00:00:00 IGIHE NETWORK KN KINYARWANDA EN ENGLISH FR FRANCAIS

Umusizi Nsanzabera agiye gusohora igitabo kirata ibyiza by’u Rwanda mu mateka yarwo

Yanditswe na IGIHE
Kuya 10 Gicurasi 2021 saa 03:39
Yasuwe :
0 0

Umusizi Nsanzabera Jean de Dieu agiye gushyira hanze igitabo gishya yise “Nkurangire u Rwanda, Igihugu cya Benimana” kirata ubwiza bw’u Rwanda. Ni igitabo yitezeho kuba umuranga w’abashaka kumenya u Rwanda, abataruzi bakarushaho kurusobanukirwa, abarwibeshyaho bakarumenya by’imvaho.

Icyo gitabo kivuga byinshi byiza byaranze amateka y’u Rwanda nk’ibikorwa ndangamuco byashingirwaho mu guteza imbere ubukerarugendo bushingiye ku muco n’amateka y’u Rwanda.

Nsanzabera yavuze ko u Rwanda ari igihugu gifite ibigwi n’ibirindiro, gifite uburame kizira ubusame n’ubuvukasi, cyuje ishya n’ihirwe mu bihe byose.

Ati “Mu buzima bwose bwa buri muntu, mu by’ibanze akenera habamo no kumenya igihugu cye, umuco wacyo n’amateka yakiranze, akubiye mu ngeri zitandukanye, zaba iz’ubuzima, imibereho y’Abaturage, ububanyi n’amahanga, ubukungu, umutekano n’ibindi. Akamenya ibyiza byaranze igihugu cye mu mateka yacyo n’ibyiza nyaburanga ashobora kurangira abandi nk’akarusho gashamaje, bityo akarushaho kwimenya, akivuga ibyiza biri mu gihugu ariko anabizi by’ihame.”

Yavuze ko amateka akubiye mu gitabo cye gishya, agamije gutembereza Abanyarwanda bakarushaho kwimenya no kumenya igihugu cyabo n’ibigwi kivugwaho, kugira ngo hato hatazagira abahora babapfobya ko nta cyo bifitiye, nabo bakabyemera kubera kutabimenya.

Yagize ati “Iki gitabo Nkurangire u Rwanda, Igihugu cya Benimana, kije muri uwo mujyo wo kuba umuranga w’u Rwanda, kikarangira aba Ntara na Ntarange, ab’iyo giterwa inkingi n’inkenke, abatuye iyo bigwa mu bigagara, kibaha amakuru menshi ku gihugu cy’u Rwanda, kuva mu ntango yacyo, kugeza magingo aya.”

“Amakuru akubiye muri iki gitabo, ni amakuru gihamya ku ncamake y’abashaka kumenya u Rwanda, ni imitekerereze y’amateka y’ibanze twese twagombye gukenera mu kumenya igihugu cy’u Rwanda. U Rwanda ntirukiri wa mukobwa wabuze umuranga waheze mwa nyina, kuko amateka y’ibikorwa byarwo araruranga, nk’uko tuyakesha iki gitabo, cyaje kurangira u Rwanda benshi mu bataruzi.”

Iki igitabo kije gutembereza Abanyamahanga n’Abanyarwanda, abato n’abakuru, batabashije kurubamo igihe kirekire kubera amateka runaka banyuzemo, ubutaka bwose bw’u Rwanda bakabumenya binyuze mu nyandiko, bakamenya ibyiza byinshi birurimo, n’icyo rurusha amahanga y’iwabo n’ayo babayemo.

Nsanzabera kandi yavuze ko icyo gitabo kije kubatembereza mu mabanga y’umutima w’Abanyarwanda, ngo bamenye ibyo bemera, nuko batekereza, imikorere-murage bakomora ku bakurambere n’uburyo babona ibintu byabo byose n’uko bishyirwa mu buryo.

Ati “U Rwanda ni igihugu gifite amavugwa, kikazira amanegurwa kuko gifite ibyiza byinshi kigejejeho kibikesha ubumwe bw’abenegihugu, kwigirira icyizere, kwimakaza imiyoborere myiza no kugira umuco wo kuyoboka. Kugira umuhati mu gukora ibyo biyemeje byose ushingiye ku buhanga, inararibonye no kwimakaza umuco w’inzobere ku rugamba rw’umurimo binyuze mu mihigo buri wese aba asiganirwa kwesa”

Yavuze ko u Rwanda rufite ibintu byinshi nyaburanga, bishobora gukurura ba mukerarugendo, bikamara amatsiko abayafite.

Ati “Ikirere cyaho cyonyine gitanga icyizere cy’imibereho myiza n’ubuzima buzira umuze n’ibizazane, bwuje ubukungu nziragihombo. Abashaka gushora imari mu bikorwa by’ubukungu, cyababereye imbarutso yo kubigeraho, kubera imyumvire myiza y’abaturage bacyo, gukunda umurimo n’imiterere y’igihugu itanga icyizere mu kubaka ubukungu bw’ingeri zosez’ubuzima bwo ku isi.”

Iki gitabo kizahosohoka mu minsi ya vuba. Nikijya ahagaragara kizaba kiboneka muri nzu zigurisha ibitabo nka Librairie Ikirezi na Caritas.

Umusizi Nsanzabera amaze kwandika ibitabo byinshi bigaruka ku muco n'amateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .