Scholastique Mukasonga yasohoye igitabo kivuga kuri Kibogo wafatwaga nk’umukiza w’abanyarwanda

Yanditswe na Twarabanye Venuste
Kuya 14 Werurwe 2020 saa 03:39
Yasuwe :
0 0

Umunyarwandakazi Scholastique Mukasonga yasohoye igitabo yise ‘Kibogo est monté au ciel’ kivuga uko Kibogo woherejwe n’Imana nk’umukiza w’u Rwanda yagiye mu Ijuru.

Mbere y’uko abamisiyoneri bazana inkuru nziza ya Yezu i Rwanda bivugwa ko uwo Kibogo ari we wafatwaga nkuko Abakristu bafata Yezu .

Scholastique Mukasonga ni Umwanditsi w’umunyarwanda abakunda gusoma ibitabo n’abakurikiranira hafi ibijyanye na sinema bibuka filimi Notre Dame du Nil ishingiye ku gitabo cye yasohotse muri Gashyantare 2020.

Igitabo cya Mukasonga ’ Kibogo est monté au Ciel’gifite paji 160. Cyasohowe n’inzu isohora ibitabo yo mu Bufaransa, éditions Gallimard. Ni ubwoko bw’ibitabo by’inkuru ndende mpimbano cyangwa se Roman (Novel).

Ugendeye ku mateka ya Kibogo uvugwa mu mateka y’u Rwanda wumva ari igitabo kigaragaza ko imyemerere cyangwa ibisa n’ibyo abanyamadini bigisha kuri Yezu hari uwari uhari kandi abifite mbere.

Agace gasa no gutera amatsiko yashyize ku rubuga Gallimard, kabaza uwaba yaragiye mu Ijuru hagati ya Kibogo w’i Rwanda na Yezu yita uw’abamisiyoneri ndetse nyuma yo kujya mu Ijuru akagirira abantu ineza.

Ati "Ari Kibogo, umuhungu w’umwami na Yezu w’abamisiyoneri ni nde wazamutse mu Ijuru? wongeye kugusha imvura, agakiza abantu amapfa n’inzara?"

Akomeza yibaza niba abantu bakwiye kwizera inkuru cyangwa imigani baciriwe n’abera kurusha kwizera izo babwiye n’ababyeyi babo amanywa n’ijoro. Ati "Ese birakwiye ko twakwizera imigani twaciriwe n’abagabo b’abera b’ubwanwa burebure cyangwa twakwemera iyo ababyeyi bacu baducira buri mugoroba."

Igitabo cyitwa Le Rwanda ancien cyanditswe na De Lacger, kuva ku rupapuro rwa 167 kugeza ku rwa 68 kigaragaza ko mbere y’umwaduko w’ubukirisitu mu Rwanda hari imyizerere gakondo idafite aho itandukaniye n’ubukirisitu ndetse ikaba yari ifite akarusho ko kuba ishingiye ku muco gakondo w’abanyarwanda.

Ayo makuru yemeza ko mu Rwanda hahoze inkuru nziza y’“umukiza (umutabazi) Kibogo", yaje guteshwa agaciro n’inkuru nziza y’“umukiza (umutabazi) Yezu“ yazanywe n’abakoloni.

Mu Rwanda rwa kera umutabazi yari umuntu wemeraga gutanga amaraso ye ku bushake akameneka ku butaka bw’umwanzi bigatuma umwica cyangwa uwo amenekeye mu gihugu atsindwa.

Ibi ngo byaba byaratangiwe na “Kibogo“, izina ry’Ikinyarwanda rikomoka ku nshinga kubogora ihwanye n’iyo mu gifaransa bita “sauver“, “redresser“ cyangwa se ‘Gutabara’.

Igitekerezonkomoko cy‘umutabazi Kibogo mu Rwanda

Mu mateka y’u Rwanda dutangira kumva iby’Umutabazi bwa mbere muri wa mugani w’Ibimanuka mu gice cya wo cy’Umugani uvanze n’igitekerezo.

Lacger yanditse agira ati “Ubwo Kigwa n’umuvandimwe we Mututsi na mushiki wabo Nyampundu bacibwaga mu ijuru bitewe n’icyaha cya nyina wamennye ibanga ry’Imana, bururukiye mu Mubali bavuye mu ijuru. Bagera mu Mubali rero, bibonye bambaye ubusa bakennye. Hashize iminsi icumi bafite agahinda gakabije, bafite inzara, inyota n’imbeho bifuza gupfa gusa, bambaza Imana bati: Mana y’u Rwanda tugirire impuhwe utubabarire. Muri ako kanya inkuba ikubitira mu kirere maze umurabyo ukongeza ibyatsi byumye maze babona agashirira baragafatisha babona umuriro barota.”

“Hashize iminsi ijuru rirakinguka babona hamanutse impeke, ibishyimbo, amasaka n’insina y’imineke. Hashize iminsi na none mu ijuru hamanuka ikibumbe cy’ubutare bwo gucuramo ibyuma n’amasuka bati: Imana ni yo itwoherereje ibi byose”.

Ngo icyo gihe maze ni bahinze batihingishije! Muri ako karere bamanukiyemo, hari hatuye imiryango itatu: Abasinga, Abazigaba n’Abatwa bo mu ishyamba. Abo bantu bose bari barakomotse mu ijuru aho ba sekuruza bari barirukanywe bitewe n’icyaha bahakoreye. Kubera ko bo batari barigeze basaba Imana imbabazi, ni cyo cyatumye ibarekera mu butindi n’ubukene. Abo baje nyuma nibo babatungishije.

Ubwo Kibogo yicwaga n’abagome nyuma Imana ikamuzura

Kugira ngo abo bantu batazarimbuka bagashiraho, byatumye Imana yohereza Umutabazi Kibogo aza ku ruhembe rw’umurabyo arababwira ati “Mwitinya nimuhumure ni Imana ibantumyeho! Nzaba umuhuza wanyu n’Imana kandi icyo muzasaba cyose niba ari cyiza Imana izakibaha!. Umutabazi ni impongano y’Imana ku bana bayo bayiringira.”

Nyuma ariko abagome ngo baramufashe bamumanika ku giti bakoresheje ibyuma bisongoye baramwica. Imana yaje komora ibikomere bye imugaruramo ubuzima hanyuma Imana yohereza umurabyo umuzamura mu kirere asubira ku Mana.

Lacger yavuze ko iyo u Rwanda rugize amakuba, umuzimu w’Umutabazi aza gutura muri umwe mu bana b’Umwami agahinduka Umutabazi agakiza igihugu.

Bavuga ko abatambyi bo mu Mubali aribo bamubambye bakamwica ariko ko “Imana yomoye ibikomere bye imugaruramo ubugingo hanyuma yohereza n‘umurabyo umuzamura mu kirere asubira ku Mana”.

Igitabo gishya cya Mukasonga 'Kibogo est monté au ciel' cyasohorewe mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .