Bamwiciye se mu maso: Miss Sonia Gisa yanditse igitabo kivuga ku buzima yanyuzemo muri Jenoside yakorewe Abatutsi

Yanditswe na Uwiduhaye Theos
Kuya 22 Nyakanga 2020 saa 12:06
Yasuwe :
0 0

Sonia Gisa wahagarariye u Rwanda muri Miss Supranational mu 2015 yanditse igitabo kigaragaza imibereho ye ikakaye yanyuzemo akiri mu Rwanda n’uko yageze i Burayi.

Uyu mukobwa w’imyaka 29 ni umwe mu banyamideli bakomeye bakomoka mu Rwanda bakorera aka kazi hanze y’u Rwanda. Ubu asigaye aba mu Bwongereza.

Yashyize hanze igitabo kigaragaza ubuzima bushaririye yanyuzemo mu gihe cya Jenoside yakorewe Abatutsi mu 1994, avugamo uko bamwiciye umubyeyi we mu maso. Sonia yavuye mu Rwanda mu 2009 ajya kuba i Liège mu Bubiligi. Iki gitabo cye yacyise ‘Slaughter Baby’ cyangwa se ‘Le Massacre Des Innocents’.

Ubuzima bushaririye i Burayi

Muri iki gitabo agaragazamo ukuntu yagiye hanze y’u Rwanda akaza gutungurwa n’uko yasanze ubuzima bwaho bumeze. Ati “Nari narasomye ibitabo byinshi nkareba televiziyo nkabonamo amafoto y’inzu n’ibindi bigaragaza ko i Burayi ari heza cyane.”

Akomeza avuga ko koko yageze i Burayi akabona ari heza ariko akaza kugorwa n’ubuzima bwaho. Ku ishuri aho yageze agatangira kwiga byaje kumugora kuko n’ubwo yari yarize mu Gifaransa kubasha kumva uburyo bakivugamo byamugoye cyane.

Ngo kwiga yabifatanya no gukora muri restaurant aho yaruhukaga gake gashoboka. Ati“Nakoraga muri weekend n’iminsi ibiri mu mibyizi nk’ugabura icyayi muri Restaurant. Nakoraga buri mugoroba, mu minsi y’imibyizi najyaga mu rugo nkoga nkahita njya ku ishuri.”

Avuga ko no ishuri yabaga atorohewe kubera uburyo yavugagamo Igifaransa. Ati “Ibyumweru bya mbere mu ishuri byari binkomereye. Nahitagamo kwicecekera. Nta bantu twavuganaga nta n’uwigeze anyiyegereza ngo tube inshuti.”

“Naje kugira inshuti nke aho nakoraga ariko iminsi myiza yo gusohokana njye nabaga ndi mu kazi. Ntabwo nizihizaga iminsi mikuru nka Noheli n’Ubanani […] ariko byamfashije kubika udufaranga duke nohererezaga umuryango wanjye uri mu Rwanda.”

Avuga ko yigeze kuva muri ako kazi yakoraga akabona akandi muri Hotel aho yari kujya akora amasaha make ariko akaza kwirukanwa hashize iminsi mike. Yongeye kubona akazi muri restaurant naho baza kumwirukana.

Yavuze ko mu mezi atandatu yari amaze kumenya kuvuga neza Igifaransa ndetse ahita abona umusore bakundana. Ariko ngo uwo musore yari umusinzi ku buryo bigeze gupanga guhura undi akigira kuryoshya n’izindi nkumi akabyibagirwa. Ngo igihe yabyibukiye yaraje Sonia amusohora aho yabaga amusubiza n’impano y’akataraboneka yari yaramuhaye.

Bamwiciye se mu maso muri Jenoside yakorewe Abatutsi

Sonia Gisa avuka kuri Gabriel Gashi na Esperance Butanga. Muri iki gitabo cye agaragazamo uko yabayeho mu minsi ijana ya Jenoside yakorewe Abatutsi mu 1994. Akavugamo uko bamwiciye se mu maso muri icyo gihe kandi yari n’umwana muto cyane.

Avuga ko kwandika ku mateka ye nk’aya atari ibintu byari bimworoheye, ati “Kwandika amateka nk’aya ntibyari byoroshye. Byari nko kwiyomora inguma. Numvaga hari imitwaro imvuye ku bitugu. Nzi ko hari abantu benshi bari guhura n’ibibazo byo kwiyomora ibikomere by’ihungabana ritandukanye bahuye naryo. Nshaka kubabwira ko niba narabishoboye nabo babishobora. Nta kintu na kimwe kizaza byoroshye.”

Yakomeje avuga ko yariraga cyane ubwo yandikaga iki gitabo kuko byamusubizaga mu bihe yanyuzemo.

Yabwiye IGIHE ko igitekerezo cyo kwandika iki gitabo yakigize mu 2016, ashaka kwandika ku mateka ye kuko azi ko hari benshi byafasha bahuje amateka mu buzima. Yacyanditse mu 2018 ariko agezemo hagati acika intege ariko mu 2019 yongera kugikomeza, agira igitekerezo cyo kugishyira hanze mu 2020.

Ubu, iki gitabo kiboneka kuri Amazon mu ndimi ebyiri: Slaughter Baby cyangwa Le Massacre Des Innocents.

Sonia Gisa ni umunyamideli akaba n’umukinnyi wa filime w’Umunyarwandakazi wavukiye mu karere ka Karongi. Yakinnye muri filime ‘Rattrapage’ na ‘Very Valentine’.

Mu 2015 yahagarariye u Rwanda muri Miss Supranational aza kuza mu bakobwa 10 ba mbere ndetse aba na Miss Supnarational Africa muri uwo mwaka. Ubu akorana n’ibigo bifasha abanyamideli ariko cyane cyane icyo mu Mujyi wa Londres mu Bwongereza.

Igitabo cya Sonia Gisa kimaze ibyumweru bibiri kigiye hanze
Sonia ugiye kumara imyaka 11 i Burayi yagaragaje ko ubuzima bwaho bwabanje kumugora / Ifoto: Kiril Stanoev
Sonia Gisa yashyize hanze igitabo kirimo amateka y'ubuzima bwe / Ifoto: Ashli Smith

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .