Willy Kayisire yasohoye igitabo ‘Gatigisimu Ntindi’ gikosora ababaye imbata z’ivanjiri badasobanukiwe

Yanditswe na Ferdinand Maniraguha
Kuya 4 Gicurasi 2021 saa 01:20
Yasuwe :
0 0

Willy K Kayisire, umwarimu w’umwuga, umwanditsi ndetse akaba n’umuvugabutumwa yashyize hanze igitabo yise ‘‘Bwaki mu bami n’abatambyi: Gatigisimu Ntindi” gihanura abayobotse inyigisho z’amadini buhumyi, bagapfa kwemera ibyo babwiwe byose nta gusesengura.

‘Gatigisimu Ntindi’ ni igitabo gikubiyemo inkuru mpimbano ndende ariko yibanda cyane ku myigishirize itandukanye igezweho muri iki gihe mu bigisha ijambo ry’Imana mu matorero atandukanye.

Kayisire avuga ko yayanditse yifuza ko ifasha abantu benshi cyane abayobejwe na gatigisimu cyangwa inyigisho zagiye zisobanurwa uko zitari.

Yagize ati “ Ni ntindi kuko yaje itagamije ko abayigishwaga bamenya ukuri kwayo ahubwo yakoreshejwe nk’igikoresho cyo kugira ngo babashe kwigarurira abo bashakaga kugira ingaruzwamuheto, ngo babone uko basahura iby’abayikurikiye buhumyi ntawe urabutswe.”

Inkuru iri mu gitabo igaragaza bamwe mu bayobotse izo nyigisho ariko nyuma bakaza kumenya ubwenge, bakibaza niba koko ibyo bigishijwe ari ukuri cyangwa harimo ibinyoma, bagafata umwanzuro wo kumenya neza ukuri kw’ibyanditswe, aho badasobanukiwe bakabaza.

Kayisire avuga ko intego nyamukuru ari ugufasha abakiri bato kutagwa mu mutego abakuru baguyemo wo kugendera kubyo babwiwe mu bijyanye n’iyobokamana, aho bayobotse “nta gusesengura cyangwa kugira amakenga ku kuri kwihishe inyuma y’ibyo babwiwe.”

Ni inkuru kandi yongera gukebura abatentebutse, abavuye mu byo kwizera bagishidikanya ku nkuru bigishijwe. Umwanditsi agaragaza neza ko ikibazo atari inkuru abantu bigishijwe ahubwo ari uburyo bazigishijwemo n’uko zasobanuwe.

Kayisire yavuze ko yifuza ko iyo nkuru yafasha buri wese uharanira ko abantu Imana yaremye babaho neza kandi bakabaho bubaha umuremyi wabo ariko byose bakabikora babisobanukiwe, aho kugendera ku marangamutima y’ababazaniye ubwo butumwa bwiza.

Igitabo ‘Gatigisimu Ntindi’ kiboneka kuri Amazon unyuze aha.

Willy Kayisire asanze ari umwanditsi w’ibitabo. Igiheruka kujya hanze ni icyo yise Canada The Land of Doers. Yashize kandi Umuryango Inkuru Nziza ku Isi Yose (Global Gospel Movement ) ugamije kugeza ijambo ry’Imana kuri benshi. Ni umugabo wubatse, akaba atuye muri Canada.

Kayisire avuga ko intego nyamukuru ari ugufasha abakiri bato kutagwa mu mutego abakuru baguyemo wo kugendera kubyo babwiwe mu bijyanye n’iyobokamana
‘Gatigisimu Ntindi’ ni igitabo gikubiyemo inkuru mpimbano ndende ariko yibanda cyane ku myigishirize itandukanye ituma bamwe badasobanukirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .