Senateri Mugesera yasohoye igitabo gisobanura uko Revolisiyo yo mu 1959 yapfubye

Yanditswe na Ferdinand Maniraguha
Kuya 4 Kanama 2018 saa 11:12
Yasuwe :
0 0

Senateri Antoine Mugesera kuri uyu wa Gatanu yasohoye igitabo gishya ‘Rwanda 1959-1962, La Révolution manquée’ gisobanura uburyo impinduramatwara yo mu 1959 yiswe ‘revolisiyo’ atari yo kuko icyo impinduramatwara ziba zigamije kitagezweho.

Iki gitabo kigizwe n’ibice bitanu, kije gikurikira ibindi bitabo by’amateka bitanduknye Mugesera yagiye yandika ku Rwanda.

Gitangira kivuga ku mateka ya Mutara III Rudahigwa, umwami wategekanye n’abakoloni akaza gupfa amarabira mu mwaka wa 1959, ari mu nzira yo gushakira u Rwanda ubwigenge.

Muri iki gice Mugesera asobanura neza amateka ya Rudahigwa, ibyo yabashije kugeraho n’imbogamizi yagiye ahura nazo.

Iki gitabo Mugesera yacyanditse yifashishije inyandiko za bamwe mu bagize uruhare muri iyo revolisiyo nka Kayibanda Grégoire, Musenyeri Perraudin na Makuza Anastase, ari nabyo biha igitabo cye ingufu z’uko ibyanditswemo ari byo.

Guhera mu myaka ya 1957, Kayibanda n’abandi bahutu bari abanyabwenge batangije inkubiri bitaga ko igamije kubohora rubanda rugufi rwari rwarakandamijwe n’ubwami.

Mugesera avuga ko ikosa rikomeye bakoze ari naryo ryatumye iyo revolisiyo itagerwaho nubwo bo bavugaga ko bayigezeho, ngo ni uko bashyize imbere irondobwoko, bigahinduka guharanira kwigobotora kw’abahutu aho kuba kwigobotora kw’abanyarwanda bose.

Ubwo yamurikaga igitabo cye kuri uyu wa Gatanu yagize ati “Bashoboraga gukuraho Rudahigwa ariko ntibashyireho irondamoko.Ubwami nta gihe butavuyeho ariko ikibazo bimitse irondamoko. Nta cyerekezo cy’abashaka revolisiyo bari bafite. Iyo batimika irondamoko bari kubona ubutegetsi ariko ntihabe ibyago nk’ibyo twagize. N’abahutu ntibababohoye, babatamitse uburozi bw’irondamoko.”

Yakomeje avuga ko ikibazo u Rwanda rwagize ari uko habuze abashaka impinduramatwara nyabo baharanira ineza y’abanyarwanda bose.

Ati “Iyo haza izindi ngufu zitari iza Rukeba, Kayibanda, Gitera hakaza abavuga bati ‘twibohoze abakoloni’, byari gufata igihe ariko byari gushoboka. Ntabwo Ababiligi bakunze Kayibanda, bakunze uwabahaga icyizere ko bazakomeza gutegeka. N’abatutsi bari kubona ubwigenge iyo baha icyizere Ababiligi, bati ‘ibyo mushaka ko dukora tuzabikora.”

Mugesera agaragaza ko abanyarwanda bagize ibyago byo kurogwa bakabura ubarogora mbere y’uko uburozi bubahitana.

Ati “Kayibanda ntiyakundaga u Rwanda, ni byo byago twagize. Ashobora kuba yarakundga abahutu ariko ntiyigeze akunda u Rwanda. Baraturoze tubura uturogora. Badutamitse irondamoko bararibagarira kugeza kuri Jenoside yakorewe Abatutsi.”

Rucagu Boniface umwe mu bagize Urwego rw’Igihugu rw’Inararibonye yashimye igitabo cya Mugesera, avuga ko nubwo mu 1959 nta revolisiyo yabaye, nyuma FPR Inkotanyi yaje kubigeraho kandi neza.

Yagize ati “Ubu revolisiyo yarakozwe, FPR Inkotanyi yarayikoze kuko yaje ikagarura ubumwe bw’abanyarwanda, ikagarura umuco, ubu turi muri gahunda ya Ndi Umunyarwnada ahubwo twashyiramo imbaraga kugira ngo revolisiyo yakozwe na FPR Inkotanyi ikomereza aho.”

Minisitiri w’umuco na siporo, Uwacu Julienne yavuze ko mu myaka ya 1959 abanyarwanda babuze ubarengera igihe bari bamukeneye.

Yagize ati “Twabuze uduhuza kuko abakoloni bo bashakaga kurengera inyungu zabo. Icyo gihe nibwo twari dukeneye uvuga ngo umunyarwanda we araba uwande, ntitwamubonye. Ingaruka zabyo twarazibonye.”

Yashimiye Mugesera ku bw’igitabo yasohoye avuga ko ari ishuri ku bakiri bato rizabafasha kumenya byimbitse amateka y’u Rwanda, aho rwatsikiye n’icyakorwa ngo rutahasubira.

Igitabo Rwanda 1959-1962, La Révolution manquée’ cyacapwe na Izuba Editions, kiragura 7000 by’amafaranga y’u Rwanda mu masomero atandukanye mu gihugu.

Senateri Mugesera yavuze ko revolisiyo abanyarwanda bari bakeneye atari yo babonye
Minisitiri Uwacu Julienne (hagati) ari mu bitabiriye imurikwa ry'igitabo cya Mugesera
Igitabo gishya cya Mugesera, ‘Rwanda 1959-1962, La Révolution manquée’
Hari ibindi bitabo bitandukanye Mugesera yanditse ku mateka y'u Rwanda
Umwe mu bagize Editions Izuba bafashije Mugesera kunononsora iki gitabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza