Padiri Amerika yifashishije abarimo Pasiteri Mpyisi mu gitabo gicukumbura inyigisho z’ubuyobe zihejeje benshi mu bujiji

Yanditswe na Ferdinand Maniraguha
Kuya 30 Mata 2021 saa 04:09
Yasuwe :
0 0

Ni gake wajya mu rusengero ngo uruvemo umwigisha atavuze ko isi iri mu bihe bya nyuma, ko nta gihe gisigaye ngo nyir’umurima aze gusarura imbuto ze. Abakuzeho gato bazi nyirantarengwa isi yagiye ihabwa guhera mu mwaka wa 2000 ariko ikanga ikazisimbuka uyu munsi ubuzima bukaba bugikomeje.

Mu Rwanda kuri ubu habarurwa amadini asaga ibihumbi 2000 nyamara mu myaka nka 20 ishize ntiyarengaga 500. Uko amadini yagiye yiyongera ni nako inyigisho ziyitangwamo zitandukanye. Kuri ubu idini ridafite abahanuzi bareba ibizaba ku bayoboke bayo, akenshi iryo rifatwa nk’iryasigajwe inyuma n’amateka. Umwigisha w’ijambo ry’Imana utazi guhanura imodoka za V8, amafaranga n’inzu zihanitse uwo afatwa nk’utakijyanye n’igihe.

Hari benshi baheze mu rujijo, batakimenya gutandukanya abanyabinyoma n’abigisha ukuri, nubwo bose bitwaza ibitabo bitagatifu nka Bibiliya na Quran ngo bumvishe ababakurikira imvano y’ukwemera kwabo.

Ibyo nibyo byateye Padiri Amerika Victor gukora ubushakashatsi ku bintu bihejeje benshi mu rujijo muri iyi minsi cyane cyane abayobotse amadini, kugira ngo basobanukirwe neza ishingiro ry’imyererere yabo aho gutwarwa buhumyi.

Iki gitabo yise “Muzabamenyera ku mbuto bera” yifashishijemo n’abandi bigisha b’ijambo ry’Imana bo mu yandi madini barimo Rev. Pasteur Ezira Mpyisi, Rev. Pasteur Japhet Sengarambe, Padiri J.D Habimana Matabaro, Soeur Jacqueline Mukesharugo, Emmanuel Muhire na Bernard Uwamahoro.

Padiri Amerika yabwiye IGIHE ko yanditse iki gitabo nyuma yo kubona ubwiyongere bukabije bw’amadini ubona butajyana n’ubwiyongere bw’ubumuntu cyangwa urukundo mu bantu.

Ati “Amadini amwe avuka nyuma y’imvururu zishingiye ku baharanira inyungu ku giti cyabo, andi avuka afite icengezamatwara rishingiye ku myemerere y’ubuhanuzi n’ibitangaza bidasohora, andi akaduka agamije kurangaza abantu no kubabuza gukora no kwiteza imbere ngo kuko isi igiye kurangira ku munsi uyu n’uyu. Ikibabaje kurusha ibyo byose ni uko hari abafata gushinga idini nko kwishakira imibereho (Business), bityo iby’Imana bikigishwa mu marangamutima n’amateka y’abantu gusa.”

Yavuze ko inyito y’igitabo “Muzabamenyera ku mbuto bera” yaturutse ku magambo ya Yezu yavuzwe ubwo yaburiraga abigishwa be kwitondera abahanurabinyoma babasangaga, inyuma basa n’intama, naho imbere ari ibirura by’ibihubuzi (reba Mt 7, 16-20).

Ati “Ibi turabibona kuko n’uyu munsi hari benshi bavuga ko bigisha Inkuru Nziza, abandi bakavuga ko bakora ibitangaza, abandi bikiyita abahanuzi. Hari abantu benshi bitwa abakristu, ariko si benshi babayeho gikristu. Abo rero, twabagereranya n’abo Yezu yita indyarya.”Mk 7, 6-7).

Padiri Amerika nubwo avuga ko kugira idini umuntu abarizwamo ari byiza, bidakwiriye ko ari ryo abantu bubakiraho amizero yabo kuko atari ryo rizabajyana mu ijuru. Yavuze ko umusaruro w’ibyo bigishirizwa muri ayo madini wakabaye wigaragaza mu mbuto bera mu buzima busanzwe.

Padiri Amerika Victor avuga ko igitabo 'Muzabamenyera ku mbuto bera' kitagamije kuvana abantu mu madini yabo ahubwo ari ukubasobanurira imvano y'ibyo bemera

Nubwo Padiri Amerika ari umuyoboke wa Kiliziya Gatolika, yavuze ko igitabo cye kitagenewe abasengera mu madini runaka, ahubwo ko ari icya buri wese ari nayo mpamvu yifashishije ubutumwa n’ubushakashatsi bw’abasengera mu yandi madini.

Ati “Iki gitabo kigenewe abantu bose, abakristu n’abatari bo, abasenga n’abadasenga, by’umwihariko abigisha abandi iby’iyobokamana. Aho gukwirakwiza inyigisho z’ubuyobe n’iterabwoba, abantu bose baharanire kunga ubumwe nk’uko Yezu Kristu yabidusabiye ku Mana (Yoh 17). Bityo dushyire imbere ibiduhuza, dusenye ibidutandukanya; nihaba n’ibidutandukanya mu myemerere, bitubere ubukungu bwo kuzuzanya no gusobanukirwa kurushaho icy’ukuri, igifite akamaro n’igikwiye kubahwa.”

Yavuze ko kandi iki gitabo kigamije gukangurira abantu kwera imbuto nziza aho bari hose aho kujarajaza imyemerere yabo, kuko Imana itajya yimuka. Kigamije kandi kubafasha gusobanukirwa n’ukwemera kwabo ngo babashe kuguhamya mu bikorwa byiza, aho kuba mu magambo.

Icyakora, Padiri Amerika wacyanditse yavuze ko kitagamije guhindura abantu ngo bave mu idini iri n’iri bajya mu rindi, ahubwo kigamije gufasha abakristu kwimuka muri bo ubwabo bava mu muntu w’igisazira bagana umuntu mushya wishimiwe n’Imana.

Igitabo “Muzabamenyera ku mbuto bera’ kigizwe n’ibice bine bikubiyemo inyigisho zitandukanye. Hari nk’inyigisho yiswe “Muzabamenyera ku mbuto bera” yateguwe na Pasiteri Japhet Sengarambe wo mu Itorero rya ADEPR. Nyuma yo gutanga ingero nyinshi zigaragaza ko umuntu aziturwa ibyiza yakoze, ashishikariza abantu bose ko bakwiye kumenyekanira ku bikorwa byabo byiza aho gushyira imbere amadini cyangwa amatorero yabo, dore ko hari n’abayakoresha nk’iturufu yo kwitaka gusa cyangwa gusebya abandi.

Harimo inyigisho yiswe “Gusoma Ijambo ry’Imana bunyuguti” yateguwe na Pasiteri Ezira Mpyisi wo mu Itorero ry’Abadiventisti b’umunsi wa Karindwi. Pasiteri agaya abantu basobanura Bibiliya nabi, bamwe bakayifata nk’igitabo gisanzwe mu bindi, abandi bakayivugisha ibyo itavuga kubera ubujiji cyangwa ubunebwe mu gusobanura Ibyanditswe Byera. Mu gusobanura uburyo bwiza bwo gusoma Bibiliya, Pasiteri agenda atanga ingero z’uburyo bwiza bwo kumva no gusobanura Ibyanditswe Byera.

Harimo izindi nyigisho nk’iyiswe “Ukwemera nagukomeyeho” ya Sr Jacqueline Mukesharugo , Umubikira w’umurangarukundo., inyigisho “Ntewe ishema no kuba umukristu Gatolika’ yateguwe na Emmanuel Muhire wo muri Communaute de l’Emmanuel (i Nyanza) n’izindi.

Muri iki gitabo kandi harimo ibisuzibo by’ibibazo byabajijwe mu iyogezabutumwa rivuguruye ryabereye muri Paruwasi ya Nyabinyenga muri Diyosezi ya Kabgayi mu 2017 rikitabirwa n’abakristu bo mu madini n’amatorero atandukanye.

Bimwe mu bibazo byabajijwe bisubizwa muri iki gitabo harimo nko kumenya impamvu Kiliziya Gatolika yiyambaza abatagatifu, Impamvu Bikira Mariya ahabwa agaciro gakomeye muri Kiliziya, Impamvu muri Kiliziya babatiza abana bato aho kubareka ngo bakure bazihitiremo, impamvu kuboneza urubyaro muri iki gihe ari ngombwa nubwo Aburahamu yasezeranyijwe kororoka akagwira nk’umusenyi wo ku nyanja, Iby’umubare 666 ukunze guhuzwa na Kiliziya Gatolika na Papa, Igihe isi izashirira n’ibindi.

Padiri Amerika avuga ko ibyo byose yabiteguriye kugira ngo abantu bamenye aho bahagaze mu kwemera ariko byose bikabanzirizwa no gusobanukirwa.

Ati “Nitutemera ntabwo tuzasobanukirwa, ariko na none dukeneye gusobanukirwa kugira ngo twemere. Njye sinandika kuko hari ikibaye, nandika kugira ngo hagire ikiba, ariko na none ikiriho ni cyo kimpa igitekerezo”.

Igitabo ‘Muzabamenyera ku mbuto bera’ kizamurikwa ku mugaragaro kuri uyu wa Gatandatu tariki 1 Gicurasi 2021 muri Centre Saint Paul i Kigal.

Padiri Amerika nubwo avuga ko kugira idini umuntu abarizwamo ari byiza, bidakwiriye ko ari ryo abantu bubakiraho amizero yabo kuko atari ryo rizabajyana mu ijuru
Igitabo ‘Muzabamenyera ku mbuto bera’ kizamurikwa ku mugaragaro kuri uyu wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .