Maj Mudathiru yitakanye uwari ’escort’ we muri P5: Uko urubanza rwagenze

Yanditswe na Rabbi Malo Umucunguzi
Kuya 16 Nzeri 2020 saa 09:51
Yasuwe :
0 0

Kuri uyu wa Gatatu Urukiko Rukuru rwa Gisirikare rwakomeje kuburanisha dosiye iregwamo abantu 32 kuba mu mitwe y’ingabo itemewe ya P5 na FLN, barimo kwiregura umwe ku wundi. Kuri uyu wa Kabiri hari hamaze kumvwa abantu 11.

Iburanisha ryasubukuwe abaregwa bose biregura ku cyaha cyo kurema umutwe w’ingabo utemewe cyangwa kuwujyamo, ari nacyo gifatwa nk’umuzi w’ibindi baregwa birimo kugambirira kugirira nabi ubutegetsi buriho, kugirana umubano na Leta y’amahanga bigiriwe gushoza intambara, kurema umutwe w’abagizi ba nabi no gucura umugambi wo gukora icyaha cy’iterabwoba.

Harimo n’abasirikare bo hiyongeraho icyaha cyo gutoroka igisirikare, ubufatanyacyaha mu kugambirira kugirira nabi ubutegetsi buriho cyangwa kubuhirika hakoreshejwe intambara cyangwa izindi mbaraga, kurema umutwe w’abagizi ba nabi no koshya abandi kuwujyamo, no kugira uruhare mu bikorwa by’ishyirahamwe rikora iterabwoba.

UKO IBURANISHA RYAGENZE

Iburanisha rya none risojwe abantu 22 bamaze kwisobanura ku cyaha cyo kurema umutwe w’ingabo utemewe cyangwa kuwujyamo, hasigaye abantu icyenda bazakomerezwaho kuri uyu wa Kane.

3:00 Iburanisha rya none rirasubitswe, rikazakomeza kuri uyu wa Kane haburana Nsigariye Ildephonse, Ndirahira Jean de Dieu, Desiderio Fred na Pte Ruhinda utarafatwa, hamwe n’itsinda rirangajwe imbere na Pte Muhire Dieudonné, ririmo Corporal Kayiranga Viateur, Corporal Dusabimana Jean Bosco, Private Igitego Champagnat n’abasivili Muhire Pacifique na Nzafashwanimana Richard.

14:25 Ndibanje Lambert ngo yagiye muri Malawi mu 2001, ndetse ngo yigaga mu mwaka wa kabiri mu mashuri yisumbuye.

Ngo mu 2017 yahuye n’umugabo mu gihe cy’iminsi mikuru isoza umwaka, amubwira ko afite agashomeri, undi ahita amwizeza ko hari akazi k’amezi atatu ku kwezi, kazajya kamuhemba $300 ku kwezi.

Ngo bamubwiye ko ari urwuri azakoramo muri Tanzania, ariko bamusaba kubigira ibanga kuko ngo iyo ababyeyi be babimenya batagombaga gutuma ajyayo, kuko yari umunyeshuri uri mu biruhuko.

Itariki yo kugenda ngo igeze bamusabye kugenda nta n’imyenda ajyanye, ngo ntanasezere ababyeyi. Uwamujyanye ngo yahise amuha ibyangombwa biriho amazina ye n’abo bari kumwe yahinduwe, handitseho ko bagiye kurangiza ikiliyo muri RDC. Uwari ugiye muri Tanzania yakomereje mu Burundi na RDC.

Ndibanje avuga ko nta bushake yagize bwo kwinjira muri P5.

14:00 Nyuma y’akaruhuko iburanisha rirakomeje, habanje kumvwa Bihoyiki Diogene. Hakurikiyeho Ndibanje Lambert, Habarurema Jackson na Gashumba Andrew.

12:55 Me Uwera Solange wunganira abaregwa, abwiye urukiko ko bagaragaje ko bisanze muri ibi byaha nta bushake babigizemo, kuko babaga bijejwe akazi. Umwe ngo yari yabwiwe ko agiye kubaka ndetse ahaguruka yitwaje ibikoresho, undi agenda afite inzozi zo kugera muri Afurika y’Epfo, nta wigeze abwirwa ko ajyanywe mu gisirikare.

Ati “Ba nyakubahwa bacamanza, twizeye ubushishozi bw’urukiko!”

12:33 Ngiruwera Schadrack avuga ko yavuye mu Rwanda mu 2017 nyuma y’amatora ya perezida, ajya muri Uganda akora muri Volcano Express, agakora mu kinamba, ndetse ngo yavuye mu Rwanda mu buryo buzwi.

Ngo hari umuntu yogerezaga imodoka, yamuha amafaranga akamurengerazaho ayo kumugurira ‘soda’, aba ari we umujyana muri Congo amubwira ko agiye kumuha akazi muri Afurika y’Epfo, kazajya kamuhemba $500.

Ati “Ntabwo nagiye nzi ko nzatera u Rwanda.” Gusa bageze muri Congo bamwumvishije ko babaye abasirikare, ko intego ari ugutera u Rwanda bagakuraho ubutegetsi.

Mu ishyamba, ngo ababigishaga barimo ababaye muri RDF, bakababwira ko mu Rwanda nta bwisanzure buhaba ari nayo mpamvu hadashobora kuba imyigaragambyo, ndetse ngo ubwo bafataga igihugu, ibyo babemereye ntabyo babahaye, ari nayo mpamvu bashaka kurwanya ubutegetsi buriho.

12:00 Habanabakize avuga ko yakoraga akazi k’ubunyonzi mu Burundi, nyuma yo kuva mu Rwanda mu 2009. Yaje guhura n’uwitwa Nshimiyimana Eric, wamubwiye ko agiye kumurangira akazi ko gucukura amabuye y’agaciro muri Congo, aza kwinjira muri Congo muri Mata 2018.

11:26: Iburanisha rikomereje kuri Habanabakize Innocent, Ndikumana Issa na Ngiruwera Schadrack, nabo babwiye urukiko ko batemera icyaha cyo kurema umutwe w’ingabo utemewe cyangwa kuwujyamo. Bunganiwe na Me Uwera Solange.

Bemera ko babaye muri P5, ariko bagahuriza ku kuvuga ko nta bushake bagize mu kujyamo, ari nabwo umuntu aba akoze icyaha mu mategeko.

11:12 Me Mujawamariya Dative abwiye urukiko ko nubwo ruvuga ko abakiliya be ntacyo bakoze ngo bivane muri P5, batari borohewe no kwivana yo, kuko hari benshi babinaniwe. Gusa ngo kuba barajyanywe muri uyu mutwe bitari ku bushake, ahubwo bijejwe guhabwa akazi mu bindi bihugu, urukiko rwabishingiraho rukabahanaguraho iki cyaha.

10:30 Iburanisha rikomereje kuri Nsabimana Jean Marie, Nsengiyumva Janvier na Ndikurugendo Issa. Bunganiwe na Me Mujawamariya Dative.

Ndikurugendo avuga ko mbere yakoraga ibijyanye n’ubusitani i Bujumbura, aza guhura n’umuntu amubwira ko yamuboneye akazi ko kubikora muri Tanzania. Yabanje kumujyana ahantu i Bujumbura, ageze mu nzu babanza kumwogosha, ariko aza gusangamo abandi mu nzu, bituma yibaza niba abo bantu bose bagiye gukora akazi kamwe.

Ngo baje kuvanwa aho bisanga muri Bijabo mu mashyamba ya Congo.

10:23: Me Uwiragiye Tessam wunganira Mbarushimana Ildephonse, asabye urukiko ko rwazita ku kuba umukiliya we atarigeze agira ubushake bwo gukora icyaha, kuko yajyanywe muri uwo mutwe ashutswe.

Ikindi ngo kuba kuva muri uwo mutwe byaritwaga gutoroka, byasabaga kwiyemeza gupfa no gukira, kandi si benshi babasha gufata icyo cyemezo.

9:54 Mbarushimana abwiye urukiko ko atigeze yishyikiriza Monusco kuko "ntabwo nari nzi icyo Monusco imaze mu buzima bwa muntu", ahubwo ngo yabimenye amaze gufatwa.

