Iyi EP igizwe n’indirimbo umunani, yakozwe abifashijwemo na Virtuosi, sosiyete yashinzwe na Derek Sano igamije gufasha abahanzi bafite impano kuziteza imbere no kubaka umwuga wabo.

Indirimbo zigize iyi EP ni ‘Mu Rukundo’ yakoranye na Magna Romeo, ‘Last Time’, ‘Intention’, ‘Burundu’, ‘Iyizire’, ‘Mine’, ‘Rimwe’ na ‘This Way’.

Mu kiganiro yagiranye na IGIHE, Derek Sano yavuze ko mbere yo guhitamo gukorana na Red Iyizire yabanje kugerageza gukorana n’abahanzikazi batandukanye, ariko aza gusanga uyu mukobwa afite umwihariko, azi icyo ashaka mu muziki kandi afite ubushake bwo gukora no gutera imbere.

Ati “Icya mbere, nifuza gutanga umusanzu wanjye mfasha abafite impano nshya mu muziki. Rero, urabona ko hakiri imbogamizi z’uko bashiki bacu ari bake mu ruganda rw’umuziki, nanjye nkaba ngiye gutanga umusanzu wanjye.”

Derek Sano yatangiye ibikorwa byo gufasha no guteza imbere izindi mpano nyuma yo kurangiza amasomo mu Ishuri ry’u Rwanda ry’Umuziki. Icyakora, ibi ntibivuze ko yahagaritse ibikorwa bye bwite by’umuziki, kuko akomeje kuba umwe mu bagize itsinda rya Active.

Yinjiye muri uru rugendo rwo guteza imbere abahanzi bashya mu gihe mugenzi we Olivis, na we ubarizwa muri Active, aherutse gutangaza ko agiye gusubukura ibikorwa byo gukora umuziki ku giti cye.

Red Iyizire yinjiye mu muziki aho agiye kujya afashwa na Derek wo muri Active

Red Iyizire yahise asohora EP y'indirimbo umunani