Umwanditsi Brigit Helms yashimye intambwe y’u Rwanda mu kubaka ubukungu budaheza

Yanditswe na IGIHE
Kuya 10 Gicurasi 2019 saa 06:11
Yasuwe :
0 0

U Rwanda ruri mu bihugu biri mu nzira y’amajyambere ku Isi byashyizeho ingamba zifasha abaturage mu gutanga umusanzu mu iterambere rusange binyuze muri gahunda zigamije kubaka ubukungu budaheza no gutanga serivisi kuri bose.

Aya magambo yagarutsweho n’Umunyamerika, Brigit Helms, mu muhango yamurikiyemo igitabo cye yise “Access for All” bishatse kuvuga ‘Uburenganzira kuri byose’’ wabereye mu Mujyi wa Kigali ku wa Kane.

Uyu mwanditsi asanzwe ari Visi Perezida w’ibijyanye na Serivisi mu Kigo Mpuzamahanga cya DAI gitera inkunga imishinga y’iterambere mu bihugu birenga 150.

Helms ufite ubunararibonye bw’imyaka 30 mu gufasha abikorera gushaka ibisubizo ku iterambere mu bihugu birenga 35 bya Afurika, Asia na Amerika y’Epfo yavuze ko u Rwanda rwagaragaje ko binyuze mu miyoborere myiza, bishoboka ko buri wese yagira uruhare mu rugendo rw’iterambere.

Yagize ati “U Rwanda rwatweretse ko hari imbaraga nyinshi kandi hari ibyagerwaho mu gihe hari ubuyobozi bwiza bwiteguye gukora ibintu neza.’’

Yakomeje agira ati “Igihugu kiratekanye kandi cyateye imbere mu ngeri zitandukanye zirimo korohereza ishoramari no gufasha abaturage bose kubona serivisi z’ibanze. Navuga ko buri gihe iyo urebye ibyo u Rwanda rukora, wumva ugize amarangamutima ko Guverinoma y’u Rwanda hari ibyiza yakoze.’’

Umwanditsi ukomoka muri Amerika, Brigit Helms, yamurikiye i Kigali igitabo yanditse aho agaruka ku iterambere ry'u Rwanda mu kubaka ubukungu budaheza

Umunyamerika Helms usanzwe uzobereye mu bijyanye n’imari n’iterambere ry’ ubukungu, yavuze ko kuva mu myaka ishize u Rwanda rwagaragaje ko ibihugu biri mu nzira y’iterambere byagera ku ntsinzi mu gihe habaye gukorera mu mucyo, gushora imari ahakwiye no gushyiraho amabwiriza atavangura abantu mu byiciro byose barimo.

Yakomeje agira ati “U Rwanda nicyo gihugu gifite amapaji arenga atanu mu gitabo cyanjye kubera ingero nyinshi narukuyemo kandi n’ibindi bihugu byarwigiramo.’’

Igitabo cya Helms kigizwe n’amapaji 353, cyibanda ku buryo ibihugu biri mu nzira y’iterambere byakubaka uburyo bugena ubukungu budaheza, bifatanyije n’abafatanyabikorwa babyo.

Yatanze urugero ku Rwanda rwafashe iya mbere mu gukora amavugurura mu bijyanye n’ubucuruzi agamije kubaka iterambere.

Muri icyo gitabo hari aho agaragaza ko hagati ya 2008 na 2015, u Rwanda rwashoboye kuzamuka imyanya 100 kuri Raporo ya Banki y’Isi mu koroshya ubucuruzi.

Muri “Access for All”, umwanditsi hari aho yagarutse kuri gahunda z’igihugu zatangijwe na Guverinoma y’u Rwanda zirimo Icyerekezo 2020 n’izindi; zatumye umusaruro mbumbe w’igihugu wikuba inshuro eshatu uva ku $216 ku muntu mu 2000 igera kuri $703 mu 2016.

Igitabo kinavuga kuri serivisi z’imari zidaheza n’izo guverinoma yashyizeho zifashisha ikoranabuhanga, zatumye abaturage bagira amahirwe angana ku bibakorerwa.

U Rwanda rwashoboye kubaka ubukungu budaheza kugera kuri 89% mu 2016, binyuze mu ihererekanya ry’amafaranga hifashishijwe telefoni igendanwa.

Imibare igaragaza ko nibura mu bantu bafite indangamuntu, abagera kuri 87% bashobora gufunguza konti kuri banki cyangwa batunze simcards zibafasha kwiyandikisha mu buryo bubafasha kohererezanya amafaranga kuri telefoni.

Iki gitabo kivuga ibikorwa u Rwanda rwatangije bifitiye rubanda akamaro, kinagaruka ku bikorwa byo gutwara amaraso mu bitaro hifashishijwe indege nto zizwi nka drones, aho mu 2016 rwabaye igihugu cya mbere ku Isi gifite iri koranabuhanga.

Mu butumwa bukubiye muri iki gitabo cyamurikiwe bwa mbere muri Amerika mu mpera za 2018, umwanditsi agaragaza ko mu gihe ibigo n’abantu bafite ubushake bwo gukora neza mu ishoramari bazarinyuza mu mishinga mito, abashoramari n’abaterankunga hazaboneka uburyo bwo kurandura ubukene ku Isi.

Helms yemera ko hari inzira ebyiri z’ingenzi zo kurandura ubukene zirimo gufasha abantu kugera kuri serivisi no kubona akazi.

Abatanze ikiganiro bikije ku buryo ibihugu biri mu nzira y’iterambere byakoresha ikoranabuhanga mu guhanga imirimo myinshi, banibandwa ku mishinga yaryo yahawe umwihariko mu Rwanda n’ingaruka zo kutarikoresha.

Yasangije abitabiriye umuhango yamurikiyemo igitabo cye ibigikubiyemo n’ingamba kigaragaza zikwiye gufatwa mu kubaka ubukungu burambye kandi budaheza.

Igitabo “Access for All” cyatangajwe ku bufatanye na DAI, ikorana n’imishinga igamije iterambere mu guhindura ibitekerezo mo ibikorwa bifite ingaruka ku muryango mugari.

Umuyobozi wa Liaison Financial Services Ltd, Rubagumya George, yatanze ingero z’imirimo yahanzwe igenewe urubyiruko
Umuyobozi w’Umushinga ARED (African Renewable Energy Distributors), Nyakarundi Henri, yavuze ku mbogamizi ibigo bitangira bihura nazo n’amahirwe bishobora kubyaza umusaruro
Mu imurikwa ry'iki gitabo, hagaragajwe ko ubukungu budaheza ni ubuha umwanya abaturage bose barimo n'abafatwa nk'abatishoboye
Prof Bizoza Alfred wo muri Kaminuza y’u Rwanda yavuze ku buryo amashuri makuru na za kaminuza zatangiye gushyira imbaraga mu kubaka ubushobozi bw’abakozi bakenewe ku isoko ry’umurimo
Imurikwa ry'igitabo 'Access for all' ryitabiriwe n'abayobozi mu nzego zitandukanye, inzobere mu bijyanye n'ubukungu n'abahagarariye imiryango n'ibigo byigenga
Abatanze ikiganiro bagarutse kuri gahunda yo guhanga imirimo n'amahirwe ari mu ikoranabuhanga mu nzira igana kuri urwo rugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza