiza amasomo y’icyiciro cya mbere cya kaminuza.

Uretse uyu munyarwenya iki gitaramo cyatumiwemo Mike Kayihura uzaganiriza abazacyitabira ndetse n’abahanzi barimo Ish Kevin na Bushali bazabasusurutsa.

Hanatumiwe abanyarwenya biganjemo abasanzwe muri Gen-Z Comedy nka Pirate, Umushumba, Inkirigito Clement n’abandi banyuranye barimo na Babu Joe.

Mike Kayihura niwe uzaganiriza abitabiriye iki gitaramo

Bushali na Ish Kevin nibo bazasusurutsa abazitabira iki gitaramo

Iki gitaramo cyitiriwe Muhinde kuko bazaba bishimira ko yarangije icyiciro cya mbere cya Kaminuza

Professor Hamo utegerejwe mu gitaramo cya ‘Gen-Z Comedy’ yageze i Kigali yakirwa n'abanyarwenya bagenzi be barimo Fally Merci, Muhinde na Umushumba