9:45 Umushinjacyaha Capt Jacques Rugamba avuze ko abakomeje kwiregura ko babaye muri P5 ku gahato, nta shingiro bifite kuko hari abajyaga mu masoko ahitwa mu Mikarata, abashaka bagacika. Byongeye, ngo mu Minembwe aho uyu mutwe wari ukambitse habaga na Monusco, ababishakaga bayihungiragaho

Atanze urugero ku bitwa Ndayisaba, Kalisa Joseph watorotse P5 akishyikiriza Monusco kimwe na Nyirimanzi Jean Claude alias Suleiman, batorotse bakaza kugera mu Rwanda.

Ati "Abo ni abo twabashije kubona, tutigeze dufunga, bari hano mu gihugu. Hatagira n’undi wongera kubyireguza."

Avuze ko abandi bemeye gutoroka P5 bakaza mbere y’uko uwo mutwe uraswaho, bakiriwe mu Rwanda kandi batagejejwe mu rukiko kuko babisabiye imbabazi.

9:35 Mudathiru asabye ijambo avuga ko abamushinja ko yari ababangamiye bigatuma badatoroka batazi icyabazanye, ati "Njyewe ntibanyitwaze ngo bibe inyoroshyacyaha.”

Avuze ko abantu benshi babishakaga batorokaga, atanga urugero bw’uburyo yigeze kurwara akajya kwivuza mu Burundi, ko Mbarushimana yari no mu bamuherekeje anafite imbunda ya RPG.

Ati "Baramperekeje bagera kuri 40, bangeza ku mazi kuri Tanganyika, nurira ubwato bazanye Abarundi, aba bantu basubirayo, njya kwivuza. Habib niba nari ikibazo, ko ntari mpari kuki batagiye?"

Yanavuze ko aba barwanyi aribo bakoraga uburinzi n’irondo, ku buryo abari kugenda atari kubasha kubabuza, ndetse ngo hari benshi bagiye, nubwo abashoboraga gufatwa bagombaga guhanwa.

8:50 Iburanisha rihereye kuri Mbarushimana Ildephonse wunganiwe na Me Uwiragiye Tessam, uburana ahakana icyaha cyo kurema umutwe w’ingabo utemewe cyangwa kuwujyamo.

Abwiye urukiko ko yagiye muri P5 avuye mu Burundi aho yageze mu 2012 afite imyaka 15. Ngo yavuye mu Burundi mu 2018 ajya mashyamba ya RDC.

Ati “Umutwe nawubayemo ariko bitari ku bushake bwanjye, naragambaniwe.”

Avuye ko yabaga i Bujumbura acuruza butiki, ngo hari umunyarwanda wajyaga kuri butiki ye bakaganira, amubwira ko agiye kumushakira akazi ko gucuruza ifarini muri Tanzania, mu kujya kureba utanga akazi ngo aza gushyirwa mu nzu yari irinzwe n’abasirikare b’u Burundi mu mujyi wa Bujumbura, agumamo aza kuhava bajyanwa ku mupaka wa Congo, ari abantu bagera kuri 37, barinzwe n’abasirikare 12.

Bageze mu mashyamba ya Congo ngo bisanga mu gisirikare, basanga abantu babinjijemo barabashutse, ndetse n’abayobozi basanzeyo barimo Maj (Rtd) Habib Mudathiru nawe ufunzwe, ababwira ko bagomba kwiyakira.

Ati “Batubwiraga ko ngo nabo bababeshye, ngo twiyakire dukorane nabo nk’uko nabo biyakiriye, utabishoboye bamushakire abasore nka batanu bamuherekeze bamugeze iwabo.” Abo ngo bari abo kumwica.

Umucamanza amubajije inshingano yari afite muri P5, ati “Nari escort w’uyu mugabo,” atunga urutoki Mudathiru.

Umucamanza Lt Col Hategekimana abajije uburyo uyu musore yavuga ko atari akomeye ku mugambi wa P5 kandi kugira ngo ube umurinzi w’umuyobozi ugomba kuba uri umwizerwa kandi ukunda umurimo. Asubije ko hari ikibazo ko batinyaga gutoroka kuko hari umwe wabigerageje bakamwica, ndetse ngo uyu musore ni we wamuhambye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .

Article (139735) Re-process this page