Gaël Faye agiye kuzenguruka i Burayi amenyekanisha igitabo cye Petit Pays

Yanditswe na Uwiduhaye Theos
Kuya 3 Ugushyingo 2019 saa 10:56
Yasuwe :
0 0

Umuhanzi Gaël Faye uri mu banditsi bakomeye agiye kuzenguruka ibihugu bitandukanye i Burayi amenyekanisha agatabo yanakinnyemo filime yise ‘Petit Pays’.

Guhera Ku wa Mbere tariki 4 Ugushyingo 2019 azaba ari i Bergen muri Norvège, Ku wa Kabiri tariki 5 no ku wa 6 Ugushyingo ajye i Copenhagen muri Denmark, mu gihe ku wa 7 Ugushyingo azaba ari Stockholm muri Suède.

Gaël Faye ni umuhanzi umaze kubaka izina mu buryo bukomeye ku Mugabane w’u Burayi by’umwihariko mu Bufaransa; mu kuririmba, kwandika ibitabo no mu ruganda rwa sinema.

Yavukiye mu Rwanda arererwa i Bujumbura mu Burundi, yerekeje i Paris afite imyaka 13, nyuma aza gutura mu Rwanda nyuma yo kurushinga.

Igitabo cye ‘Petit Pays’ kivuga ku buzima bw’umwana wavukiye i Burundi akabyarwa n’umunyarwandakazi w’impunzi n’umuzungu w’umufaransa wakoreraga i Burundi. Uwo mwana avuga uko yabonaga ubuzima muri icyo gihe, ibibazo by’amoko, Abahutu n’Abatutsi.

Uwo mwana ufite hagati y’imyaka 10 na 15 aba yibuka uburyo ubuto bwe bwaje kwicwa n’ibibazo bya politike zo muri aka karere. Anavuga ku kibazo cyo kuvuka ku babyeyi badahuje uruhu. Nyuma yaje guhungishirizwa i Burayi ari nabwo yaje kubona ko kuba imvange bigoye, kuko haba i Burundi haba no mu Burayi, hose abantu baho bamufataga nk’umunyamahanga.

Amaze gukura yiyemeje kugaruka muri Afurika kuko niho byibuze yumvaga ari iwabo. Mu byatumye yumva yigaruriye icyizere ni ugukunda gusoma no kwandika.

Gaël Faye yamenyakanye mu ndirimbo zakunzwe i Burayi zirimo iyitwa "Je pars," "Ma femme," "Petit Pays," "Pili Pili" n’izindi.

Mu 2018 uyu muraperi ni umwe mu baririmbye mu birori bikomeye byabereye mu nzu y’ibitaramo ya Zénith yo mu Mujyi wa Paris ndetse ahembwa mu bahanzi bagaragaza ubuhanga n’imbaraga mu bihembo bya "Victoires de la Musique" byabaga ku nshuro yabyo ya 33.

Iki "Petit Pays" cyamuhesheje ibihembo birenze bitanu birimo bine yahawe mu 2016 n’ikindi kimwe yahawe mu 2017. Uyu mwaka cyari kiri mu bihatana mu bihembo bishamikiye ku Ishyirahamwe Riharanira Iterambere ry’Abirabura muri Leta Zunze Ubumwe z’Amerika [NAACP], ryatangijwe ubwo abirabura bafatwaga nabi mu nzego zose z’ubuzima bw’icyo gihugu.

Igihembo cya NAACP Image gihabwa abirabura bo muri Amerika na Afurika bakoze ibikorwa by’ indashyikirwa ku rwego mpuzamahanga mu guteza imbere ubutabera, gusa ntabwo yabashije kucyegukana.

Gaël Faye agiye kuzenguruka ibihugu bitandukanye i Burayi amenyekanisha agatabo yanakinnyemo filime yise ‘Petit Pays’.
Igitabo cye ‘Petit Pays’ kivuga ku buzima bw’umwana wavukiye i Burundi akabyarwa n’umunyarwandakazi w’impunzi n’umuzungu w’umufaransa wakoreraga i Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza