00:00:00 IGIHE NETWORK KN KINYARWANDA EN ENGLISH FR FRANCAIS

Uko ubwoba bw’ubuvanganzo bwashibutsemo igitabo A Country of a Thousand Hills

Yanditswe na Ferdinand Maniraguha
Kuya 12 Ukwakira 2022 saa 08:13
Yasuwe :

Fidèle Nkurunziza, umwarimu kuri Groupe Scolaire Kicukiro – Imenarugamba ubwo yari akiri muri Kaminuza, yitegereje ubwoko bw’ibisigo n’imivugo (poems) myinshi yanditse mu Cyongereza yigishwa mu mashuri yo mu Rwanda, asanga ivuga ku Rwanda ntayo.

Yafashe umwanya wo gutekereza, yibaza niba nta cyakorwa ngo iyo nenge ihanagurwe, birangira afashe umwanzuro wo kwandika igitabo “A Country of a Thousand Hills”.

Ni igitabo gikubiyemo imivugo yatanzwe n’abanyeshuri batandukanye hirya no hino mu mashuri yisumbuye yo mu Rwanda, ndetse n’abandi barimu bagenzi be.

Mu kiganiro na IGIHE, Nkurunziza yagize ati “Igihe nari ngeze muri kaminuza, nasubije amaso inyuma nsanga kuva mu mashuri abanza kugeza mu yisumbuye nta muvugo n’umwe [mu Cyongereza) wandikiwe mu Rwanda. Twigaga iy’abanyamahanga ivuga ku buzima bw’iwabo bityo ndavuga nti kuki ntakora ivuga ku gihugu cyanjye.”

Nkurunziza yavuze ko ahanini abantu bafite imyumvire y’uko imivugo ikomera, nyamara ngo n’uko abana batayigishwa hakiri kare.

Ati “Naje gusanga bidakomera ahubwo ari uko twabyize dukuze (A level ) abana baramutse babihereye hasi babikunda ahubwo bakura bakaba abahanga mu buvanganzo.”

Yakomeje agira ati “Icyanteye imbaraga nta kindi ni ukubona umwana w’Umunyarwanda, yiga ibyanditswe n’Umunyarwanda bivuga ku Rwanda.”

Igitabo A Country of a Thousand Hills cyanditse mu buryo bworohereza umwana kumva ibirimo, hashingiye ku ngingo ivugwaho. Niba ibivugwa biri mu bukerarugendo, ubwo imivugo yo muri icyo cyiciro ijya hamwe.

Nkurunziza yavuze ko bifashishijemo n’amashusho kugira ngo byorohere abana kumva icyo umuvugo ugamije.

Yavuze ko kugira ngo abanyarwanda babe intyoza mu buvanganzo, hakenewe ko bwigishwa hakiri kare.

Nkurunziza yavuze ko bari gukora ibishoboka byose ku buryo icyo gitabo kigezwa mu mashuri no mu masomero rusange. Yanashinze inzu yandika ikanasohora ibitabo yise ‘Social Impact Publishers’ yizera ko izafasha mu gusohora ibitabo bishishikariza abato umuco wo gusoma.

Iki gitabo Nkurunziza avuga ko cyakomotse ku buryo yasanze benshi batinya ubuvanganzo
Nkurunziza avuga ko abana bakundishijwe gusoma ubuvanganzi bakiri bato, bakura babukunda
Nkurunziza arifuza ko igitabo cye kigezwa mu mashuri n'ahandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .