Dr Jean Paul Kimonyo yamuritse igitabo kivuga ku nkomoko y’iterambere u Rwanda rufite

Yanditswe na Ferdinand Maniraguha
Kuya 10 Gicurasi 2019 saa 12:15
Yasuwe :
0 0

Umwanditsi Dr Jean Paul Kimonyo yamuritse igitabo ‘Transforming Rwanda, Challenges on the Road to Reconstruction’ kivuga ku mbogamizi n’ibitekerezo byiza byaranze inzira yo kongera kwiyubaka k’u Rwanda nyuma ya Jenoside yakorewe Abatutsi.

Ubusanzwe iki gitabo cyasohotse bwa mbere umwaka ushize kiri mu rurimi rw’Igifaransa cyitwa ‘Rwanda demain ! Une longue marche vers la transformation.”

Dr Kimonyo yahisemo kugishyira mu rurimi rw’Icyongereza kugira ngo kibashe kugera ku bantu benshi.

Muri iki gitabo hakubiyemo by’umwihariko amateka yo kongera kwiyubaka k’u Rwanda nyuma ya Jenoside yakorewe Abatutsi, nk’uburyo ruswa yavuzaga ubuhuha mu nzego nyinshi z’igihugu, amacakubiri agaragara hirya no hino n’ibindi.

Kimonyo kandi agaruka ku bice byacitse mu Muryango FPR Inkotanyi wari umaze guhagarika Jenoside, hakabamo abantu b’inda nini bashakaga kuburizamo imyanzuro iganisha u Rwanda ku iterambere.

Ku mugoroba wo kuri uyu wa Kane nyuma yo kumurika igitabo cye, yagize ati “Abantu bamwe bashatse guta umurongo wo guhindura ibintu bagashaka kwirarira, byateye ikibazo gikomeye cyane ariko igice cy’ubuyobozi bwa FPR gifata ingamba cyica uwo mugambi mubi. Bimwe mu bibazo byabaye biracyafite ingaruka n’ubu. Bamwe muri abo bantu bashakaga guta umurongo kubera inda nini n’ubu bariho baragerageza gutobanga ibyo abantu bagiye bakora.”

Kimonyo yavuze ko igitabo cye kigamije ahanini gusobanurira urubyiruko aho iterambere u Rwanda rufite ubu ryaturutse, ko ritapfuye kwizana gusa.

Ati “Iki gitabo kizafasha abakiri bato cyane cyane, kumva aho ibintu byavuye. Ntibabone gusa ko ibintu bigenda neza ariko batazi aho byaturutse”.

Mouzun Damien, umwe mu bitabiriye imurikwa ry’icyo gitabo ukomoka muri Benin, yavuze ko bishimishije kuba amateka y’iterambere rya Afurika ari kwandikwa n’abanyafurika ubwabo.

Yavuze ko igitabo ‘Transforming Rwanda, Challenges on the Road to Reconstruction’ gikubiyemo ibisubizo ku bantu benshi bajyaga bibaza niba ibyo u Rwanda rugeraho ari ibitangaza.

Ati “ Yavuzemo ibintu bikomeye bisa nk’aho bikiri amayobera abantu benshi bibaza, bavuga bati ibitangaza u Rwanda rukora biva he ? Bamwe bakibaza bati ahari wasanga bafite ababafasha cyangwa wasanga bafite amarozi runaka.”

Yavuze ko « Nk’umunyafurika numva ko twakabaye duteza imbere ibintu nk’ibi, tugura ibitabo by’abanditsi nk’aba tukabisoma.”

Umuyobozi Mukuru w’urugaga rw’abanditsi mu Rwanda, Hategekimana Richard, yashimye uruhare rwa Dr Kimonyo mu guteza imbere umuco wo kwandika mu Rwanda, avuga ko igisigaye ari abanyarwanda bagomba gukanguka bagasoma.

Ati “U Rwanda rwubatswe n’urubyiruko, niyo mpamvu gusoma iki gitabo uri urubyiruko, ari ingenzi cyane kuko bibafashe kugera ikirenge mu cya bakuru babo babohoye iki gihugu.”

“Ibitabo byinshi bihari byanditswe n’abazungu, babyandika ku nyungu zabo bwite n’amateka yacu bayandika nabi. Uyu munsi rero umuco wo kwandika twarawuhagurukiye tugira ngo tugire uruhare mu kuba umusemburo w’impinduka nziza mu banyarwanda.”

Igitabo ‘Transforming Rwanda, Challenges on the Road to Reconstruction’ kiboneka mu nzu zitandukanye zigurisha ibitabo i Kigali.

Dr Kimonyo yari asanganywe ikindi gitabo ’Rwanda : Un génocide populaire’ yasohoye mu 2008’.

Iki gitabo cyasohotse bwa mbere umwaka ushize kiri mu rurimi rw’Igifaransa cyitwa ‘Rwanda demain ! Une longue marche vers la transformation”
Umwanditsi Dr Jean Paul Kimonyo yavuze ko yahisemo kugishyira mu rurimi rw’Icyongereza kugira ngo kibashe kugera ku bantu benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza