Kwamamaza

Minisante yamaganye ibyo gufungira abarwayi mu bitaro

Yanditswe kuya 20-08-2016 saa 10:36' na Ezechiel Mbananabo


Mu gihe hashize iminsi humvikana inkuru z’ibitaro bibuza abarwayi gutaha bikabamarana iminsi runaka bazira ko babuze amafaranga yo kwishyura serivizi zitandukanye z’ubuvuzi bahawe, Minisiteri y’Ubuzima(Minisante) yatangaje ko nta mabwiriza yigeze iha ibitaro yo kugwatira abarwayi babuze ubwishyu nyuma yo kuvurwa.

Ingero z’ibitaro bivugwamo kubuza abantu gutaha kubera ko bavuwe bakabura amafaranga yo kwishyura zirimo ibitaro bya Muhima, ibya Kaminuza bya Kigali (CHUK) n’ibya Nyagatare.

Nk’ibitaro bya Nyagatare mu minsi ishize byabujije abantu 26 gutaha, bamwe muri bo bakaba baramaze amezi hafi abiri bari mu nzu imwe bashyiriweho.

Icyakora leta yemeye kwishyurira umwenda bamwe muri bo batishoboye abandi bamenyeshwa uko bazawuvamo bararekurwa.

Ubuyobozi bw’ibitaro bya Muhima byatangarije RBA ko kuri ubu bigifite abantu 30 batarishyura,bamwe muri bo ni abakozi bo mu rugo baba baratewe inda n’abagore batereranwe n’abagabo kimwe n’abatishoboye muri rusange.

Umwe muri bo yagize ati “Ntabwo batuma usohoka utishyuye kuko uramutse ugiye gutyo n’undi bikamera bityo ikigo nacyo cyahomba. Ntabwo bagutererana, ariko iyo bamaze kuguha serivisi zose bagushyira ahantu ho gutegereza mu gihe utarabona ubwishyu.”

Undi ati“Kubera ko twabuze ubwishyu banga ko dusohoka! Iyo abagiraneza baje nibo badufungurira.”

Mukiza Alain ni umwe mu bangiwe gusohoka nyuma yo kwivuriza mu bitaro bya CHUK akabura ubwishyu kuko yavuze ko abura amafaranga ibihumbi 380 ku asaga ibihumbi 500 yishyuzwa.

Ati “Baransezereye mbura ubwishyu. Salle ya munani ni yo bazanamo abantu batarishyura.”

Mu baganiriye na RBA harimo abamaze hagati y’ibyumweru bibiri n’ukwezi batemerewe gusohoka mu bitaro, aho barara aho bahoze barwariye imyanya yaba mike bakegerana.

Umunyamabanga Uhoraho muri Minisiteri y’Ubuzima, Dr Nyemazi Jean Pierre, yavuze ko nta mabwiriza iyi minisiteri yigeze itanga asaba ibigo nderabuzima n’ibitaro gufatira abarwayi.

Yagize ati “Nta mabwiriza ashobora kuva kuri minisiteri asaba ibitaro gufatira abarwayi ntabwo byo bishoboka.Niyo mpamvu duhora dushyira imbaraga mu kugira ngo abaturage bagire ubwishingizi ku buryo ikibazo kijyanye no kwishyura kivaho kuko abantu bagomba kwishyura serivisi bahawe kugira ngo ibitaro bibashe kugura imiti,kwishyura abakozi n’ibindi bikenerwa.”

Yakomeje agira ati “Ntabwo dusaba ibitaro gukora gutyo byumvikana ko tugomba kumva impamu byabikoze tugakomeza kubagira inama z’uburyo byakemuka aho kujya muri izo nzira kuko ntabwo byemewe.”

Umuyobozi w’ibitaro bya Muhima Dr Ndizeye Ntwali, yavuze ko birinda ko abantu bagenda batishyuye cyangwa badakoranye amasezerano nabo y’uburyo bazishyura kugira ngo batazahatwa ibibazo n’umugenzunzi w’imari bakabura ibisobanuro.

Ati “Byabaye byiza ko dutekereza uburyo twamenya abantu twavuye niba koko nta n’ubushobozi bafite tukagira urupapuro rwerekana ko biteguye kuba bakwishyura igihe icyo ari cyo cyose.Ni nk’umwenda baba bagiyemo Leta.”

Ibitaro bigaragaza ko kubura ubwishyu kuri bamwe mu bo biba byahaye serivisi z’ubuvuzi bimaze kubibera umutwaro. Nk’ubu ngo Ibitaro bya Muhima birabarura abantu 129 babigiyemo ideni rya miliyoni zisaga icumi mu mwaka wa 2015/2016, mu gihe abagera ku 153 babigiyemo ideni nk’iryo mu mwaka wa 2014/2015. Kimwe cya kabiri cy’ayo mafaranga kishyuwe na ba nyirubwite hamwe n’abagiraneza.

Umunyamabanga Uhoraho muri Minisiteri y’Ubuzima, Dr Nyemazi Jean Pierre, yavuze ko nta mabwiriza iyi minisiteri yigeze itanga asaba ibigo nderabuzima n’ibitaro gufatira abarwayi

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved