Uyu mukino utitabiriwe cyane wabaye ku wa Gatandatu, tariki 25 Gicurasi 2024.

Ni mukino watangiye utuje amakipe yombi atsindana amanota make bityo, agace ka mbere karangira Petro de Luanda iyoboye umukino n’amanota 16-13.

Mu gace ka kabiri, umukino watangiye kwihuta ari nako amakipe yombi yirekuraga, abarimo Nicholas Faust na Firas Lahyani batsinda amanota menshi.

Igice cya mbere cyarangiye Petro de Luanda ikomeje kuyobora umukino n’amanota 38 kuri 33 ya US Monastir.

Mu gace ka gatatu, umukino wakomeje kuryoha Lukeny Gonçalves atsindira ikipe yo muri Angola amanota menshi, ari nako George Attitebi Williams yabigenzaga kuri Monastir.

Aka gace nako karangiye Petro de Luanda ikiyoboye umukino n’amanota 54 kuri 52 ya US Monastir.

Agace ka nyuma kakinanwe ubwenge bwinshi n’imibare ku batoza bombi, iminota itanu yako ya mbere yarangiye ikipe yo muri Angola ikiyoboye umukino.

Habura iminota ibiri ngo umukino urangire, Oussama Mamaoui yatsindiye Monastir amanota atatu, amakipe yombi anganya 65-65. Carlos Morais na Chriss Crawford batsinze andi abiri, bakomeza kunganya amanota 67-67.

Ku isegonda rya nyuma, Crawford yahaye umupira Firas Lahyani atsinda amanota atatu yahaye intsinzi US Monastir n’amanota 70 kuri 67 ya Petro de Luanda yayoboye umukino wose ariko birangira iwutakaje.

Umukino wa kabiri urahuza River Hoopers yo muri Nigeria na AS Douanes yo muri Sénégal. Aya makipe yombi araziranye cyane kuko yari kumwe muri Sahara Conference yabereye i Dakar.

Lukeny Gonçalves agerageza gushaka inzira
Childe Dundao azamukana umupira
Chriss Crawford ahanganye na Dundao
Nicholas Faust atera dunk
Firas Lahyani yafashije US Monastir kwigaranzura Petro de Luanda
Chriss Crawford na Firas Lahyani bakinnye neza cyane iminota ya nyuma y'umukino

Amafoto: Nezerwa Salomon

Banner 1

Inkuru Ziheruka