Iyo badatsembwa tuba dutwenga: Bamporiki yasobanuye aho akomora inganzo

Yanditswe na IGIHE
Kuya 6 Mata 2019 saa 11:54
Yasuwe :
0 0

Mu 1994 u Rwanda rwacuze umwijima, Abatutsi bahigishwa uruhindu bicwa umusubirizo mu gihe cy’iminsi 100 gusa abarenga miliyoni bavutswa ubuzima n’abo bitaga abaturanyi babo bahanye inka n’abageni. Ibi byose byabaye amahanga arebera kugeza ubwo ingabo zari iza RPA, zahagaritse Jenoside zikagarurira abanyarwanda ubuzima, ubu bakaba badamaraye.

Amateka ashaririye u Rwanda rwanyuzemo, ni inzira ndende yasize ibikomere ku mitima y’abanyarwanda ariko ntibaheranywe nabyo ahubwo byashibutsemo imbaraga z’ubumwe, ubwiyunge no kwiyubaka.

Umuhanzi w’umukinnyi w’amafilime n’amakinamico akaba na Perezida w’Itorero ry’Igihugu, Edouard Bamporiki, ni umwe mu batanga umusanzu wo kubaka u Rwanda akoresheje inganzo yomora imitima, igashimangira isano Abanyarwanda basangiye isumba iy’amaraso ari yo ‘Ndi Umunyarwanda’.

Mu mpera za Kamena 1994, bamwe bahunga abandi bahinga, mu misozi ya Nyamasheke werekeza kuri Nyungwe, Inganzo yaganje uwari umwana mu mashuri abanza i Remera muri we hava igisigo yise "Iyo Badatsembwa Tuba Dutwenga" ubu ni Umugabo ukomeje Inganzo nk’umusanzu we mu rugamba rwo Kubaka u Rwanda.

Mu gihe Abanyarwanda bagiye kwinjira muri ibi bihe bikomeye byo kwibuka ku nshuro ya 25 Jenoside yakorewe Abatutsi, IGIHE yaganiriye na Bamporiki ku gisigo yise ‘Iyo Badatsembwa Tuba Dutwenga’.

IGIHE: Iyi nganzo yawe uyikomora hehe?

Bamporiki: Inganzo yanjye ikomoka mu bihe by’amage, wayishakira kure ukayisanga mu nzu y’Abasinga nkomokamo.

IGIHE: mu gihe wandikaga ‘Iyo Badatsembwa’ washakaga kuvuga iki?

Bamporiki: Nari nka wa muntu urwana n’ibyahise adafite icyo yabikoraho, nari umwana ushaka kurwana n’abagabo, ibitekerezo byanjye byari byangejeje ku mpera y’Isi ariko ntazi inzira nanyuzemo...byose nabitewe n’inkuru zabo twiganaga bari barishwe cyane cyane iya Nsabimana bahimbaga Sekabwa. Ubwo twari mu ishuli rigwije ishusho yabo Abakoze Jenoside bifurizaga gutura u Rwanda bonyine.

Bamporiki ubwo yasinyaga mu bitabo bye byari bimaze kugurwa mu cyitwa Mitingi Jenosideri

IGIHE: Birumvikana ko bitari byoroshye, nyuma waje kwandika igitabo ‘Icyaha kuri bo Ikimwaro kuri njye" kandi uti "Igiti mwateye dushaririwe n’Imbuto cyeze." washakaga kuvuga iki?

Bamporiki: Nibyo nyine nashakaga kuvuga, wowe se abagabo n’abagore bafashe abaturanyi babo barabishe baratsembye bararangije basenya amazu nk’abasibanganya ibimenyetso ngo ejo hatazagira umenya ko higeze kuba abantu, birangiye barahunga abandi barafungwa, abana babo, abanze kuba nkabo aba aritwe dutangira gusobanura umushinga tutanditse yewe tutateye inkunga cyangwa ngo tugire imbaraga zo kuwuburizamo .... hari ikimwaro cyaruta icyo?

None hari icyaha wumvise kuri njye, ariko se ikimwaro wagisiganya nde? Hari ubwo umuntu agira ibyago abamubanjirije bagatoba iriba azakenera kunywa amazi, iteka akazajya abanza kuyungurura. Bateye igiti none cyeze agahinda kadashira, cyeze umubabaro w’ibihe.

IGIHE: Nyuma waje gukora filimi uyita ikote rirerire " long coat " ese washaka kuvuga iki ? Kuki utaryise ikote rigufi?

Bamporiki: Si byiza kugoreka amateka nari kuryita rigufi kandi ryari rirerire? Muri iriya filime nashakaga kugaragaza ko urugendo rwo kubaka u Rwanda rukeneye ubufatanye mva mutima, rukeneye kurenga ibikomere n’ibikomeye, nashakaga kugaragaza ko amateka ya Jenoside atareba abacitse ku icumu gusa, nashaka kugaragaza ko kwibuka bitureba twese, nahamyaga ko nubwo amateka yacu afite byinshi byadutanya ariko aho twerekeje ari hamwe niba koko duhaye agaciro amaraso y’intwari yatumenekewe.

IGIHE: Nyuma wakurikijeho umuvugo uwita " Isake " isake yaje ite mu kwibuka?

Bamporiki: Ubuhanzi buca kure ariko bugataha ku mitima, Isake nashakaga kugaragaza umuntu ufite ubutumwa ariko abantu bimye amatwi bashaka gukoresha ibindi.

Nsanzwe mbika Bakundwa

Nkitwa inkoko rusake

Benshi barya bakunze

Cyane ndyoshya isosi

Nsanganizwa imisango

Simbura n’ibutware

Nkundwa n’ingeri zose...

Mbisabire umusanzu murankize abanyamerwe

Mbanze mbike " kubika" iby’i Rwanda

Abandya babone bandye

Ndabizi maze kugenda

Mwabiceceka mwese

Kandi kubika kwanjye

Kwaduha kubijora

Abejo ntibibajombe......

Ni umuvugo muremure..

Urebye nasabaga ababonye Jenoside batarahigwaga gutanga amakuru nihereyeho.

IGIHE: Waje kwandika Mitingi Jenosideri aha ho wavugaga iki?

Bamporiki: Aha navugaga Inama mbisha yateguriwemo kwica abatutsi, mu gitabo nanditsemo ubuhamya bw’abakoze Jenoside usanga buri wese afite inama yagiyemo iyo niyo nise Mitingi Jenosideri.

IGIHE: Hari aho wavuze ngo ‘Iyo ukomoka kubakomeye’, aba ni bande?

Bamporiki: Naravuze ngo iyo ukomoka ku wakomerekeje abantu akomeye, ntiyomore ibikomere by’abakomerekejwe na Se warukomeye, uko gukomera kwe kongera ibikomere.

Ubutumwa burimo burumvikana abariho uyu munsi nibo bagena uko abazaza ejo bazabaho, iyo mvuga abakomeye buri wese agira aho yibona, niba so atarakomeye mu mibereho y’akazi yarafite imbaraga z’umubiri, ibyo nibyo byakoreshejwe muri Jenoside.

Uyu munsi niba udakomeye mu bijyanye n’akazi ukora cyangwa ibyo utunze, ufite imbaraga zishingiye ku buzima bwiza bikoreshe neza hari uwo uzakiza ibikomere ushobora kuba akurebera ku wo ukomokaho wamukomerekeje.

IGIHE: Warakoze cyane. Ibihangano bitaha twitege iki ?

Bamporiki: Murakoze kunshimira ariko ntacyo ndakora, numva nagakoze byinshi ngo dufashe ababyiruka. Ibihango by’ubutaha natangiye kwandika igitabo cyitwa ‘IBUKU’ nshakisha isano -muzi y’Abanyarwanda. Nzagisohora mu myaka ibiri iri imbere.

IGIHE: Hari ubutumwa wagenera abanyarwanda muri iyi minsi y’icyunamo twinjiyemo?

Bamporiki: Ndabanza gushimira abakiri bato kuko iyo nganira nabo mbona u Rwanda ntabonye ngana nabo. Ndacyari muto nizeye kuzabona ibyiza byinshi biturutse kuri aba bana bazasohoza indoto z’Inkotanyi ntabwo mfite gushidikanya.

Ubutumwa mfite ku babyeyi muri rusange ni ugukomeza kurera neza ndetse icyo bashoboye gukorera abana cyiza cyose bakibakorere niyo bo baba bataragikorewe.

Ndasaba nkomeje ababeshya abana b’u Rwanda bavukira imahanga bakabarera bagoreka amateka ngira nti nimusigeho guhemuka kabili, uroze umwana aba aroze ishyanga, nimureke abana banyu bakunde igihugu cyabo bagikorere niyo mwe byaba byarabananiye.

Igihe kiragenda ntikigaruka, icya kane k’ikinyejana kirihiritse kuwa mbere tuzatangira inzira ituganisha mu 1/2 cy’ikinyejana.

Mureke twinjirane yo imigambi mishya nk’abasenyera umugozi umwe. Ntawe twasiganya kubaka u Rwanda. Umutoza w’ikirenga Kagame Paul yaduhaye impanuro Nyambukiranya ibinyejana agira ati : "Uhinga mukwe Ntasigana."

Twibuke twiyubaka, dukomeze abafite intege nke, kandi duhumurizanye, Jenoside ntizongera kubaho.

Inshinga yateye Inkotanyi ishyaka yatondaguwe mu Impitagihe batsinda urugamba. " Zarakotanye" Itondagurwa mu Indagihe byubaka igihugu. " Turakotana" dukomeze tuyitondagure mu inzagihe, bitugeze mu icyerekezo Inkotanyi ziduhaye. "Bazakotana"

Ubumwe bw’intore bunoza intambwe. Ndasaba abakuru kutarambirwa kuvuga amateka yacu, hari ubwo twibwira ko abantu bose bari bahari mu 1994.

Dufashe abato kumenya ukuri, nabo bazabone icyo bazabwira abazabakomokaho, tuguye mu mutego wo kurambirwa kuganira amateka yacu aritwe bahamya bakiriho, twaba duteye inkunga abagoreka amateka. abatoya nibabaze abakuru, bandike ibitabo, bakore amafilime ntawe ubara ijoro nk’uwariraye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza