Uwagonze Dizzy Nutts yari agambiriye kwica Bebe Cool aramuhusha

Yanditswe na IGIHE
Kuya 7 Ugushyingo 2017 saa 01:26
Yasuwe :
0 0

Umuririmbyi mu njyana ya Dancehall Dizzy Nutts Galiwango yitabye Imana nyuma yo kugongwa n’imodoka mu rukerera rwo kuwa wa Mbere tariki ya 6 Ugushyingo 2017.

Dizzy Nuts azwi cyane mu ndirimbo ‘Fire Burn Dem’ yakoranye na Bebe Cool mu mwaka wa 2008. Uyu muhanzi yazize impanuka y’imodoka yamugonze imusanze aho yari ahagaze aganira na Bebe Cool.

Mu buhamya Chimplyf yahawe na Paul Yusuf wari uhagaze aho impanuka yabereye akaba n’inshuti ya hafi ya nyakwigendera Dizzy Nutts yavuze ko uwamugonze “yari agambiriye kwica Bebe Cool.”

Dizzy Nutts yapfuye ahagana saa cyenda z’ijoro, yagonzwe n’imodoka yo mu bwoko bwa Toyota Harrier yari ifite ibirahuri byijimye cyane ndetse nta matara yari ifite. Iyi modoka ngo yari ihagaze hafi ya banki iteganye n’aho iya Bebe Cool yari iparitse hanze y’akabyiniro kitwa Victoria Club muri district ya Wakiso.

Bebe Cool yanditse kuri Facebook ko umushoferi wari utwaye iyi modoka ngo yahagurukanye umuvuduko ayiyobora aho uyu muhanzi yarimo aganirira na Dizzy. Yagize ati “Nta matara yari ifite kandi byagaragaraga ko yari yateguye kwica njyewe mu ijoro ryacyeye nyuma y’igitaramo nakoze. Yatwaye ubuzima bw’umuvandimwe, umubyeyi kandi inshuti ya benshi.”

Paul Yusuf wari inshuti magara ya Oscar Mubuke[Dizzy Nutts] na we mu buhamya bwe yashimangiye ko uwagonze uyu muhanzi ngo yari agambiriye kwica Bebe Cool arokorwa n’uko yari yicaye mu modoka.

Yakomeje avuga ko akurikije ibyo yabonye ngo umushoferi yashakaga kwica Bebe Cool. Ngo yakije imodoka ahita ahagurukana umuvuduko wo hejuru arangije azimya amatara ku buryo nta wari gupfa kumenya ibirango byayo.

Yagize ati “Iteka nyuma yo kuririmba Cool arabanza agahagarara hanze umwanya akaganira n’abafana n’inshuti ze. Ni umuntu bigaragara ko yashakaga kwica Bebe Cool ariko yatwaye ubuzima bwa Dizzy.”

Dizzy Nutts bamusanze mu muferege munini uri hafi y’aka kabyiniro bakoreyemo igitaramo, bahise bamwihutisha ku bitaro bya Gwatiro Hospital ari naho yapfiriye nyuma bamujyana mu buruhukiro bw’ibitaro bya Mulago mu Mujyi wa Kampala.

Mu bandi bakomerekejwe n’iyi modoka harimo inshuti ya Bebe Cool yitwa Kato Hassan[yavunitse ukuguru], Saka Mwebe wacungaga amafaranga ya Victoria Club ndetse n’umusore w’ibigango ukora kuri aka kabari wakomerekejwe n’indorerwamo y’iyo modoka.

Uyu muhanzi arashyingurwa kuri uyu wa Kabiri ahitwa Kayabwe, Bebe Cool ngo yiyemeje kwishyura ibijyanye no kumuherekeza byose. Dizzy Nutts asize abana batatu Sheebah Namitala, Emmanuelle Kiguli Simon Peter ndetse na James Kulumba Solomon. Umugore we yitwa Winnie Nakalyango.

Dizzy yize amashuri abanza ahitwa Kaboja Primary School, akomereza ayisumbuye kuri Kasasa Secondary School muri Masaka aho yize icyiciro rusange asoreza kuri Mityana Secondary School.

Nyuma yo kurangiza ayisumbuye yakomereje muri Kaminuza muri Makerere University mu ishami ry’ubukerarugendo, nyuma asoje amasomo nibwo yinjiye mu muziki.

Ubwo Bebe Cool yaririmbaga mu gitaramo cyakurikiwe no kugonga Dizzy Nutts
Dizzy(hejuru) aririmba, ku ifoto yo hasi ari kumwe n'umuryango we; uyu iruhande ni Paul Yusuf wari uhagaze aho impanuka yabereye
Ku ifoto hejuru ni se wa Dizzy, umuyobozi w'akabyiniro Bebe Cool yaririmbiyemo; ku gice cyo hasi ni urugo rwa Dizzy

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza