Abayobozi bafite inshingano zo kuba abanyakuri n’ inyangamugayo - Jeannette Kagame

Kuri uyu wa 17 Kamena , I Kigali habereye amasengesho yateguwe na Madame Jeannette Kagame. Amasengesho yari afite insanganyamatsiko igira iti “Indangagaciro z’ubuyobozi n’umuryango”, agamije gufasha abagore bari mu nzego z’ubuyobozi hirya no hino ku isi, no guharanira indangagaciro z’umuryango.

Muri aya masengesho, Madamu Jeannette Kagame yabasabye kuba ’Inyangamugayo’ mu kubaka ubuyobozi no guteza imbere indangagaciro z’ umuryango. Yavuze ko abayobozi bagomba kugira uruhare mu guhindura imyumvire y’abantu babashishikariza ibyiza, hakabaho kubaha abandi, kuvugisha ukuri, kubwira abandi ukuri, kurangwa n’umutuzo, bagafashanya.

Yagize ati : « Abayobozi bafite inshingano, zirimo guhindura inyumvire y’abantu tubaganisha mu byiza”. Yanavuze ko hari n’inshingano zo kuba umuyobozi mwiza, kurangwa n’ umucyo,umutuzo no kuba umunyakuri.

Yabwiye abayobozi bitabiriye amasengengesho ko abategarugori bari mu buyobozi bashobora kuba abayobozi beza, buzuza inshingano zabo ndetse n’inshingano z’ Umuryango.

Hanasobanauwe ko kubaka ubuyobozi no gushyigikira indangagaciro z’ Umuryango ari inkingi ikomeye ishingirwaho n’umuntu ku giti cye, sosiyete n’Igihugu kibifashijwemo n’Imana.

Janet Museveni , Umugore wa Perezida wa Uganda wari witabiriye aya masengesho yagize ati : ”Imana iri mu Rwanda. Nishimiye kuba naje muri aya masengesho ». Yavuze ko aya masengesho azafasha mu kubaka Igihugu. Yifuje ko aya masengesho yazajya akomeza kubaho.
Yagize ati : « Tugomba kuba abayobozi b’intangarugero mu bukirisitu ». Yakomeje avuga ko indangagaciro z’ ubuyobozi ari ugufasha abandi no kubayobora mu byiza. Yavuze ko gukora uyobowe na Yezu, (Yesu) bifasha kugira ikinyabupfura no kugisangiza abandi.

Yasabye imiryango gukurikiza amategeko y’ Imana, bityo imiryango igakundana, igashyira hamwe ikarangwa n’ ubunyamuntu. Yavuze ko umugabo ayobora umuryango, umugore akamuba mu ruhande bagafashanya bakarera neza abana, bakarera umuryango mwiza uzavamo abana bafite icyerekezo kiza.

Yanenze imico yateye aho bamwe mu bagabo babana n’abandi bagabo, abagore bakabana n’abandi bagore. Yavuze ko Imana ari yo yaremye umuryango nk’uko Bibiliya ibivuga.Yavuze ko umugabo agomba kubana n’umugore.

Yasabye abari bitabiriye amasengesho kwiringira Imana kuko itari umuntu ngo ibeshye. Yavuze ko nibakora ibyo Imana ishaka izabibafasha mo. Yabasabye kurangwa n’ isengesho, bagasengera Afurika n’ ibiyibera mo n’ abayiri mo bafite ibazo.

Aya masengesho yari yitabiriwe n’abayobozi batandukanye bo mu bindi bihugu barimo minisitiri wa w’ ububanyi wo muri Karamoja, Grace Nelson umugore wa Senateri w’Umunyamerika Bill Nelson n’itsinda ry’abategarugori b’abayobozi baturutse muri Leta Zunze Ubumwe za Amerika, abanyacyubahiro baturutse mu gihugu cy’ u Burundi, muri Jordan na Leta Zunze Ubumwe za Amerika Hamwe n’Abategarugori bari mu buyobozi mu Rwanda( Abaminisitiri, abari mu Nteko ishinga amategeko imitwe yombi, Abayobozi b’ Uturere n’ Intara, n’abahagarariye amadini.

Uyu muhango waranzwe n’amasengesho yo gusabira abategarugori bari mu buyobozi, gusabira imiryango, gusabira ibihugu byacu ndetse no gusabira Afurika hamwe n’ indirimbo zihimbaza Imana.

Uko byari byifashe mu mafoto :

Madamu Janet Kataaha Museveni mu giterane cy'amasengesho yatumiwemo na Madamu Jeannette Kagame

Madamu Jeannette Kagame wateguye igikorwa cy'amasengesho cy'abagore bari mu nzego z'ubuyobozi

Abaririmbyi n'abacuranzi basusurukije iki gikorwa mu ndirimbo zihimbaza Imana

Bamwe mu baririmbyikazi...

Igikorwa cyari cyitabiriwe n'abagore bari mu nzego z'ubuyobozi b'ingeri zitandukanye

Ubwo Madamu Jeannette Kagame yagezaga ijambo ku bitabiriye iki gikorwa cy'amasengesho

Madamu Jeannette Kagame na Madamu Janet Museveni bari kumwe n'abandi bategarugori ahanini baturutse hanze y'u Rwanda kubw'iki gikorwa

>>>