U Bufaransa: Hasohotse igitabo gikubiyemo inyandiko zo mu gihe cya Jenoside yakorewe Abatutsi

Yanditswe na Karirima A. Ngarambe
Kuya 6 Gashyantare 2020 saa 11:01
Yasuwe :
0 0

Hasohotse igitabo cyiswe ‘Nuit Brouillard sur le Rwanda’ ugenekereje mu Kinyarwanda ‘Ijoro ry’uje ibihu’, gikubiyemo inyandiko zanditswe n’umunyamakuru w’Umufaransa, Jean Chatain, wakoreraga igitangazamakuru ‘L’Humanité’ mu gihe hakorwaga ubwicanyi muri Jenoside yakorewe Abatutsi mu 1994.

Jean Chatain mu kazi yakoze kagaragara mui iki gitabo, harimo kwerekana ukuntu ubugome burenze kamere bwari bwarinjijwe mu nterahamwe n’utundi dutsiko twakoraga ubwicanyi dufashijwe na Leta yari iriho icyo gihe, tukaza kurwanywa n’izari ingabo za FPR Inkotanyi icyo gihe.

Izo ngabo zagendaga zihura n’imirambo inzira zose udasize iyacaga mu Akagera, isoko ya Nil, ibintu bihura neza n’ibyo Léon Mugesera yari yarahanuye muri mitingi yo ku Kabaya mu 1992 ko Abatutsi bazatemwa bakanyuzwa iy’ubusamo baciye mu ruzi rwa Nil, bagana aho bakomoka muri Abssinie.

Ibyanditswe na Jean Chatain usanga mu nyadiko iri muri iki gitabo, bituma habaho kwibaza uko ubuyobozi bw’icyo gihe bwa Leta y’u Bufaransa, bwirengagije abicwaga bazira ko ari Abatutsi, ahubwo aho kubakiza bagatabara abicaga n’ababayoboraga babaha ibikoresho n’ibindi bari bakeneye.

Umwanditsi yerekana kandi agasanga abakoloni baragendeye ku mahame amwe n’amwe bagahembera urwango bagacamo amoko ibice, bakabiba urwango rutagira ingano hagati y’abanyarwanda ari rwo ba Léon Mugesera bagendeyeho babiba ubwicanyi bwo gutema amajosi n’imitwe by’Abatutsi bakabajugunya muri Nyabarongo bagana mu ruzi rwa Nil.

Yibutsa mu nyandiko ze uko abasirikare b’u Bufaransa, babaga boherejwe mu bihe bitandukanye babaga baje gufasha by’umwihariko iyo Leta yabaga iri mu itegurwa rya jenoside.

Aha arabigarukaho mu buryo bwimbitse muri izo nyandiko ze ziri mu gitabo mu buryo bwimbitse.

Jean Chatain ni umwe mu banyamakuru bake bageze mu Rwanda muri icyo gihe cya jenoside yakorerwaga Abatutsi batanze ubuhamya bw’ibyo babonye mu rwego rwo kumenyekanisha ububi burenze kamere bw’ibyabaga bibera ingabo za FPR, akaga kuko bagendaga bahura na byo mu nzira yo gushaka ko hagira urokoka no gushaka guhagarika ubwicanyi.

Uyu munyamakuru nubwo yifuzaga kubona iki gitabo cye gisohoka, ntiyagize ayo mahirwe kuko yitabye tariki ya 5 Ukuboza 2019 akikirangiza.

Iki gitabo kandi kirimwo inyandiko bita Iriburiro (Préface) y’umwanditsi ku mateka ya jenoside yakorewe Abatutsi uzwi cyane mu Bufaransa witwa Jacques Morel ari nawe ugikorera ubuvugizi muri ibi bihe kiri gushyirwa hanze.

Uyu yanditse igitabo kinini cyamenyekanye cyane yise ‘La France au Cœur du génocide des Tutsi’.

Usangamo uko ku wa Gatandatu tariki ya 9 Mata 1994, i Kigali abaturage batangiye kwicwa, ibiganiro byo kuwa 30 Mata 1994, ku Mulindi, uyu munyamakuru yagiranye n’abayobozi ba FPR.

Hari aho Mgr Rubwejanga yavuze ku mpunzi 800 ziciwe muri évêché. Ku wa Kabiri tariki ya 3 Gicurasi 1994, ubuhamya bwatanzwe n’abapadiri ku bugome bwarimo bubera mu Rwanda, ku wa Gatanu tariki ya 6 Gicurasi 1994, ikiganiro Paul Kagame yahaye abanyamakuru ku mupaka w’u Rwanda na Tanzania, tariki ya 9 Gicurasi 1994 amaraso menshi yaramenetse, harimo kandi ibya Radio rutwitsi RTLM kuri paji ya 75.

Muri iki gitabo unasangamo ibibazo byabajijwe uwari wungirije umuyobozi wa FPR icyo gihe kuri paji ya 89, ibohorwa ry’Umujyi wa Byumba tariki ya 11 Gicurasi 1994, urupfu rw’umwamikazi Gicanda kuri paji ya 117, iyicwa ry’itsinda ry’Abanyamakuru ku wa Mbere tariki ya 23 Gicurasi 1994 n’ibindi.

Iki gitabo cyashyizwe hanze n’inzu y’ibitabo yitwa ‘Edition Izuba’ muri Mutarama 2020, gifite amapaji 283.

Kanyarengwa Alexis wayoboraga FPR icyo gihe ari kumwe n' Umunyamabanga we Faustin Kagame (iburyo) ku Mulindi w'Intwari
Ubwo Gen Maj Paul Kagame yatangaga ikiganiro n'Abanyamakuru ku mupaka wa Tanzania
Ingabo za FPR Inkotanyi ubwo zari ziri ku mupaka wa Tanzania barimo baganira
Muri perefegitura ya Kibungo abana bahunze ubwicanyi bwa Leta yariho icyo gihe barinzwe n'Inkotanyi
Impunzi zari mu Ruhengeri muri Nyakanga 1994
Imirambo y'abishwe muri jenosode yakorwaga abatutsi igaragara ku mafoto yafashwe n'Umunyamakuru Jean Chatain
Jean Chatain wanditse icyi gitabo ari kumwe n’Inkotanyi igihe cy’urugamba ubwo yataraga amakuru
Ubwo cyamurikirwaga Ambasaderi w'u Rwanda mu Bufaransa, Ngarambe
Iki gitabo kandi cyirimo inyandiko bita Iriburiro (Préface) y‘umwanditsi ku mateka ya Jenoside yakorewe Abatutsi uzwi cyane mu Bufaransa witwa Jacques Morel ari nawe ugikorera ubuvugizi muri ibi bihe kiri gushyirwa hanze. Aha yaganiraga n'umunyamakuru wa IGIHE mu Burayi Karirima Aimable

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza