00:00:00 IGIHE NETWORK KN KINYARWANDA EN ENGLISH FR FRANCAIS

Mfuranzima agiye kumurika ‘The Broken’, umuzingo w’amateka y’u Rwanda ku bavutse nyuma ya Jenoside

Yanditswe na Ferdinand Maniraguha
Kuya 30 Ukuboza 2021 saa 10:17
Yasuwe :

Umushakashatsi akaba n’umwanditsi w’ibitabo, Mfuranzima Fred, yamaze kwandika igitabo yise ‘The Broken’ kigaruka ku mateka y’u Rwanda, cyitezweho gufasha by’umwihariko urubyiruko rwavutse nyuma ya Jenoside yakorewe Abatutsi.

Igitabo cy’amapaji 194 cyanditswe imyaka ibiri, cyerekanywe ku rwego rw’ibanze mu minsi ishize (Prelaunch) ku nkunga ya Ambasade ya Israel mu Rwanda.

Mfuranzima yabwiye IGIHE ko iki gitabo yacyise ‘The Broken’ (Icyamenetse) “kuko ntangira ubushakashatsi nashakaga kumenya icyangiritse kugira ngo igihugu cyacu kigere ku mateka mabi nka Jenoside yakorewe Abatutsi. Nasanze hari ibyo twari dufite byiza mu mateka byangiritse kubera impamvu zinyuranye zikubiye mu gitabo.”

Mu gitabo umwanditsi agaragaza amateka y’u Rwanda mbere y’ubukoloni, mu gihe cy’ubukoloni, kuri Repubulika ya mbere n’iya kabiri, itegurwa n’ishyirwa mu bikorwa rya Jenoside yakorewe Abatutsi n’urugamba rwo kubohora u Rwanda.

Agaruka kandi ku nzira y’ubumwe n’ubwiyunge, hakiyongeramo n’ibitekerezo by’umwanditsi mu ishusho y’urubyiruko rwavutse nyuma ya Jenoside rushaka kwiga amateka y’igihugu cyarwo.

Mfuranzima Fred yavuze ko mbere yo kwandika iki gitabo, yahuye akanaganira n’abantu basaga 500 bazi amateka y’u Rwanda ndetse hagasurwa n’ahantu hatandukanye ndangamateka kugira ngo habikwe amakuru ahagije yifashishijwe mu kwandika igitabo.

Ambasaderi wa Israel mu Rwanda, Dr Ron Adam yashimiye Mfuranzima ku muhate we wo kwandika ku mateka yagejeje kuri Jenoside yakorewe Abatutsi.

Dr Ron yavuze ko impamvu Jenoside yakorewe Abatutsi yashobotse, ari uko abantu batakurikiranye ngo bashakishe ububi n’impamvu ya Jenoside yakorewe Abayahudi, bityo ko na Jenoside yakorewe Abatutsi ikeneye kuvugwa no kwandikwaho kenshi kugira ngo itazibagirana abantu bakirara.

Yahaye umukoro urubyiruko nk’abayobozi b’ejo hazaza, avuga ko byaba ari ikibazo kugira abayobozi badasobanukiwe amateka y’igihugu cyabo.

Ati “Ni byiza ko abakiri bato bayamenya, bakandika kugira ngo ejo bitazabagora kwisobanura kubo bazabyara babigisha amateka. Kwigira ku bacitse ku icumu, n’abakoze Jenoside, bituma abakiri bato basobanukirwa neza ikibi cyabaye n’uko cyakwirindwa ahazaza.”

Igitabo ’The Broken’ kigaragaza urubyiruko runyotewe n’uko Isi yabaho mu mahoro azira umwiryane ushingiye ku moko, kandi kigaruka ku ihungabana rihererekanwa kuva ku bakuru rijya kubato (Transmission of trauma).

Biteganyijwe ko iki gitabo kizamurikwa ku mugaragaro muri Werurwe 2022, gusa ab’inkwakuzi bashaka kugisoma bagisanga ku icapiro Imfura Heritage Rwanda.

Ambasaderi Dr Ron Adam (iburyo) yashimiye Mfuranzima ku musanzu we mu gufasha urubyiruko kumenya amateka
Ambasaderi Dr Ron Adam yavuze ko ari byiza gukomeza gukora ubushakashatsi kuri Jenoside yakorewe Abatutsi kugira ngo urubyiruko rutazagera aho rwirara
Mfuranzima yiteze ko igitabo cye kizafasha urubyiruko by'umwihariko rwavutse nyuma ya Jenoside
Umwanditsi Marie Goretti Mukanzigiye atanga igitekerezo
Hatanzwe ibitekerezo bitandukanye
Bamwe mu bitabiriye umuhango w'ibanze wo kumurika igitabo 'The Broken'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .