Twinjire mu gitabo ‘Mamba Mentality’ gikubiyemo amabanga yafashije Kobe Bryant kuba igihangange muri Basketball

Yanditswe na Ferdinand Maniraguha
Kuya 27 Mutarama 2020 saa 02:57
Yasuwe :
0 0

Umunsi umwe yaravuze ati “Ntacyo ntakora ngo ntsinde umukino, byaba kwicara ku ntebe y’abasimbura nzunguza igitambaro (afana) , haba guhereza amazi bagenzi banjye bari mu kibuga cyangwa kujya mu kibuga nkakina”.

Iyo ni yo myumvire ya Black Mamba, akabyiniriro k’umukinnyi w’ibihe byose wa Basketball muri Leta Zunze Ubumwe za Amerika, Kobe Bryant.

Izina Black Mamba, Kobe yaryiyise nyuma yo kureba filime ‘Kill Bill’ ya Quentin Tarantino, aho umugore witwa Uma Thurman yashakaga kwihorera ku bagizi ba nabi bashatse kumwica we n’umwana yari atwite. Uwo mugore yakoreshaga izina ry’ibanga rya Black Mamba.

Ni imyumvire yamuyoboye imyaka 20 yamaze akinira LA Lakers ari nayo kipe yonyine yakiniye kuva yakwinjira muri NBA avuye mu mashuri. Yakinnye imikino 18 ya All-Star muri iyo myaka yose, atsinda amanota 33643. Yatwaye ibikombe bitanu bya NBA akinira LA Lakers.

Benshi bakura bafite abo bafata nk’icyitegererezo, ndetse bumva bashaka kuba nka bo ariko Bryant yari yararenze iyo myumvire, ubwo bamwitaga Michael Jordan mushya akabasubiza ati “Ntabwo nshaka kuba Michael Jordan, njye nshaka kuba Kobe Bryant.”

Iyo mitekerereze yamuyoboye mu rugendo rw’imyaka 20 na nyuma kugeza kuri iki Cyumweru tariki 26 Mutarama 2020 ubwo yagwaga mu mpanuka ya kajugujugu ari kumwe n’umukobwa we w’imyaka 13 n’abandi bantu umunani.

Imitekerereze yo guhangana kugeza ku munota wa nyuma, yatumye mu Ukwakira 2018 Kobe Bryant yandika igitabo ‘Mamba Mentality: How I Play’ gikubiyemo impanuro, inama n’uburyo yakoresheje ngo amare imyaka 20 akiri igihangange muri Basketball.

Mamba Mentality ni imvugo ikubiyemo kwiyemera no kwiyemeza, bigomba kuranga buri muntu, atari umukinnyi wa Basketball gusa, ahubwo no mu buzima busanzwe kugira ngo ube uwo ugomba kuba we.

Igitabo Mamba Mentality: How I Play, Kobe yacyanditse nk’umurage ku bakiri bato bashaka kuba ibihangange muri Basketball no mu bundi buzima busanzwe.

Ni igitabo kigutwara kikakwinjiza imbere mu bitekerezo by’umwe mu bakinnyi b’ibihangange ba Basketabll Isi yagize, kikakwereka icyatumaga atsinda, amayeri yakoreshaga ngo atsinde, uko yiteguraga umukino n’ibindi.

Muri icyo gitabo cyasohotse mu Ukwakira 2018, imyaka ibiri Kobe Bryant asezeye muri Basketball, hari aho yagize ati “Nakundaga kubuza abantu amahoro, bakumva badatekanye. Ibyo nibyo bituma abantu bitekerezaho, bagakora impinduka. Ushatse wavuga ko natumye abantu batinyuka kuba abo ari bo mu buryo bwiza.”

Ukurikiye imbwirwaruhame nyinshi za Kobe ku cyatumye aba igihangange, ijambo ‘kubuza amahoro uwo bahanganye’ riza kenshi.

Yavuze ko buri mukinnyi wese babaga bari gukina, yamubuzaga amahoro bitewe n’uwo ari we, bisobanuye ko yabanzaga gufata umwanya wo kwiga abakinnyi bagiye guhura.

Yagize ati “Natangiraga kumwigaho nkareba uko yitwara. Najyaga kureba amateka ye, nkanumva intego afite izo ari zo. Nigaga igituma yumva atekanye, ndetse n’igituma yumva adatekanye. Nyuma yo kubimenya, namukoraga icyo nshatse, nkamukubita ahababaza mu gihe nyacyo.”

Mbere gato yo gusohora igitabo cye, Kobe Bryant yavuze ko muri make Mamba Mentality, bivuze “kugerageza ibishoboka byose ukaba wowe nyawe kugeza ubwo nta wundi wowe usigaye”.

Imitekerereze ya Mamba Mentality, Kobe yayisigiye na LeBron James, umwe mu bihangange Isi isigaranye mu mukino wa Basketball.

Mu gitabo cye, Kobe avuga uburyo yigeze gukina mu ikipe imwe na LeBron James bakinira ikipe y’igihugu, Team USA, akabona uburyo yitwara nabi akamuhindura akoresheje Mamba Mentality.

Kobe yagize ati “Intego yanjye buri gihe yabaga ari ukubabaza uwo duhanganye. Ikintu cy’ingenzi njye na LeBron twaganiriye ni iyo mitekerereze yo kubabaza uwo muhanganye. Ndibuka hari ubwo twari turi gukina nabi, naje mu rwambariro tugiye mu karuhuko, mbabaza igituma twitwara nabi. Mu gice cya kabiri, LeBron yakoze ibidasanzwe, yazanye indi mitekerereze yo gutsinda. Guhera ubwo akina agamije kurusha abandi.”

Igitabo cya Kobe Bryant cy’amapaji 208 kiboneka mu nzu zigurisha ibitabo hirya no hino ku Isi no ku mbuga za internet zigurisha ibitabo nka Amazon.

Kobe Bryant wari ufite imyaka 41, yasize umugore n’abana batatu.

Igitabo Black Mamba gikubiyemo amayeri Kobe Bryant yakoresheje ngo abe igihangange muri Basketball
Kwiga neza uwo bahanganye ni rimwe mu mabanga yatumaga Black Mamba ahora ku isonga
Bryant mu myaka 20 yose yakiniye LA Lakers
Kobe Bryant kuva ku munsi wa mbere yanze ko hagira umuntu n'umwe umugereranya na Michael Jordan
Kobe Bryant yabanzaga kwiga neza ku bakinnyi bahanganye, akamenya intege nke zabo
Aha Kobe yari kumwe na Shaquille O'Neal bakinanye muri LA Lakers
Kobe mu gitabo cye avugamo uburyo yahinduye imikinire ya LeBron James, umwe mu bakinnyi beza Isi yagize muri Basketball mu myaka 17 ishize
Kobe Bryant yavuye ku isi afite imyaka 41

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza