Iyi mikino iteganyijwe gutangira ku wa Gatanu, tariki 24 Gicurasi 2024 muri BK Arena.

Uyu muyobozi yabigarutseho mu kiganiro n’itangazamakuru cyabaye kuri uyu wa Kane, tariki 23 Gicurasi 2024 muri BK Arena cyagarukaga ku myiteguro ndetse no gutangiza imikino ya nyuma y’iri rushanwa rigiye kubera i Kigali ku nshuro ya kane.

Ni ikiganiro cyitabiriwe n’abayobozi batandukanye barimo Amadou Gallo Fall uyobora BAL, Umuyobozi wa NBA Africa, Clare Akamanzi, Umuyobozi wa FIBA Africa, Anibal Manave ndete n’Umunyamabanga Uhoraho muri Minisiteri ya Siporo, Niyonkuru Zephanie.

Abajijwe niba nta mpugenge nk’ubuyobozi bwa BAL bufite ku bijyanye n’ubwitabire cyane ko bwa mbere mu mateka muri iyi mikino nta kipe yo mu Rwanda izaba irimo.

Amadou Gallo Fall yatangaje ko ntampugenge bafite ahubwo Abanyarwanda bamaze guhitamo andi makipe bazashyigikira.

Yagize ati “Abanyarwanda bakunda Basketball kuko n’imikino ya shampiyona yabo narebye muri Lycée de Kigali iba yuzuye. Dufite icyizere ko abafana bazaza kuko Abanyarwanda bamaze guhitamo amakipe bazashyigikira.”

Ibi kandi byashimangiwe na Clare Akamanzi umaze amezi ane ayobora NBA Africa wagize ati “Turi kubona abanyarwanda biteguye irushanwa nubwo APR BBC itabashije kugera mu mikino ya nyuma ariko tuzagira irushanwa ryiza kuko n’imikino irakomeye.”

Muri iki kiganiro, Umuyobozi wa FIBA Africa, Anibal Manave yatangaje ko bishimira kuba BAL yarafashije shampiyona z’imbere mu bihugu kuzamura urwego.

Ati “BAL yafashije shampiyona z’ibihugu kuzamura urwego kuko abakinnyi bava hanze ntabwo ariyo ikibashishikaje cyane ahubwo basigaye bemera no gukinira amakipe y’imbere mu gihugu na shampiyona z’imbere mu gihugu.”

Umunyamabanga Uhoraho muri Minisiteri ya Siporo, Niyonkuru Zephanie wari uhagarariye Minisitiri wa Siporo muri iki kiganiro, yakomoje ku nyungu u Rwanda rukura mu kwakira amarushanwa ari kuri uru rwego.

Ati “Mu mwaka ushize amarushanwa nk’aya n’ibindi bikorwa bitandukanye bya siporo byinjirije u Rwanda miliyoni 13$. Niyo mpamvu tuzakomeza gukora ibishoboka byose no kubaka ibikorwaremezo bisabwa kugira ngo ibikorwa nk’ibi bizakomeze.”

Ni ku nshuro ya kane yikurikiranya u Rwanda rugiye kwakira imikino ya nyuma ya BAL. aho bitandukanye n’imyaka itatu ishize hazabanza gukinwa imikino yo kumenya uko amakipe azakurikirana bityo habone gukorwa tombora y’uko azahura muri ¼ (Seeding games).

Umukino ufungura uteganyijwe ku wa Gatanu, tariki 24 Gicurasi ukazahuza Al Ahly (Libya) na Cape Town Tigers (Afurika y’Epfo) saa 17:00, uzakurikirwa ni uwa Al Ahly (Egypt) na FUS de Rabat (Maroc) uteganyijwe saa Mbiri z’ijoro.

Mu karuhuko k’igice cya mbere cy’umukino wa kabiri ni bwo umuhanzi Adekunle Gold azataramira abitabiriye umukino.

Iyi mikino izakomeza ku wa Gatandatu, saa 14:30, aho Petro de Luanda (Angola) izahura na US Monastir (Tunisia), mu gihe uwa nyuma uzahuza Rivers Hoopers (Nigeria) na AS Douanes (Sénégal).

Nyuma y’iyi mikino hazatondekwa uko amakipe akurikiranye ari nabwo hazamenyekana uko agomba kuzahura muri ¼, azakina akuranwamo kugeza ku mukino wa nyuma hamenyekanye iyegukana igikombe cy’uyu mwaka igasimbura Al Ahly yo mu Misiri cyangwa ikacyisubiza.

Perezida wa BAL, Amadou Gallo Fall yatangaje ko nta mpugenge z'ubwitabire bafite nubwo nta kipe yo mu Rwanda iri muri iri rushanwa
Umuyobozi wa FIBA Africa, Anibal Manave yatangaje ko bishimira kuba BAL yarafashije shampiyona z’imbere mu bihugu kuzamura urwego
Umunyamabanga Uhoraho muri Minisiteri ya Siporo, Niyonkuru Zephanie yatangaje ko umwaka ushize, ibikorwa bitandukanye bya siporo byinjirije u Rwanda miliyoni 13$
Clare Akamanzi umaze amezi ane ayobora NBA Africa ni umwe mu bitabiriye iki kiganiro
Abayobozi batandukanye bitabiriye ikiganiro n'itangazamakuru gitangiza BAL 2024
Banner 1

Inkuru Ziheruka