Bamurangirwa yamuritse ibitabo bibiri, akebura abakerensa Ikinyarwanda

Yanditswe na Ferdinand Maniraguha
Kuya 17 Mutarama 2020 saa 12:48
Yasuwe :
0 0

Umunyarwandakazi, Bamurangirwa Patricia yamuritse ibitabo bibiri bishya birimo ikivuga ahabi u Rwanda rwavuye n’aho rugeze cyitwa ‘New Rwanda From Hell to Heaven’, na ‘Africanism’ gitanga inama ku banyafurika bashidukira amahanga basize ibyiza biri iwabo.

Mu muhango wo kumurika iki gitabo wabereye ku isomero rikuru ry’igihugu ku Kacyiru kuri uyu wa Kane, Bamurangirwa yakebuye abanyarwanda banena ururimi rw’Ikinyarwanda, ntibarwigishe abana babo, avuga ko bavangira umurage w’u Rwanda n’Iterambere ry’urwo rurimi.

Bamurangirwa yavuze ko igitabo cye “Africanism” yacyanditse kugira ngo akangurire urubyiruko kwikunda no gukunda iby’iwabo.

Yavuze ko kigamije kubwira urubyiruko ko Afurika ifite byose bishobora gutuma itera imbere, igikenewe ari icyizere.

Ati “Nabwiraga urubyiruko kugira ngo rwigirire icyizere, rumenye ko iwabo nta kihabuze, bamenye ko bashoboye.”

Mu gitabo cya kabiri, New Rwanda From Hell to Heaven avugamo uburyo u Rwanda rwabashije kwivana mu mahano ya Jenoside yakorewe Abatutsi, ubu akaba ari igihugu cy’icyitegererezo muri Afurika.

Yavuze ko kucyandika byari no mu rwego rwo gushimira Inkotanyi zagize uruhare mu kubohora igihugu no guhagarika Jenoside, ndetse n’ishimwe ku bacitse ku icumu rya Jenoside babashije kurenga ibihe bibi banyuzemo, bagafasha igihugu kwiyubaka.

Ati “ Nashatse uko nshimira Inkotanyi zahagaritse Jenoside n’abacitse ku icumu barenze urwo rwego rw’ibikomere bari bafite ku mutima no ku mubiri bakubaka u Rwanda. Nemeza ko nta muriro urenze ya mezi atatu abacitse ku icumu bari barimo. Ugereranyije kiriya gihe bari barimo, iyo shusho ukayishyira hamwe n’iy’uyu munsi, bakubwiye ko bari mu ijuru nta wabahakanya.”

Mu muhango wo kumurika iki gitabo kandi, Bamurangirwa yagarutse ku gaciro k’ururimi rw’Ikinyarwanda, avuga ko ari ururimi rufite amahirwe yo kwaguka ariko rudatezwa imbere uko bikwiriye.

Ati “Mu mahanga ababyeyi bavugana n’abana indimi zo mu bihugu barimo. Muri Kigali ababyeyi bamwe na bamwe bakavugana n’abana indimi z’amahanga kuko abana biga mu mashuri aturuka muri ayo mahanga. Bigabanya uburemere Ikinyarwanda gishobora kuba cyagira kuko muri aka karere nta rurimi rurusha Ikinyarwanda uburemere.”

Yavuze ko mu gihe Abanyarwanda ubwabo batazagira ishyaka ryo gukunda no kuvuga Ikinyarwanda, bizakomeza kukigabanyiriza imbaraga mu ruhando mpuzamahanga.

Abajijwe impamvu we atarandika igitabo mu Kinyarwanda, Bamurangirwa yavuze ko abizirikana, ko abanza kwandika mu ndimi z’amahanga kugira ngo abanyamahanga bamenye ko u Rwanda na Afurika biriho.

Ati “Mpitamo kubanza kwandika mu rurimi rwumvwa cyane cyane n’amahanga kugira ngo batumenye ko duhari kandi dushoboye. Mbanze mbwire rubanda bakeka ko tutashoboye, bakeka ko tudahari.”

Kuri ubu ibitabo bya Bamurangirwa biboneka mu iguriro ry’Ibitabo cya Caritas mu mujyi wa Kigali, na Librairie Ikirezi.

Bamurangirwa amaze kwandika ibitabo bitanu byose biri mu rurimi rw’Icyongereza. Harimo icyo yise “Rwanda Yesterday” avugamo amateka y’u Rwanda, ‘‘Patriotism” kigizwe n’ibisigo biri mu Kinyarwanda no mu Cyogereza yahimbiye Perezida Kagame, icyo yahimbiye Umwami Mutara wa III Rudahigwa, ndetse n’icyo yahimbiye Inkotanyi zambuka, “My Mother’s Dreams” agaragazamo uburyo yapfushije nyina akiri muto agacikiriza amashuri ye kandi inzozi ze zari ukwiga.

Ubwo Bamurangirwa yamurikaga ibitabo bye bishya kuri uyu wa Kane
Abantu batandukanye bitabiriye imurikwa ry'ibitabo ‘New Rwanda From Hell to Heaven’, na ‘Africanism’
Ubwo Bamurangirwa yasinyaga mu gitabo mbere y'uko kigurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza