Ibyihariye ku gitabo ’Imitima y’abacu’ cya Happy Umwagarwa

Yanditswe na Nsengiyumva Emmy
Kuya 15 Ukuboza 2020 saa 06:24
Yasuwe :
0 0

Umwagarwa Assumpta Happy yanditse igitabo ‘Imitima y’abacu’ gikubiyemo igitekerezo cy’inkuru igaragaza uko imitima y’abari bato yashenguwe na Jenoside yakorewe Abatutsi mu 1994 ndetse bamwe bakaba bakigendana ibikomere bishingiye kuri ayo mateka.

‘Imitima y’abacu’ ni igitabo gishingiye ku gitekerezo cy’inkuru y’umukobwa w’imyaka 15 warokotse Jenoside yakorewe Abatutsi.

Umwanditsi avuga ko yahisemo kumwifashisha kuko na we ariyo myaka yarimo muri icyo gihe ndetse anibaza uko imitima y’abari bato yabashije kwakira ibyari bimaze kuba.

Umwagarwa avuga ko iki gitabo cye cyibanda ku buzima bwa nyuma ya Jenoside yakorewe Abatutsi, uko Abanyrwanda by’umwihariko urubyiruko bari babayeho n’uko imitima yabo yabashije kwakira ibyabaye mu gihugu.

Muri iki gitabo cy’amapaji hafi 380, umwanditsi yibanda ku bikomere urubyiruko rwakuye kuri Jenoside yakorewe Abatutsi ndetse anagaragaza ko bamwe bakigendana nabyo.

Umwagarwa yavuze ko igitabo gikubiyemo inkuru y’umwana witwa Karabo warokotse Jenoside amaze kwicirwa umuryango. Nyuma yaje kurererwa kwa Se wabo wari umusirikare ukomeye ahahurira n’umusore ’Shema’ wari umurinzi we batangirana gukundana.

Urukundo rwabo rwateje ibibazo bikomeye biviramo Shema kwirukanwa mu kazi ubuzima bumubera bubi.

Nubwo ubuzima bwa Shema bwabaye bubi akabanza no kuburana na Karabo, nyuma bongeye guhura ndetse bakajya bahuza urugwiro.

Umwagarwa yahishuye ko muri iyi nkuru, Karabo aba afite amateka akomeye aba atanifuza kuganiriza buri wese. Imiryango yo kwa Se na Nyina ntabwo yari ihuje amateka bigatuma itanumvikana.

Se n’abo mu muryango we bishwe muri Jenoside mu gihe nyina we yagiye kureba musaza we ngo aze gutabara umuryango we ntagaruke.

Muri iyi nkuru, Karabo ntaba azi niba nyina ariho cyangwa yapfuye.

Nyuma y’igihe kitari gito nibwo Karabo yaje guhura na Nyirarume (Musaza wa nyina) wigaga mu Burusiya yagaruka mu Rwanda agahabwa imyanya ikomeye muri Guverinoma.

Kubera kudahuza kw’imiryango, byatumaga ubwo Karabo yajyaga gusura kwa nyirarume byaramusabaga kwirinda kugaruka ku nkuru zo mu muryango wa Se, byasaga n’iyo yabaga ari kwa Se wabo, nabwo byamusabaga kwirinda guhingutsa inkuru zo kwa nyina.

Ibi byatumaga Karabo agira igikomere ku mutima yibaza impamvu imiryango ye itumvikana.

Igitabo cya Umwagarwa gihuriyemo urwo ruhurirane rw’inkuru yo mu miryango ya Karabo ndetse n’iye na Shema.

Umwagarwa ufite Impamyabumenyi y’Icyiciro cya Gatatu cya Kaminuza (Masters) yahawe na Kaminuza ya Greenwich yo mu Bwongereza mu bijyanye n’Imicungire y’Abakozi. Yakuze akunda gusoma no kwandika bityo ku bwe amaguriro y’ibitabo agomba kuba menshi mu gihugu nk’andi maduka yose.

Igitabo cye cyanditse mu Kinyarwanda no mu Cyongereza kiri ku isoko, kiragurishwa yaba ku mbuga zigurisha ibitabo ndetse no mu masoko atandukanye yabyo.

Kuri Amazon iki gitabo kigura amadorali 14.95, akabakaba ibihumbi 14 by’amafaranga y’u Rwanda.

Iki gitabo mu Mujyi wa Kigali kiboneka muri Library Caritas ku mafaranga y’u Rwanda ibihumbi 20 Frw.

‘Imitima y’abacu’ ni igitabo cya kabiri Umwagarwa yanditse nyuma yuko mu 2015 yari yasohoye icyitwa ‘Drums of Success’.

Mu 2018 nibwo yasohoye igitabo ‘Imitima y’abacu’ mu rurimi rw’Icyongereza, mbere yo kugishyira mu rurimi rw’Ikinyarwanda.

Igitabo 'Imitima y'Abacu' cya Happy Umugarwa kiri ku isoko
Happy Umwagarwa asanzwe ari umwanditsi w'ibitabo, inkuru ngufi, unazisoma akazisohora mu majwi
Imitima y'Abacu ni igitabo gishingiye ku nkuru y'urukundo rwa Karabo na Shema, imfubyi ebyiri zibyirukira mu muryango Nyarwanda wakomeretse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .