Wendy Murphy wigeze guhabwa umukoro na Perezida Kagame yanditse igitabo cyashibutse mu rugendo rwe mu Rwanda

Yanditswe na HABIMANA James
Kuya 7 Mata 2019 saa 06:52
Yasuwe :
0 0

Mu Ukwakira 2016, Umunya-Pologne Wendy Murphy Skorupski n’umuryango we basuye u Rwanda banyurwa n’iterambere rwagezeho nyuma y’ibihe bikomeye bya Jenoside rwanyuzemo.

Uyu muryango waje mu Rwanda mu gufasha umwana wabo kumenya byinshi kuri Jenoside yakorewe Abatutsi mu 1994 kuko yari yarize amateka ayerekeyeho mu ishuri.

Wendy yatunguwe n’umuvuduko u Rwanda rufite mu iterambere nyuma ya Jenoside yakorewe Abatutsi yahitanye ubuzima bw’abasaga miliyoni mu mezi atatu, igashegesha igihugu mu nzego zose.

Kuwa 20 Ukwakira 2016, Wendy yandikiye Perezida Paul Kagame kuri Twitter amubaza ikibazo cy’ibyegeranyo bisohorwa bimuvuga nk’uyoboza igitugu.

Nyuma y’amasaha ane n’iminota 15, Perezida Kagame yahise amusubiza ati “Ntutinye kuzenguruka mu gihugu hose ugenda ubaza… ubundi ufate umwanzuro ku gikwiye kwizerwa! Utekereza iki ku bavuga ibinyuranye nabyo?’’

Nyuma yo gukora ingendo zitandukanye no kuganira n’abaturage b’ingeri zose n’abayobozi, Wendy yashimiye Perezida Kagame uburyo ayobora, ashimangira ko ibyinshi yabyiboneye.

Ati “Twaganiriye n’Abanyarwanda b’ingeri zose barimo umushoferi watunze urutoki ku nyubako zigezweho zari hafi aho, agaragaza ko ari bimwe mu byo Kagame agezeho mu kongera kubaka igihugu; umucuruzi w’amabahasha warokotse Jenoside yihishe mu gisenge utazibagirwa imiborogo y’umuryango we ubwo wicwaga; umugenzi wihitiraga ku muhanda akinjira mu kiganiro cyacu yavuze ko Perezida Kagame ariwe muntu ukwiye gukomeza kuyobora u Rwanda.”

Wendy yavuze ko u Rwanda ari kimwe mu bihugu bitekanye umuntu akwiriye gusura muri Afurika ndetse bitewe n’ubukungu bwacyo buri kuzamuka cyane ‘ni igihugu kibereye ishoramari.’

Ati “Ni igihugu cyiza cyuje imisozi migufi n’imiremire, ibirunga, icyayi n’insina, ibiyaga birebire bisa n’inyanja ndetse kikagira n’abantu bagira urugwiro. Gusa nta na kimwe cyari gushoboka hatabayeho ubumenyi n’umuhate by’uwari Jenerali w’Ingabo za RPF, wamenesheje agatsiko k’intagondwa z’Abahutu zarimo abasirikare bakuru n’abanyapolitiki bari mu cyiswe ‘Hutu Power, agahagarika Jenoside akaza no kuba Perezida.”

Icyo gihe (2016) mu nyandiko yahaye IGIHE yavuze ko “Badusabye guhangana n’ibyandikwa n’abanyamakuru bo mu Burengerazuba bw’Isi batumva neza ibitangaza Kagame yashoboye gukora mu gusubiranya igihugu cyari cyacitsemo ibice nyuma ya Jenoside yo mu 1994.”

Urugendo Wendy yagiriye mu Rwanda rwazamuye izina rye kuko yanditsweho n’ibitangazamakuru bikomeye birimo The Independent na Radio BBC mu Bwongereza na Amerika avuga ku bihe yagiriye mu Rwanda.

Nyuma yanzuye kwandika inkuru ndende ikubiye mu gitabo “Once Upon a Thousand Hills: In the shadow of secrets, lies and shame’’, gikubiyemo ibihe by’ingenzi mu minsi 10 yamaze mu rw’imisozi 1000. Kuri ubu kiboneka kuri Amazon no kuri internet.

Wendy ari mu Rwanda aho yitabiriye ibikorwa byo kwibuka ku nshuro ya 25 Jenoside yakorewe Abatutsi byatangiye kuri uyu wa 7 Mata 2019. Urugendo yatangiye ku wa 4 Mata biteganyijwe ko azarusoza ku wa 14 Mata 2019.

Perezida Kagame yasabye Wendy Skorupski kuzenguruka akamenya ukuri kw’ibyo bandika ku Rwanda
Wendy Murphy Skorupski ubwo yari mu Rwanda yagiranye ibiganiro n’abantu b’ingeri zinyuranye
Igitabo cya Wendy Skorupski cyashibutse mu rugendo uyu mwanditsi yagiriye mu Rwanda mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza