Jenny Ohlsson wabaye Ambasaderi wa Suède mu Rwanda yashimye igitabo cya Mukasonga

Yanditswe na Uwiduhaye Theos
Kuya 9 Ugushyingo 2020 saa 04:14
Yasuwe :
0 0

Jenny Ohlsson wabaye Ambasaderi wa Suède mu Rwanda, yagaragaje igitabo cya Mukasonga Scholastique cyitwa ‘Inyenzi’ (Cockroaches), nka kimwe mu byo abantu batari abanyarwanda bashobora gusoma bagasobanukirwa amateka y’u Rwanda cyane cyane ayerekeye Jenoside yakorewe Abatutsi mu 1994.

Yabitangaje nyuma y’ubutumwa bwashyizwe ku rukuta rwa Twitter na Prof Nicki Hitchcott, wigisha muri Kaminuza ya St Andrews muri Écosse, wavugaga ko iki gitabo agiye kukiganirizaho abanyeshuri yigisha.

Ubu butumwa mu batanzeho ibitekerezo harimo na Jenny Ohlsson wahise avuga ko iki gitabo ari kimwe mu byo yasomye agasobanukirwa ibyabereye mu Rwanda.

Ati “Wowe n’abanyeshuri bawe muri abanyamahirwe! Iki ni kimwe mu bitabo nkunda byimazeyo bivuga ku Rwanda. Ni igitabo cyiza cyane ku bantu batari abanyarwanda, kuko bagisoma bakumva byinshi cyane. Warakoze Mukasonga.” Mukasonga yahise amushimira ati “Murakoze!”

Iki gitabo cya Mukasong yise ‘Cockroaches’ cyangwa se ‘Inyenzi’ cyangwa ‘les cafards’ mu Gifaransa cyagiye hanze mu 2006 cyashyizwe hanze na Éditions Gallimard. Mu 2016 cyashyizwe mu Cyongereza na Archipelago Books hifashishijwe uwitwa Jordan Stump.

Kivuga ku nkuru y’ubuzima bwe bwite ijyanye na Jenoside yakorewe Abatutsi mu 1994.

Mukasonga yanditse ibitabo bitandukanye birimo ‘La femme aux Pieds nus’ cyo mu 2008, kirimo ubutumwa bwo kurwanya irondaruhu, akarengane n’ibindi.

Yanditse kandi ‘L’Iguifou, Nouvelles Rwandaises’ mu 2010 na ‘Notre-Dame du Nil’ cyo mu 2012 cyanamumenyekanishije cyane, ndetse kinakinwamo filime yacyitiriwe. Yanditse kandi ‘Coeur Tambour’ cyo mu 2016, ‘Un si beau diplôme’ cyo mu 2018 ndetse na ‘Kibogo est monté au ciel’ giherutse gusohoka muri uyu mwaka.

Iki cya nyuma kigaruka kuri Kibogo woherejwe n’Imana nk’umukiza w’u Rwanda, n’uburyo yasubiye mu Ijuru. Ni igitabo gifite paji 160, cyasohowe n’inzu y’ibitabo ya éditions Gallimard.

Igitabo ‘Notre-Dame du Nil’ cyasohotse mu 2012, ni kimwe mu byamenyekanishije Mukasonga cyane kuko usibye gukinwamo filime, cyanahawe ibihembo bikomeye ku rwego mpuzamahanga birimo ‘Prix Ahmadou Kourouma’ na ‘Prix Renaudot’.

Mu Ukwakira, Mukasonga ari mu bahatanira igihembo cyitiriwe Nobel mu cyiciro cy’ubuvanganzo, aho ari mu bahabwaga amahirwe ariko kiza kwegukanwa n’umusizi w’Umunyamerikakazi, Louise Glück. Iki gihembo cyatanzwe na Swedish Academy, ikigo gishinzwe guteza imbere umuco muri Suède.

Jenny Ohlsson wacyeje igitabo cye, yabaye Ambasaderi wa Suède mu Rwanda kuva mu 2016 kugeza mu 2019 ubwo yahabwaga izindi nshingano agasubira mu gihugu cye, mu bijyanye n’intego zigamije iterambere rirambye, SDGs, aho ari intumwa ya Suède mu ishyirwa mu bikorwa ry’izo ntego mu cyerekezo 2030.

Si intyoza mu Kinyarwanda ariko azi amagambo make nka ‘Murakoze’, ‘Mwaramutse’, ‘Mwiriwe’, ‘Ni meza’, ‘Amakuru’, ‘izuba’, ‘ibanga’ na ‘Ndabakunda’.

Uko yiyumvamo u Rwanda uwabivuga ntiyabirangiza kuko guhera mu 2007 kugeza mu 2009, ubwo yabaga umudipolomate wa mbere wa Suède ukorera mu Rwanda yatangiye kuryoherwa narwo kuva ubwo.

Yaratwise asubira muri Suède, ahabwa akazi mu Biro bya Minisitiri w’Intebe ashinzwe ibijyanye n’ububanyi n’amahanga n’ingabo, ariko nyuma aza gusaba kugaruka gukorera mu Rwanda ari nabwo yahise ahabwa inshingano zo kuba Ambasaderi.

Uretse kuba mu gihe yari ari mu Rwanda yarahabwaga buri kimwe n’igihugu cye kimufasha mu buzima bwe bwa buri munsi, yahisemo kuhagura ikibanza anatera imbuto zirimo avoka zidakunze kuboneka byoroshye iwabo ndetse ateganya kubakamo inzu.

Iki kibanza cye giherereye i Bumbogo mu Karere ka Gasabo mu Mujyi wa Kigali, ahitaruye umujyi.

Muri Kanama 2019, Perezida Kagame yakiriye Ambasaderi Ohlsson wari usoje manda y'imyaka itatu mu Rwanda
Umunyarwandakazi Scolastique Mukasonga amaze igihe kinini yandika ibitabo kandi akomeje guhesha ikuzo u Rwanda ku ruhando mpuzamahanga
Ambasaderi Ohlsson n'u Rwanda n'ipata n'urugi ndetse akunze gukurikirana byinshi birimo no gusoma amateka y'iki gihugu yihebeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .